1 Tjumeꞌe ndo Jesús kuincheꞌe ndo níikán ko te chujni, ko jeꞌe ndo xruanꞌan ndo sen, yuyu sen, tsitaon sen satsji sen kain tjajna ko nguixin ti no tjaun ndo xrokjui ndo. 2 Mt. 9:37, 38.*Ko ndachro ndo:

―Nduaxin ntatjunta, ícha tsikoña noa jai, ko sen sincheꞌe ixra̱ tsjéꞌa sen. Méxin tinóatáanta ngajin nchée nunte xroxruanꞌan ndo itsjé sen sincheꞌe ixra̱. 3 Mt. 10:16.*Satjinta ixi janꞌan xruanꞌannta itsjinta xranchi kutuchjon ngakjenꞌen kundanixra. 4 Tikuꞌinta bolsa, tomi, kate ko xroꞌan ngisen chje̱ꞌénta juajna ngatja chaꞌo. 5 Ti tsjasonta naa nchia, saꞌó tájonnta juajna ko ndachronta: “Juaxruxin tsakeꞌe ni ste nchia jiꞌi.” 6 Ko siá xrojan ni nchia tikinixin tsayéꞌe na̱ juaxruxin, meꞌe ícha juaxruxin tsayéꞌe na̱ xranchi ndachronta; ko siá naꞌi, juaxruxin meꞌe xrokjan ngajinnta. 7 1Co. 9:14; 1Ti. 5:18.*Ti tsjasonta naa tjajna, tituanꞌanta jeꞌo naakua nchia ko intenta ko tinꞌinnta ti xrotjáanta ni nchia meꞌe, ixi ngisen ncheꞌe ixra̱ tikinixin xroxengeꞌe na̱ iꞌna̱. Ko tjiꞌanta naa ko inaa nchia. 8 Ti tsjasonta naa tjajna ko ni ste ntiꞌa jian tsiyaꞌanta na̱, intenta kain ngeꞌe xrotjáanta na̱. 9 Nchexrueꞌennta ni niꞌe ste tjajna meꞌe, ko ndachenta na̱: “Í kjínꞌa jiti̱i̱ juachaxin tsetuanꞌan ndo Dio.” 10 Hch. 13:51.*Ko siá tsjasonta naa tjajna ko tsayaꞌinta na̱ jian, jaꞌanta tachrjenta chaꞌo ko ndachronta: 11 Mt. 10:7-14; Mr. 6:8-11; Lc. 9:3-5.*“Inche tjajnánta itsé tuténa̱na, tontsjengana ixi tsjakoxinna ixi jaꞌanta ko janꞌanna chondaꞌina ngeꞌe xrotsjeꞌena ixi jaꞌanta kuitikaonꞌanta ndo. Ko tonoꞌanta ixi juachaxin tetuanxin ndo Dio ó kjínꞌa jii juachaxin.” 12 Mt. 11:24; Mt. 10:15.*Janꞌan ntatjunta nchakon tsjexin nunte xasintajni ícha tangi tsonꞌen ni tjajna meꞌe ixi ngeꞌe konꞌen ni tjajna Sodoma ó sée.

13 ’¡Tsango tangi tsonꞌannta jaꞌanta ni tjajna Corazín! ¡Ko tsango tangi tsonꞌannta jaꞌanta, ni tjajna Betsaida! Ixi siá ti ijié ngeꞌe juintaꞌa ngajinnta ntiꞌi xrokonꞌen ngajin ni tjajna Tiro ko tjajna Sidón, ni meꞌe ó sée xrokuindoxin na̱ ti ndakoꞌa juincheꞌe na̱ ko xrotsjanga na̱. Ko xrokueyá na̱ manta tiie ko xrobakeꞌe na̱ ntesokiꞌi ngataꞌa jaa na̱. 14 Méxin nchakon tsjexin nunte ntiꞌi, ícha tangi tsonꞌannta jaꞌanta ixi ti tsonꞌen ni tjajna Tiro ko tjajna Sidón. 15 Ko jaꞌanta tjajna Capernaum, ¿á xraxaonnta itsjinta ti jii ndo Dio? Naꞌi, jeꞌa jaña tsonꞌen, jaꞌanta xroxingajinnta ti jii xroꞌi xrochexin chujni titikaonꞌa.

