1 Kichuuna, kueyaꞌi jaꞌanta tsingakuenxinnta sinchekuenꞌennta chujni chijnie ndo Dio ixi siá ndakoꞌa sinchekuenꞌennta chujni, meꞌe jaꞌanta ícha soji tsóñaꞌanta ijie̱. 2 Kainna ndakoꞌa nichjana, ko siá jii ngisen jian nichjeꞌe sen sen kichuu sen ko xroꞌan chijni ndakoꞌa tachrjexin roꞌa sen, sen meꞌe ícha tjúá aséen sen ko chao tetuenꞌen sen nchijíi cuerpoe sen. 3 Jiꞌi jii xranchi naa kunxin, tsakeꞌe na̱ chika ngaya roꞌa ba ixi jaña chao tsitikaon ba ko ndako itsji ba. 4 Tsjeꞌenta kaxon xranchi ste nta̱barco: maski tsango ijié nta̱a̱ ko tsango soji chrinto toncheka nta̱a̱, xi teka nta̱a̱ chao tituenꞌen xa nta̱a̱ ixi chónda nta̱a̱ naa nta̱a̱ nchíín tekáxinni nta̱a̱. 5 Jaña nejenni kaxon. Maski tsango nchíín, nchakon nichja tsango nchejié ngeꞌe nichja, ko ti nichja meꞌe xranchi naa xroꞌi nchíín nchekakiin nchijíi naa ijna̱. 6 Jaña nejenni jii xranchi naa xroꞌi ko hora nichja ti ndakoꞌa, meꞌe ncheniꞌe nchijíi aséenni ko cuerpoeni. Ngeꞌe ndakoꞌa nichjani meꞌe tsitjáñaxin kain ngeꞌe jian jii ngaya aséenni, ko tsitjáñaxin kain chujni tinꞌen ngeꞌe nichjani ixi Xixronꞌanxrée nchekateya xa ixi ndakoꞌa xronichjani. 7 Chujni chao sinchesancho kain iko jieꞌe jii ntajie, ko kain iko tjanga ko kunchee ko iko jingangi ndachaon,*ndachaon mar kain iko meꞌe chao tsetuenꞌenni ba. 8 Ko nejenni juaꞌi tsetuenꞌenni ixi ti nichja chónda xranchi xrokjui xro̱a̱nyua tsenxin aséen chujni. 9 Roꞌana tajonxinna juasaya ngajin Ndotáina Dio ko kaxon roꞌana tengexinna teka chujni, chujni juinchéña ndo Dio xranchi jeꞌe ndo. 10 Kaxon ixi roꞌana tajonxinna juasaya ngajin ndo Dio ko kaxon roꞌana tjankataxinna ijie̱ ngajin ni kichuuna. Kichuuna, ncheꞌanta jaña ixi ndakoꞌa meꞌe. 11 Ti no tachrjetóxin inda, tachrjeꞌa inda tsje̱n ko kaxon nda tsjá. 12 Kichuuna, ¿á chao naa nta̱a̱ tu higo tsajon nta̱a̱ kaxon tu aceituna o̱ nta̱a̱ tajon tu uva tsajon nta̱a̱ kaxon tu higo? Kaxon juaꞌi ti no tachrjetóxin nda tsje̱n tachrjexin nda tsjá.

13 Siá jii xrojan ngisen ngakjenꞌennta, sen tsango noꞌe ko tienxin jian, sen meꞌe xrokonda sincheꞌe sen jian ko xronichja sen jian ko sinchejiéꞌa aséen sen ixi ti tsango jian noꞌe sen. 14 Ko siá jaꞌanta tochjuyaꞌanta meꞌe sinchetsjá asáanta, ko siá jaꞌonta tjaunnta sincheꞌenta kain ngeꞌe, meꞌe sinchejiéꞌa asáanta ixi ngeꞌe ti noꞌanta ixi meꞌe xrokjui xranchi xrojuincheyanta ko ndachroꞌanta ti nduaxin. 15 Siá jaña ncheꞌenta, ti noꞌanta meꞌe jeꞌa ndo Dio kuajon, meꞌe tsijinchiinta ixi chujni jii ngataꞌa nunte, chujni titikaonꞌa ndo Dio ko meꞌe ti tajon Xixronꞌanxrée. 16 Ti no jii chujni chjuyeꞌe ko ti tjaun jeꞌo tsetuanꞌan, ntiꞌa jii ti ncheketoni ko kain ti ndakoꞌa. 17 Ko sen jian tsienxin ko jian xraxaon ti meꞌe ti̱ꞌxi̱n ngajin ndo Dio: sen meꞌe xrokonda tsjako sen ixi jian aséen sen ko tse̱to̱ꞌa sen ko tsingijna sen chujni ko tsitikaon sen ti jian ndachro sen kichuu sen, ko tsikonóeꞌe sen chujni ko jian sincheꞌe sen, ko xronichja sen ti nduaxin. 18 Ko sen tjaun tsakeꞌe juaxruxin xrokonda tsingijna sen sen kichuu sen kaxon tsakeꞌe sen juaxruxin, ko jaña tsintee sen juaxruxin xranchi tjaun ndo Dio.