7
Ngeꞌe ncheki̱tja̱ aséen chujni
(Mt. 15:1-20)
1 Tjumeꞌe kaxin ni fariseo ko kaxin ni bajako chijnie ndo Dio kui̱xi̱n na̱ tjajna Jerusalén konchjiñeꞌe na̱ ti jii ndo Jesús. 2 Jeꞌe na̱ bikon na̱ ixi kaxin sen chrikao ndo Jesús junémaꞌi itja sen, jañao juine sen, méxin kuaxi na̱ juankataꞌa na̱ sen ijie̱. 3 (Ixi xi fariseo ko kain ni judío kuanéma tja na̱ xranchi kuancheꞌe ni tachríꞌe na̱, ni xranchrjen, ixi saꞌó banéma na̱ itja na̱ ko tjumeꞌe ine na̱. 4 Ko hora kjanxin na̱ ndasin, saꞌó xrokonda néma na̱ itja na̱ ko tjumeꞌe sine na̱. Ko kaxon banéma na̱ vaso ko ichi ko cazuela chika ko kuajontaꞌa na̱ cama, jaña kuancheꞌe na̱ ko kaxon ikaxin ngeꞌe ixi jaña kuituanꞌan ni tachríꞌe na̱ xranchrjen.) 5 Méxin, xi fariseo ko xi tjako chijnie ndo Dio jaꞌin juanchangiꞌe xa ndo Jesús:
―¿Sonda sen chrjikoꞌa ncheꞌa sen ngeꞌe kuancheꞌe sen tachríꞌina xranchrjen ó saꞌó? Sen chrjikoꞌa jaꞌa, némaꞌi sen itja sen hora ine sen.
6 Ko juatingíexin ndo Jesús ko ndachro ndo:
―Nduaxin ti tsindachro ndo profeta Isaías ixi jaꞌanta ndakoꞌa xraxaonnta, ko jaꞌin ndachro xroon tsikjin ndo:
Ni tjajna jiꞌi jeꞌo roꞌa na̱ nichjanaxin na̱ ngajin,
jeꞌa nduaxin ixi aséen na̱ xraxaon na̱.
7 Méxin, xroꞌan tjintee juasaya*juasaya respeto, honor tajon na̱ ngajin,
ixi jeꞌo tjako na̱ ngeꞌe tetuanꞌan chujni.
8 Ko jaꞌanta tsikintuꞌenta ngeꞌe tsiketuanꞌan ndo Dio ko rueꞌénta ngeꞌe kuancheꞌe na̱, méxin néꞌmanta ichi, ko vaso ti̱ꞌxi̱nnta, ko kaxon ikaxin ngeꞌe ncheꞌenta.
9 Ko kaxon ndachro ndo Jesús:
―Jaꞌanta rueꞌénta ngeꞌe kuancheꞌe na̱ ko jaña ndáꞌa tintuꞌenta ngeꞌe tsiketuanꞌan ndo Dio. 10 Ndachro chijnie ndo Dio tsikjin ndo Moisés: “Xrochondeꞌenta juasaya ndotánta ko janáanta”, ko kaxon tsindachro ndo “Ngisen ndakoꞌa nichja ngajin ndotée o̱ janée xrokonda tsenꞌen sen.” 11 Ko jaꞌanta ndachenta chujni ixi chao xrondache na̱ ndotée na̱ ko janée na̱: “Ndotána, janáana, juaꞌi tsingijnananta ixi kain ngeꞌe chondana meꞌe kóña corbán”, (meꞌe xrondachro ixi kain tomina ó tjáꞌa ndo Dio). 12 Ko siá xrondachronta jaña, jaꞌanta ndachronta xrokondaꞌi tsingijnanta ndotánta o̱ janáanta. 13 Ko jaña titikaonꞌanta ngeꞌe tsiketuanꞌan ndo Dio ko jaꞌanta titikaonnta ngeꞌe kuancheꞌe na̱ saꞌó. Ko kaxon ncheꞌenta ikaxin ngeꞌe ndakoꞌa.
14 Ko íjngo kuiyeꞌe ndo Jesús chujni ste ntiꞌa, ko ndachro ndo:
―Tinꞌennta kainnta ti ntatjunta ko tienxinnta jiꞌi. 15 Jeꞌa ti ineni ncheki̱tja̱ aséenni. Ti tachrjexin aséenni meꞌe ncheki̱tja̱ni. 16 Ti tjaunnta tsinꞌennta, tinꞌennta.
17 Ko ndo Jesús kuintuꞌe ndo kain na̱, ko jeꞌe ndo ko sen teyuu chrikao ndo kuixinꞌin sen nchia. Ko juanchangiꞌe sen ndo ngeꞌe xrondachro ti juinchekuenꞌen ndo na̱. 18 Ko ndachro ndo Jesús:
―¿Á kaxon jaꞌanta tienxinꞌanta? ¿Á noaꞌinta ixi ti ngeꞌe ineni jeꞌa meꞌe ncheki̱tja̱ aséenni? 19 Ixi ti ineni tjiꞌa ngaya aséenni. Meꞌe satsji ngaya tse̱ꞌe̱ni ko tjumeꞌe tachrje.