16 Mt. 10:40; Mr. 9:37; Lc. 9:48; Jn. 13:20.*Ko ndachro ndo Jesús:

―Ngisen tsitikaon ti xrondachro jaꞌanta, kaxon tsitikaonna na̱ janꞌan. Ko ngisen tsitikaonꞌa ti xrondachronta, kaxon tsitikaonꞌana na̱. Ko chujni tsitikaonꞌa na̱ janꞌan, kaxon tsitikaonꞌa na̱ ngisen xruanꞌanna juiꞌi.

17 Tjumeꞌe ikjan sen níikán ko te chujni ko tsango juaxruxin ste sen, ko ndachro sen:

―Ncháana̱na, kain espíritue Xixronꞌanxrée titikaonna hora nichjana ixi juachaxiannta.

18 Ko ndachro ndo Jesús:

―Jaán, janꞌan bikon xranchi xingajinxin Xixronꞌanxrée ngajní xranchi naa tóngíxin. 19 Janꞌan tjáꞌanta juachaxin tsingatjanginta kunchee ko kulantajoon, ko tsixinteꞌanta ti ñaꞌi, ko xroꞌan ngeꞌe tsonꞌannta. 20 Ko takeꞌanta juaxruxin ixi espíritue Xixronꞌanxrée titikaon ngajinnta. Ícha juaxruxin tinteenta ixi xranchi tinꞌinnta ó jitaxin ngajní.

21 Ko hora meꞌe Espíritue ndo Dio kuajon ngajin ndo Jesús juaxruxin ko chéꞌe ndo nichjeꞌe ndo ndotée ndo jii ngajní ko ndachro ndo:

―Tajon juasaya ngajin jaꞌanta Ndotána, Nchée nunte ko ngajní, ixi kuajonnta juachaxin ixi ngisen noeꞌa xrokuienxin na̱ ngeꞌe kondee ngajní ko juinchenoeꞌanta ni tsango noꞌe ko ni tsango tienxin. Jaña, juincheꞌe jaꞌanta Ndotána ixi jaña tjaunnta.

22 Jn. 3:35; Jn. 10:15.*Ko nichjeꞌe ndo sen ntiꞌa ko ndachro ndo:

―Ndotána chjána juachaxin ixi tetuanꞌan kain ngeꞌe. Xroꞌan ngisen noꞌe ngisen chjenꞌen jeꞌe ndo. Jeꞌo Ndotána chúxin ndo ngisen chjenꞌen ndo. Ko xroꞌan ngisen chúxin ngisen jeꞌe ndo, jeꞌo chjenꞌen ndo, ko janꞌan tinchaꞌa ngisen tjaun xrochuxin Ndotána.

23 Ko tjumeꞌe ndo Jesús tsjeꞌe ndo sen teyuu chrikao ndo ko jeꞌo sen ndache ndo sen:

―Juaxruxin ste ni bikonxin ixi ikon ngeꞌe bikon jaꞌanta. 24 Ntatjunta ixi itsjé sen kuanichja sen chijnie ndo Dio ko itsjé sen rey tjaun sen xrobikon sen ti bikonta, ko bikonꞌa sen. Ko tjaun sen xrokuinꞌen sen xranchi ritinꞌennta jai, ko kuienꞌa sen.

25 Mt. 22:35-40; Mr. 12:28-34.*Ko tjumeꞌe naa xi tjako ley tjajna Israel bingatjen xa nichjeꞌe xa ndo Jesús ixi tjaun xa tsonoꞌe xa á nduaxin noꞌe ndo Jesús, ko juanchangi xa ndachro xa:

―Maestro, ¿ingeꞌe sintaꞌa janꞌan ixi tsarichón kain nchakon?

26 Ko ndachro ndo Jesús:

―¿Ngeꞌe jitaxin chijnie ndo Dio? ¿Ngeꞌe tienxian?

27 Ko jeꞌe xa ndachro xa:

―Ley ndachro: “Tjueꞌenta Ncháanta ndo Dio ixi nchijíi asáanta, ko nchijíi jaꞌanta ko nchijíi ti xraxaonxinnta; ko tjueꞌenta ni kichuunta xranchi tjueꞌenta asáanta.”

