1 Col. 2:13.*Ndo Dio kuajon ndo juachaxin tsaricho̱nnta nchakon jaꞌanta bakeꞌenta xranchi tsikenꞌennta ixi kuancheꞌenta ti ñaꞌi ko ti ndakoꞌa. 2 Ko saꞌó jaña kuancheꞌenta ixi kuarueꞌenta ti kuancheꞌe chujni ñaꞌi jii ngataꞌa xasintajni ko bakitikaonta Xixronꞌanxrée, ichrji ngataon chrinto, xi tetuenꞌen ikaxin espíritu ñaꞌi nchekateya chujni titikaonꞌa ndo Dio. 3 Ko kain jai̱na saꞌó jaña kuancheꞌena, ko ti ndakoꞌa ncheꞌe juaxruxin cuerpoi̱na meꞌe kuancheꞌena. Ti ndakoꞌa ncheꞌena ko ti ndakoꞌa xraxaonna meꞌe bakitikaona, méxin jai̱na tikinixinna ijié juachjaon tsaana xranchi ni chúxinꞌa ndo Dio. 4 Ko kuenꞌa jaña ixi Ndo Dio tsango bikonóaꞌi̱na ndo ko tsango tjuai̱na ndo. 5 Ko maski jai̱na ndatsikenꞌenna kondeexin ti ndakoꞌa juincheꞌena, jeꞌe ndo Dio juinchexechónna ndo nganii ndo Cristo ko meꞌe konꞌen ixi juasie ndo Dio, meꞌe koméꞌe jíei̱na. 6 Ndo Dio juinchexechónna ndo nganii ndo Cristo Jesús ko jaña ba̱ke̱ꞌe̱na ndo ti jii ndo Cristo ngajní. 7 Jaña juako ndo ixi tsango tjuai̱na ndo jai ko kain nano tsi̱i̱ ko bingijnana ndo ixi titikaꞌonna ndo Cristo Jesús. 8 Ixi juasie ndo Dio juinchekitoi̱na ndo ti tsechónna kain nchakon*tsechónna kain nchakon vida eterna ixi chuntiana ndo Cristo. Jeꞌa ixi xrojan ngeꞌe jian juincheꞌena. Naꞌi. Juasie ndo Dio ixi jeꞌe ndo juinchekitoi̱na ndo juachaxin jiꞌi. 9 Jeꞌa ixi naa ngeꞌe jian juincheꞌena ntiꞌi, ko juaꞌi sinchejié aséei̱na. 10 Ndo Dio juinchéñana ndo ixi sincheꞌena ti jian ixi titikaꞌonna ndo Jesús, jaña konꞌen ixi jaña tsixraxaon ndo ó saꞌó.

11 Méxin, xraxaonnta xranchi bakeꞌenta saꞌó. Jaꞌanta jeꞌa chujni judíonta, ko ni judío bakaa na̱ chjiꞌe na̱ ko ndachro na̱ ixi jaꞌanta jeꞌa chjenꞌen ndo Dio ixi bakaꞌinta chjiꞌe na̱. 12 Saꞌó jaꞌanta kuachuxinꞌanta ndo Cristo ko kuajentoꞌanta ni tjajna Israel ko kuachuxinꞌanta ti ley tsiketuanꞌan ndo Dio ko ti ndachro ndo tsajon ndo tsayéꞌe chujni. Ko jaña bakeꞌenta ngataꞌa nunte xasintajni ko kuachuxinꞌanta ndo Dio, méxin juaꞌi chonꞌénnta ngeꞌe tsajon ndo. 13 Ko jai steniinta ndo Jesucristo ixi jaꞌanta saꞌó bakeꞌenta ikjín ixi kuachuxinꞌanta ndo Dio. Ko jai ixi kuenꞌen ndo Cristo Jesús, meꞌe chao konchjiñeꞌenta ngajin ndo Dio. 14 Ndo Cristo chjai̱na ndo juaxruxin ixi sen judío ko chujni jeꞌa judío ikjan sen naakua tjajna ko jai ndo Cristo kuantsje ndo juañao kuachónda sen, ixi meꞌe xranchi naa tjatuꞌo bakingakonꞌen.

15 Col. 2:14.*Ndo Cristo, ti kuenꞌen ndo, meꞌe juinchejexin ndo ti baketuanꞌan ley xranchi xrokuinteena. Ko ti yuu tjajna juinchéña ndo naakua tjajna natjúá tikinixinꞌen jeꞌe ndo ko jaña bakeꞌe ndo juaxruxin. 16 Col. 1:20.*Ixi kuenxin ndo Cristo nganito nta̱cru, meꞌe juinchejexin ndo juañao kuachónda yui tjajna, ko ba̱ke̱ꞌe̱ ndo juaxruxin ngajin jeꞌe sen ko ndo Dio ko jaña yui tjajna kóña xranchi xrokui naakua chujni.

17 Ndo Cristo kui̱i̱ ndo ko chronga ndo chijni tajon juaxruxin ngajin jaꞌanta ti xrachuxinꞌanta ndo Dio, ko sen judío, sen ste tjenka ndo. 18 Ko ixi juachaxien ndo Cristo, kainna, sen judío o̱ sen jeꞌa judío, chao tsonchjiñeꞌena ngajin Ndotáina Dio ixi xrajeꞌo Espíritue ndo kuayeꞌena.

19 Méxin, jaꞌanta í jeꞌa chujni tsiki̱ꞌxi̱n tjajna jii ikjín. Ko jai kainna ikjanna chujni ste naa tjajna tjúá tikinixinꞌen ndo Dio. 20 Jaꞌanta stenta xranchi naa nchia tsango ijié jitaꞌa naa ixro ijié ti tsikakeꞌe sen apóstol ko sen kuachronga chijnie ndo Dio ó saꞌó. Ko Ncháina†Ncháina Señor Ncháina Jesús o̱ Ncháina Dio Jesucristo, jeꞌe ndo nduaxin ixro ícha tjintee kóñaxin nchia meꞌe. 21 Ko Ncháina Cristo jeꞌe ndo nchesoji nchijíi nchia, jaña chao ícha tsajinꞌin nchia xranchi naa niꞌngo tjúá tikinixinꞌen Ncháina Jesucristo. 22 Jaña jaꞌanta kaxon ti titikaonnta ndo Cristo, kaxon chao tikinixinꞌanta tsoñanta nchia meꞌe, ko ngaxinꞌin nchia meꞌe tsakeꞌe Espíritue ndo Dio.