7
Sen israelita chónda sello
1 Tjumeꞌe biko̱n noó sen ángel stexin tutée sen, ngujngu sen stetsjeꞌe sen ngujngu ti noó lado chónda nunte xasintajni: kuꞌe, níjin, retuya ko chjuya, sen meꞌe stetingakonꞌen sen chrinto ixi tsonchikauꞌa chrinto ngataꞌa inche, ngataꞌa ndachaon ko ngataꞌa nta̱a̱ yua. 2 Ko kaxon bikon inaa ndo ángel kui̱xi̱n chjuya ko chónda ndo sellue ndo Dio, ndo jichón kain nchakon. Ko ndo ángel meꞌe séen kuyako ndo ngajin ti noó ángel kuayéꞌe juachaxin sincheniꞌe nunte xasintajni ko ndachaon,*ndachaon mar 3 ko ndachro ndo:
―Ncheníeꞌanta inche, ndachaon, ko nta̱a̱ yua, tsjexinja tsakéena sello ntatjen sen ncheꞌe ixra̱ ngajin ndo Dio.
4 Ko kui̱nꞌa̱n ngijanꞌin sen tsikaa sello, ko sen meꞌe ciento yuu ikán ko no mil, sen tsikachrjenixin ndo Israel. 5 Teyuu mil sen tsikaa sello tsikachrjenixin ndo Judá ko teyuu mil sen tsikachrjenixin ndo Rubén ko teyuu mil sen tsikachrjenixin ndo Gad, 6 teyuu mil sen tsikachrjenixin ndo Aser, teyuu mil sen tsikachrjenixin ndo Neftalí ko teyuu mil sen tsikachrjenixin ndo Manasés, 7 teyuu mil sen tsikachrjenixin ndo Simeón ko teyuu mil sen tsikachrjenixin ndo Leví ko teyuu mil sen tsikachrjenixin ndo Isacar 8 ko teyuu mil sen tsikachrjenixin ndo Zabulón ko teyuu mil sen tsikachrjenixin ndo José ko teyuu mil sen tsikachrjenixin ndo Benjamín. Kain sen jiꞌi tikinixin sen tjajnée ndo Dio ko kuayéꞌe sen sellue ndo.
Kueya chujni steyá manta tjúá
9 Tjumeꞌe bikon kueya chujni tikinixinꞌen nchijíi nunte xasintajni, ko xroꞌan ngisen chao tseki ngijanꞌin sen meꞌe. Kainko tjajna ndoa ko kain tjajna nchínchín, kain ngigua stexin sen tutée sen tjenka trono ko ngajin Xjantuchjon†Xjantuchjon Cordero de Dio; Jesús ko steyá sen manta tjúá ko ngaya itja sen stetsé sen kajne. 10 Ko kain sen séen stetoyako sen ko ndachro sen:
Ndo Dio chónda jai̱na,
ndo jitaꞌa ngataꞌa trono
ko kaxon Xjantuchjon,
kuajon sen juachaxin tsechónna kain nchakon.
11 Kain sen ángel stexin sen tutée sen ngandajin trono ko ngandajin sen tachríi ko ti noó sen stechón bakeꞌexin ntatuchiꞌin sen ko kuisée sen ngataꞌa inche ngajin trono ko kuajon sen juasaya ngajin ndo Dio 12 ko ndachro sen:
Jaña tsonꞌen.
Tsajonna juasaya ngajin ndo Dio
ixi tsango noꞌe ndo ko tsango tetuanꞌan ndo
ko tikinixin tsajonna juasiai̱na ngajin ndo.
Ixi tikinixin xrochondeꞌena ndo juasaya ixi tsango chónda ndo juachaxin
ko tsango tituanꞌan ndo,
jaña sintuꞌuna kain nchakon. Jaña tsonꞌen.
13 Tjumeꞌe naa sen tachríi juanchangina ko ndachro sen:
―Sen steyá manta tjúá, ¿ngisen ña̱?, ko, ¿tinó kui̱ꞌxi̱n sen?
14 Mt. 24:21; Mr. 13:19.*Ko janꞌan juataꞌa:
―Nchána, jaꞌanta noꞌanta.
Ko jeꞌe ndo ndachro ndo:
―Sen jiꞌi tsiki̱ꞌxi̱n sen ti jii juachjaon ko tsango tangi kuatsinga sen, sen tsikijmáxin mantée ko tsikotjúáxin aséen sen ixi jnié Xjantuchjon. 15 Méxin jai ste sen tjenka trono neꞌe ndo Dio, ko tiie, nchakon stencheꞌe sen ixra̱ ngaxinꞌin ningue ndo ko jeꞌe ndo tayakonꞌen ndo sen ko xroꞌan ngeꞌe tsintekonꞌen sen. 16 Ko jeꞌe sen ítsenꞌa sen jinta ko tsenꞌa sen inda ko xrochjánꞌi sen ixi sué nchakon, ko chjiixro sinchechjánꞌi sen kaxon. 17 Ko Xjantuchjon jii ngusine trono tayakonꞌen ndo sen xranchi xrokjui kutuchjoen ndo, ko tsajikao ndo sen ti no jitinga inda tajon juachaxin tsechón chujni ko ndo Dio sinchexémá ndo ndakon sen.