28 Ko tjumeꞌe ndo Jesús ndachro ndo:

―Chao ndachrua. Siá jaꞌa sincheꞌe jiꞌi, tsechón asáan kain nchakon.

29 Ko xi tjako ley tjaun xa xrojuakoxin xa ixi ícha jian noꞌe xa, méxin ndache xa ndo Jesús íjngo:

―¿Ngisen ni kichuuna?

30 Ko tjumeꞌe ndachro ndo Jesús:

―Naa xi kui̱xi̱n xa tjajna Jerusalén jitji xa tjajna Jericó, ko ngatja chaꞌo bingakonꞌen xa kaxin xicheꞌe, ko kueꞌe na̱ xa kain ngeꞌe chónda xa ko kain ti jitsáa xa, ko juaya na̱ ngajin xa, xranaáxrokóñaxón na̱ xa. Ko tjumeꞌe sakjui na̱. 31 Ko tjumeꞌe naa xitaana judío jitji xa xrajeꞌo chaꞌo, ko bikon xa jitsinga xi meꞌe, ko xitaana konchjino xa ko sakjui xa. 32 Ko kaxon no ntiꞌa jitatsinga naa xi levita, ko bikon xa xi jitsinga, ko kaxon konchjino xa. 33 Ko kaxon ntiꞌa jitji naa xi kui̱xi̱n nunte Samaria, ko bikon xa jitsinga xi judío, ko jeꞌe xa bikonóeꞌe xa xi meꞌe. 34 Ko konchjiñeꞌe xa tjenka xa, ko juinchexruenꞌen xa ixi aceite ko vino kain ti no tsikoniꞌe xa, ko kuetsía xa jian ti no tsikoniꞌe. Ko tjumeꞌe juincheketaꞌa xa xi kuntajnoé xa ko sabikao xa xi niꞌe naa nchia tjokéexin na̱, ko ntiꞌa jeꞌe xa kuayakonꞌen xa xi niꞌe. 35 Ko nchakon sakjui xa, kuantsje xa yuu tomi ko juenga xa iꞌna̱ ngajin xi ndoꞌa, ko ndachro xa: “Tayakonꞌén xi jiꞌi, ko siá sinchexienxian ícha tomi ixi jeꞌe xa, janꞌan tsjengaꞌa ꞌna̱ nchakon xrokjanna.” 36 Méxin ndachijiana, ¿ngisen ti níi xi jiꞌi nduaxin tjueꞌe xa xi juincheniꞌe xicheꞌe?

37 Ko xi tjako ley ndachro xa:

―Xi bikonóeꞌe xi niꞌe.

Ko tjumeꞌe ndachro ndo Jesús:

―Méxin jaꞌa kaxon itjia ko ncheꞌe jaña.

38 Jn. 11:1.*Tjumeꞌe ndo Jesús sakjui ndo, ko kuiji ndo naa tjajna nchíín. Ntiꞌa jii naa jan ndatinꞌin Marta ko kuajon jan juachaxin kuituꞌe ndo ndoꞌa jan. 39 Ko jeꞌe jan Marta chónda jan naa jan kichuu jan ndatinꞌin María. Ko jeꞌe jan María bakeꞌe jan tjenka tutée ndo Jesús stetinꞌen jan ngeꞌe jindachro ndo. 40 Ko jan Marta tsango xraxaon jan sinchekonchjian jan ngeꞌe sine sen ko chónda jan itsjé xra̱, méxin konchjiñeꞌe jan ngajin ndo Jesús ko ndachro jan:

―¿Nchána, á xraxaonꞌa ixi jan kichuuna tintuna jan janꞌon rintaꞌa kain ixra̱? Ndache jan tsingijnana jan.

41 Ko ndo Jesús ndache ndo jan Marta:

―Marta, Marta, jaꞌanta tsango yaanta juachjaon ixi kain ixra̱ chondanta, 42 ko jii naakua ngeꞌe tsango tjintee. Ko jan María kuitja jan ngeꞌe ícha jian, ko xroꞌan ngisen tsantsjeꞌe jan jiꞌi.