1 Lc. 5:1-3.*Tjumeꞌe ndo Jesús íjngo juangíxin ndo juinchekuenꞌen ndo na̱ ngandeꞌe ndalago. Ko ntiꞌa xraꞌo itsjé chujni ti jii ndo. Ko jeꞌe ndo kuixinꞌin ndo naa nta̱barco jitaꞌa inda, ko ntiꞌa bakeꞌe ndo nunte. Ko kain na̱ kuituꞌe na̱ ngandeꞌe inda. 2 Ko itsjé ngeꞌe juinchekuenꞌen ndo na̱. Ko ndachro ndo:

3 ―Tinꞌennta jiꞌi: Naa xi kuikenga tse̱e̱, 4 ko kaxin tse̱e̱ kuenga xa kuitsinga tse̱e̱ ngandeꞌe chaꞌo. Ko kui̱i̱ kuxe juine ba tse̱e̱. 5 Ikaxin tse̱e̱ kuitsinga tse̱e̱ ti jii kueya ixro, ti koꞌa itsjé inche, ko taka kuachrje ika ixi tjínꞌa inche, 6 ko nchakon kuachrje chjiixro ichján ka ko xema ka ixi yasoeꞌa jii nueꞌe ka. 7 Ko kaxin tse̱e̱ kuitsinga tse̱e̱ ti jii nta̱chaꞌa. Ko nta̱chaꞌa ícha kuangi nta̱a̱. Meꞌe xrabaatja ka ko ndakuangiꞌa ka. 8 Ko ícha tse̱e̱ kuitsinga ngataꞌa inche jian, meꞌe tse̱e̱ chaxro kuangi ka. Ko tsango kueya tse̱e̱ kuajon ika meꞌe; naa kuajon ikánte tse̱e̱, ko inaa ka kuajon níikán tse̱e̱, ko inaa kuajon naa ciento tse̱e̱.

9 Ko ndachro ndo Jesús:

―Ngisen tjaun tsinꞌen, tsinꞌen sen jian.

10 Ko nchakon kuituꞌe ndo Jesús jeꞌo ndo, sen ste tjenka ndo ko sen teyuu chrikao ndo juanchangiꞌe sen ndo ngeꞌe xrondachro ngeꞌe beki ndo. 11 Ko jeꞌe ndo Jesús ndachro ndo:

―Ndotána tjaun ndo tsienxinnta ti noaꞌinta ti tetuanꞌan jeꞌe ndo. Ko ni kaxin tsekiexinni na̱ xranchi tekini naa chijni, 12 ixi maski tikon na̱ ko tinꞌen na̱ ko jaña tsienxinꞌa na̱ ixi tsindoxinꞌa na̱ ti ndakoꞌa ncheꞌe na̱, xrokjanꞌi na̱ ngajin ndo Dio ko jaña jeꞌe ndo tsantsjeꞌa ndo ijie̱ chónda na̱.

13 Ko tjumeꞌe ndache ndo sen:

―¿Á tienxinꞌanta xranchi xrondachro ngeꞌe bekiꞌanta? Siá naꞌi, ¿xranchi tsienxinnta ikaxin ngeꞌe tsekiꞌanta? 14 Sen kuikenga tse̱e̱ meꞌe jii xranchi naa ngisen juinchekueꞌenni chijnie ndo Dio. 15 Ko kaxin sen meꞌe xranchi tse̱e̱ kuitsinga ngandeꞌe chaꞌo, ixi kuinꞌen sen chijnie ndo Dio, ko tjumeꞌe kui̱i̱ Xixronꞌanxrée ko nchetjáñajin xa sen. 16 Ikaxin tse̱e̱ kuitsinga ti jii ixro, meꞌe sen kuinꞌen chijnie ndo Dio ko juaxruxin bakeꞌe sen, 17 ko séꞌa kuitikaon sen ixi kui̱i̱ juachjaon ngataꞌa sen ko koñaoꞌe na̱ sen ixi kuitikaon sen chijnie ndo Dio, méxin kuintuꞌe sen ti kuitikaon sen ndo. 18 Ko tse̱e̱ kuitsinga ngakjenꞌen nta̱chaꞌa meꞌe sen tinꞌen chijnie ndo Dio, 19 ko ícha ncheꞌe sen tjée sen tomi ko ícha ruéꞌe sen ti jii juaxruxin. Kain jiꞌi tingakonꞌen ixi tsinꞌen sen chijnie ndo Dio, ko ncheꞌa sen ti tjaun ndo. 20 Ko tse̱e̱ kuitsinga ti jii inche jian, sen meꞌe tayéꞌe sen chijnie ndo Dio ko titikaon sen kain ti ndachro ndo ko jian ncheꞌe sen ngajin ndo Dio. Sen meꞌe ste sen xranchi tse̱e̱ kuajon ikánte tse̱e̱, ko ikaxin sen xranchi tse̱e̱ kuajon níikán tse̱e̱, ko ikaxin sen xranchi tse̱e̱ kuajon naa ciento tse̱e̱.