Meꞌe xrondachro ixi ti ngeꞌe ineni, ncheki̱tja̱ꞌi aséenni.
20 Ko ndachro ndo Jesús:
―Ko ti ngeꞌe tachrjenixin aséen chujni meꞌe ncheki̱tja̱ aséen. 21 Kain jiꞌi tachrjenixin aséen chujni: ti ndakoꞌa xraxaon na̱, ti chónda na̱ inaa ngisen jeꞌa janchriꞌe na̱ o̱ ndoxiꞌe na̱, ti tjaun na̱ tsitexin na̱ inaa ngisen, ti naatsóñaxón kichuu na̱, 22 ti te̱e na̱, ti tochjuyeꞌe na̱ ngeꞌe chónda inaa chujni, ti ndakoꞌa nchekao kichuu na̱, ti ncheya na̱, ti tsango chjinga ncheꞌe na̱, ti tochjio na̱, ti nchejié aséen na̱, ko ti ndakuaꞌi xraxaon na̱. 23 Kain ti ndakoꞌa meꞌe tachrjenixin ngaya aséen na̱, ko meꞌe ti ncheki̱tja̱ aséen chujni.
Naa nchri kui̱xi̱n ikjín chuntia†chuntia tener fe nchra ndo Jesús
(Mt. 15:21-28)
24 Ko tjumeꞌe ndo Jesús kuachrjexin ndo ntiꞌa ko sakjui ndo nunte tjajna Tiro ko tjajna Sidón. Ko kuixinꞌin ndo naa nchia ixi tjaunꞌa ndo xrokonoꞌe na̱ ixi ntiꞌa jii ndo. Ko juaꞌi kuemá ndo. 25 Ko tjumeꞌe janée naa nchrichajan, chónda nchrichan espíritue Xixronꞌanxrée kuinꞌen jan ixi ntiꞌa jii ndo Jesús, ko tuinxin kuiji jan ko bakeꞌexin jan ntatuchiꞌin jan tutée ndo Jesús. 26 Jan meꞌe ikjín kui̱xi̱n jan, nunte Sirofenicia, ko kuinóatée jan ngajin ndo Jesús ixi xrokuantsje ndo espíritue Xixronꞌanxrée chónda nchrichajenꞌen jan. 27 Ko ndo Jesús ndachro ndo:
―Saꞌó tintuꞌenta ichjan sine xjan. Ndakoꞌa jii xrokuantsjeꞌeni xjan nutja ko xrochjéeni kunia sine ba.
28 Ko jeꞌe jan juatingíexin jan:
―Nduaxin meꞌe, Nchána. Ko kunia jingi ba mesa ine ba nutja tituꞌo ti tintjí ichjan.
29 Ko ndachro ndo Jesús:
―Chao ndachrua. Satjia ixi espíritue Xixronꞌanxrée ó kuachrjexin nchrichajanꞌan.
30 Ko hora kuiji jan ndoꞌa jan, bikon jan ixi nchrichajenꞌen jan ó jian jitsingataꞌa xjan ti jijua xjan ixi ó tsikachrje espíritue Xixronꞌanxrée.
Ndo Jesús juinchexruenꞌen ndo naa xi tienꞌa ko nichjaꞌi
31 Ko tjumeꞌe ndo Jesús kuachrjexin ndo tjajna Tiro ko kuatsinga ndo tjajna Sidón ko kaxin tjajna tikinixin nunte Decápolis ko kuiji ndo ti ndalago Galilea. 32 Ko ntiꞌa bikao na̱ naa xi tienꞌa ko juaꞌi nichja xa. Ko kuinóatée na̱ ngajin ndo Jesús ixi tsakeꞌe itja ndo ngataꞌa jaa xa meꞌe tsoxruenꞌen xa. 33 Ko tjumeꞌe ndo Jesús kuachrjendakaꞌo ndo jeꞌe xi tienꞌa ti xroꞌan ngisen ste. Ko dedue itja ndo Jesús xraxinꞌin ndo ndatsjon xi tienꞌa. Ko kaxon dedue itja ndo bikitée ndo ndatée ndo ko bakeꞌe ndo dedue ngataꞌa nejen xi nichjaꞌi. 34 Ko tjumeꞌe tsjeꞌe ndo nui ngajní ko kuabaa ndo ko nichjeꞌe ndo xi tienꞌa, ko ndachro ndo:
―¡Efata! ―meꞌe ngigueꞌe sen xrondachro: ¡Xitjeꞌe̱!
35 Ko tuinxin xitjeꞌe̱ ndatsjon xi tienꞌa ko kuinꞌen xa ko koxruenꞌen nejen xa, ko jian nichja xa. 36 Ko ndo Jesús kuetuanꞌan ndo ixi xroꞌan ngisen xrobeꞌki ngeꞌe ti konꞌen. Ko maski jaña kuetuanꞌan ndo, jeꞌe na̱ ícha beki na̱. 37 Ko meꞌe tsango xronka kain na̱ ko ndachro na̱:
―Tsango jian kain ngeꞌe ncheꞌe ndo. Ni tienꞌa, tinꞌen na̱ ko ni nichjaꞌi, nichja na̱.