1 Ndo Jesús jii ndo ngaxinꞌin niꞌngo ijié ko jitsjeꞌe ndo ixi itsjé ni chónda kueya tomi ko kueya ngeꞌe, kui̱i̱ na̱ ko bakeꞌe na̱ tomi ngaya nta̱a̱ tingachjian tomi. 2 Ko bikon ndo Jesús kui̱i̱ naa nchri kaꞌan ko nóa nchra, nchri meꞌe bakeꞌe nchra yuu tomi nchínchín, tomi tjinteꞌa. 3 Ko ndo Jesús ndachro ndo:

―Janꞌan nduaxin ntatjunta ixi nchri kaꞌan nóa, ícha tjintee tomi bakeꞌe nchra ixi ti kuajon ikaxin na̱, 4 ixi jeꞌe na̱ kuajon na̱ ti ngeꞌe xeꞌe chónda na̱, ko jeꞌe nchri nóa kuajon nchra kain tomi xrojuinexin nchra.

5 Kaxin na̱ stetjao na̱ ixi niꞌngo ijié tsango chaxro ixro tsikiꞌtexin niꞌngo, ko chaxro jitsjeꞌe ngeꞌe tsikajon na̱ ngajin ndo Dio. Ko ndo Jesús ndachro ndo:

6 ―Tsi̱i̱ nchakon kain ngeꞌe tikonnta tsitjáña, kain xrochjejin ko ninaa ixro tsituꞌe ngataꞌa inaa ixro.

7 Juanchangiꞌe na̱ ndo Jesús:

―Maestro, ¿ngisa tsonꞌen jiꞌi? ¿Ko ngeꞌe tsjakoxin ixi jaña tsonꞌen?

8 Ndo Jesús ndachro ndo:

―Tsjeꞌenta jian ixi xroꞌan ngisen sintayaꞌanta. Ixi tsi̱i̱ kueya na̱ xrondachro na̱ ixi jeꞌe na̱ ndo Cristo na̱, ko xrondachro na̱: “Ó tsitjáña nunte.” Jaꞌanta titikaonꞌanta ti ndachro ni meꞌe ko rueꞌanta na̱. 9 Nchakon tsinꞌennta ixi stetóña kichuu naa tjajna ko inaa tjajna, ko kaxon kaxin tjajna steteto na̱, xronkaꞌinta ixi kain jiꞌi saꞌó xrokonda tsonꞌen ko xratsitjáñaꞌi nunte.

10 Ko ndo Jesús ndachro ndo ikaxin ngeꞌe:

―Tse̱to̱ naa tjajna ko inaa tjajna, naa xi tetuanꞌan naa tjajna ngajin inaa xi tetuanꞌan inaa tjajna. 11 Ko itsjé no tsanga tsontengi nunte, ko tsango tsatse na̱ jinta ngataꞌa nunte, ko kaxon tsango itsjé ichin tsi̱i̱ ngataꞌa na̱, ko tsango chinga ngeꞌe tsikonni ngajní ko tsango sinchexronkana.

12 ’Ko kain jiꞌi xratsuenꞌa, ixi saꞌó tsenginta na̱, ko ndakoꞌa sintaꞌanta na̱ ko xroxraxinꞌinnta na̱ ndoꞌachjiso ko tsingakjinnta na̱ ngajin ni tituanꞌan niꞌngo ko tsikaannta na̱ ngajin xi tetuanꞌan, kondanaxin janꞌan. 13 Ko kain jiꞌi sintaꞌanta na̱, ko jaña jaꞌanta chao xrondachronta ixi titikaonntana janꞌan. 14 Lc. 12:11, 12.*Jaꞌanta taꞌinta juachjaon ko xraxaonꞌanta xranchi tsjatingíexinnta ti ngeꞌe tsjanchangiꞌanta na̱. 15 Ixi janꞌan xrontatjunta ngeꞌe tsjateꞌenta, chijni jian tsayeꞌenta, ko ninaa ni ningakonꞌannta juaꞌi tsjatingíexin na̱. 16 Ko kaxon ndotánta, janáanta o̱ xi kichuunta o̱ ngixeꞌi inaa ni ndointa, tsajon na̱ juachaxin naatsóñaxónnta na̱. 17 Ko kain ngisen xroningakonꞌannta ixi titikaonntana. 18 Ko maski jaña tsonꞌen, ninaa xrajaanta tsitjáñaꞌi. 19 Soji tinteenta, meꞌe jaña tsjachanta tsaricho̱nnta kain nchakon.