21 Mt. 5:15; Lc. 11:33.*Ko kaxon ndachro ndo Jesús:

―¿Á xrochóndani naa xroꞌi ko xroꞌi meꞌe á tsemáni xroꞌi ngangi naa ntacajón o̱ tsakeꞌeni xroꞌi ngangi naa nta̱a̱ tejuataꞌani? Naꞌi, jeꞌa meꞌe sincheꞌeni. Xrokonda nui tsakeꞌeni xroꞌi meꞌe ixi chao tsingasáña xroꞌi. 22 Mt. 10:26; Lc. 12:2.*Méxin, xroꞌan ngeꞌe ti jimá tsonoxinꞌa ko xroꞌan ngeꞌe imao tsonoeꞌa na̱ xrojan nchakon ixi kain ngeꞌe tsonoxin ixi xroꞌi. 23 Ko ngisen tjaun tsinꞌen, tsinꞌen sen jian.

24 Mt. 7:2; Lc. 6:38.*Ko kaxon ndachro ndo:

―Méxin, jaꞌanta tinꞌennta jian. Xranchi jaꞌanta tájonnta ngeꞌe ngajin ikaxin na̱, jaña ndo Dio xrotjáanta ndo kaxon, ko ícha itsjé xrotjáanta ndo. 25 Mt. 13:12; 25:29; Lc. 19:26.*Ni itsjé chónda, ndo Dio tsingijna ndo xrochónda na̱ ícha. Ko ni xroꞌan ngeꞌe chónda, ndo Dio tsantsjeꞌe ndo na̱ ti ngeꞌe chónda na̱.

26 Ko kaxon ndachro ndo Jesús:

―Ti juachaxin tetuanxin ndo Dio jii xranchi naa ngisen tikenga nunte. 27 Ko maski tejua sen ko taya sen ko tatsinga kaxin nchakon ko kaxin tiie, tse̱e̱ kuenga sen tachrje tse̱e̱ ko tangi tse̱e̱. Ko sen kuenga noeꞌa sen xranchi konꞌen jiꞌi. 28 Ixi inche jeꞌo nche juincheꞌe ixra̱. Saꞌó tachrje chaan no, ko tjumeꞌe ntée, ko tjumeꞌe ticha ko tóña tse̱e̱. 29 Ko nchakon ticha tse̱e̱ meꞌe xrokonda xrochrijin tse̱e̱.

30 Ko kaxon ndachro ndo Jesús:

―¿Ngeꞌe xrondachro ti juachaxin tetuanꞌan ndo Dio? 31 Naxreꞌo xranchi naa tse̱e̱ ndatinꞌin mostaza tsikenga naa xi jngiꞌe xa. Jiꞌi naa tse̱e̱ ícha nchíín ixi kain tse̱e̱ jii xasintajni. 32 Ko ti tsikinga tse̱e̱, tangi ka ko ikjan naa nta̱a̱ ícha ijié ixi ikaxin nta̱a̱ jii ngataꞌa nunte. Ko kaxon chaan nta̱a̱ tangi ícha noi, ko kuxe tjanga ba ko chao nchéña ba kakée ba chringi tsauen nta̱a̱.

33 Jaña ndo Jesús juinchekuenꞌen ndo kain na̱, ko beki ndo kueya ngeꞌe xranchi chao xrokuienxin na̱. 34 Ko kainxin ngeꞌe juinchekuenꞌen ndo na̱ beki ndo xranchi naa chijni. Ko juexin juinchekuenꞌen ndo na̱, tjumeꞌe ndache ndo sen teyuu chrikao ndo xranchi xrondachro kain ti beki ndo.

35 Ko nchakon meꞌe ó kóndo ndache ndo Jesús sen teyuu chrikao ndo:

―Tsatsingatuꞌena ndalago.

36 Ko tjumeꞌe kuintuꞌe sen kain ni ste ntiꞌa ko sabikao sen ndo Jesús ngaxinꞌin nta̱barco ko kaxon ikaxin nta̱barco sakjui nta̱a̱. 37 Ko tuinxin kui̱i̱ naa chrinto soji ko tsango juinchetengi inda ko nta̱barco kuaxi bikia nta̱a̱ inda ko kuaxi konuntengi nta̱barco. 38 Ko ndo Jesús ndakuejua ndo ícha ndáꞌa ngaxinꞌin nta̱barco ko jikjón ndo naa noxra. Ko juinchexingameꞌe sen ndo, ko ndachro sen:

―¡Maestro! ¿Á taꞌinta juachjaon ixi xrokjuina inda?

39 Ko jeꞌe ndo bingatjen ndo, ko kuyakutee ndo chrinto ko inda ko ndachro ndo:

―Tenkua ko ndatakeꞌe.

Ko tuinxin jeꞌe inda ndabakeꞌe inda ko chrinto kaxon. 40 Ko ndache ndo jeꞌe sen:

―¿Sonda xrakonnta? ¿Á xrachuntiaꞌantana janꞌan?

41 Ko jeꞌe sen xronka sen ko ndache kichuu sen:

―¿Ngixeꞌi xi jiꞌin ixi tituenꞌen xa chrinto soji ko inda ko kayui titikaon ngajin xa?