20 ’Ko nchakon tsikonnta ixi tjajna Jerusalén tsixindajin xi soldado, jaꞌanta tsonoꞌanta ixi íseꞌa xrochjejin nchijíi tjajna meꞌe. 21 Tjumeꞌe ni jii nunte Judea xrokonda tsingana satsji na̱ ngataꞌa jna̱. Ko ni ste tjajna Jerusalén kaxon xrokonda satsjixin na̱ ntiꞌa ko ni ste ngataon ijngi íxrokjanꞌi na̱ tjajna. 22 Ixi kain nchakon meꞌe tsango tsikaon ni titikaonꞌa, ko ijié juachjaon tsakeꞌe, xranchi jitaxin xroon chijnie ndo Dio. 23 ¡Lastu kain nchri jiá ichjan nchakon meꞌe, ko nchri chónda ichjan stetaki! Ixi tsango ijié juachjaon tsakeꞌe nchijíi ngataꞌa nunte, ixi tsango tsikaon ko tangi tsonꞌen ni tjajna meꞌe. 24 Ko kaxin sen tsóñaxin na̱ sen ixi chika espada ko kaxin sen xrotsé na̱ sen satsikao na̱ sen ndoꞌachjiso inaa tjajna. Ko ni chúxinꞌa ndo Dio tsingatjangi na̱ tjajnée ndo, tjajna Jerusalén, tsitjaja nchakon xrokjan chjenꞌen ndo Dio.

25 Ap. 6:12, 13.*’Tjumeꞌe tsonoxin ngeꞌe tsonꞌen chjiixro ko nchanitjao ko nchanotsé. Ko ngataꞌa nunte xasintajni*xasintajni mundo kain tjajna tsaa na̱ juachjaon, ko xroxranka na̱ ixi tsanga tsontengi ko xroxruin ndachaon. 26 Tsango xroxronka na̱ ko tsontiyeꞌe na̱ kondeexin xraxaon na̱ ngeꞌe tsonꞌen ngataꞌa nunte, ko kaxon kondeexin kain ngeꞌe jii ngajní tsontengi. 27 Ap. 1:7.*Ko tjumeꞌe tsikon na̱ ndo Jesús, chjenꞌen ndo Dio, xjan jongíꞌe xranchi chujni, tsi̱i̱ ndo ngataꞌa naa itjui̱ ko tsikaꞌo ndo ijié juachaxin tsetuanꞌan ndo ko kaxon tsango ijié chjiixro tsikaꞌo ndo. 28 Ko nchakon xroxrangíxin tsonꞌen kain jiꞌi, takeꞌénta juaxruxin, ko tsikonnta ixi ndo Cristo ó kui̱i̱ ndo tsantsjen ndo ijie̱ chondanta.

29 Ko ndachro ndo Jesús inaa chijni:

―Tsjeꞌenta xranchi jii nta̱a̱ tajon itu higo ko ikaxin nta̱a̱. 30 Nchakon tsikonnta jixechji nta̱a̱, meꞌe noꞌanta ixi ó tsaxi sincheꞌe súa. 31 Jaña kaxon nchakon tsikonnta ixi tsaxi tsonꞌen ngajní kain jiꞌi, tsonoꞌanta ixi tuinxin tsi̱i̱ ti tsetuanꞌan ndo Dio ngataꞌa nunte.

32 ’Janꞌan nduaxin ntatjunta ixi saꞌó tsonꞌen kain jiꞌi, ko xratsenꞌa chujni jii jai ngataꞌa nunte. 33 Ngajní ko nunte xasintajni tsatsinga, ko ti nichja janꞌan tsatsingaꞌi, nduaxin tsonꞌen.

34 ’Tsjeꞌenta xranchi takeꞌénta; xraxaonꞌanta ixi jeꞌo xrotjaunna sintenta, xrokoannta ko ti ícha tajon juaxruxin ngataꞌa nunte ntiꞌi ko ixi kondeexin meꞌe tsonoaꞌinta ó kui̱i̱ nchakon tsjiꞌi. 35 Ixi nchakon meꞌe tsonꞌen xranchi takeꞌe naa nochaꞌa itsé kulano, jaña tsonꞌen ngajin kain ni ste ngataꞌa nunte. 36 Méxin tsejuaꞌi asáanta, ko jian tantjeꞌe ikonnta, ko kain nchakon nichjeꞌenta ndo Dio ixi jaña chao tsatsinganta juachjaon tsi̱i̱, ko jaña chao tsonchjiñeꞌenta ngajin chjenꞌen ndo Dio, xjan jongíꞌe xranchi chujni.

37 Lc. 19:47.*Taanchakon ndo Jesús banchekuenꞌen ndo na̱ chijnie ndo Dio ngaxinꞌin niꞌngo ko tiie bakituꞌe ndo ti ijna̱ ndatinꞌin Olivo. 38 Ko kain ni tjajna, ndúyo bakonchjiñeꞌe na̱ ti jii niꞌngo ixi tjaun na̱ tsinꞌen na̱ ti ndachro ndo Jesús.