1 Tjumeꞌe ti naoxin ndo ángel kuanoa ndo itjao*itjao Trompeta chónda ndo ko janꞌan bikon naa nchanotsé kuitsingaxin ngajní ngataꞌa nunte xasintajni ko nchanotsé meꞌe kuayéꞌe chika xitjeexin tuye yasoꞌe ko naxixeꞌe. 2 Ko nchanotsé meꞌe kuantjeꞌe tuye yasoꞌe ko kuachrje iꞌnchi xranchi iꞌnchi tachrjexin naa itja̱ ko iꞌnchi meꞌe juinchekonaxixeꞌe chjiixro ko chrinto. 3 Ko kuachrjexin iꞌnchi meꞌe kuchjua ko kain ba bingó ba ngataꞌa nunte ko kuayéꞌe ba juachaxin xranchi juachaxin chónda kulantajoon jii nunte xasintajni. 4 Kuetuenꞌen ba ixi sincheníeꞌa ba kayua jii nunte xasintajni ko ninaa ngeꞌe yua ko ninaa nta̱yua. Jeꞌo sincheniꞌe ba ni chóndaꞌi sellue ndo Dio ntatjen na̱. 5 Ko kuayéꞌa ba juachaxin naatsóñaxón ba chujni. Jeꞌo sincheniꞌe ba na̱ naꞌó nchanitjao, ko ti tsoniꞌe na̱ meꞌe xranchi tsoniꞌe ni tsijineꞌe naa kulantajoon. 6 Nchakon meꞌe chujni tsijineꞌe ba, xrojueñao na̱ xrokuenꞌen na̱ ko juaꞌi tsenꞌen na̱ ixi ti tsenꞌen chujni satsingeꞌe na̱.

7 Ko kuchjua meꞌe ste ba xranchi kunxin tikao na̱ nchakon te̱ꞌto̱ na̱, ko ngataꞌa jaa ba chónda ba xranchi naa corona chika oro ko ikon ba tikonni xranchi ikon chujni. 8 Chónda ba xrajaa ba xranchi xrajaa naa nchri, ko neno ba xranchi neno kujenda. 9 Ko jeꞌe ba chónda ba naa chika tingakuenxin ixi xroꞌan ngeꞌe tsonꞌen ba. Ko ti xroin neneꞌe ba tinꞌenni xranchi xroin itsjé carreta tingakjin itsjé kunxin nchakon itji na̱ tinteke̱ꞌto̱ na̱. 10 Ko ntanée ba chónda ba cháꞌa xranchi chónda kulantajoon ko ixi ché ba sincheniꞌe ba chujni nguixin naꞌó nchanitjao. 11 Ko xi tetuenꞌen kuchjua meꞌe naa ángel tikinixinꞌen tuye yasoꞌe ko naxixeꞌe. Ángel meꞌe ngigua hebreo ndatinꞌin Abadón ko ngigua griego ndatinꞌin Apolión ko jiꞌi xrondachro sinchetjáña kain ngeꞌe.

12 Ko meꞌe juachjaon saꞌó kuatsinga ko xratitjáña íjngo yuu juachjaon ijié.

13 Ko ti ikjaon ndo ángel kuanoa ndo itjao chónda ndo ko kui̱nꞌa̱n naa tée sen nichja kuachrjexin ngusine ti noó nteꞌe altar chika oro ti jii ndo Dio. 14 Ko ti tée sen nichja meꞌe ndache ti ikjaon ángel kuanoa itjao chónda ndo:

―Toxindangeꞌe ti noó sen ángel jixriteꞌe ngandeꞌe inda jitinga tsango ijié ndatinꞌin Eufrates.

15 Ko xindangeꞌe ti noó sen ángel ixi naatsóñaxón sen ti nínxin parte chujni jii nunte xasintajni ixi ndo Dio jaña juinchekonchjian ndo sen ixi sincheꞌe sen ngeꞌe kuetuenꞌen sen hora, nchakon, nchanitjao ko nano meꞌe. 16 Ko kui̱nꞌa̱n ngijanꞌin ni soldado jitaꞌa kunxinꞌe na̱, ni tse̱ꞌto̱, meꞌe doscientos millones ni meꞌe.

17 Ko jaña bikon konoxin itsjé kunxin ko ni stetaꞌa ba chónda na̱ naa chika ntakuin na̱ tingakuenxin ixi xroꞌan ngeꞌe tsonꞌen na̱, chika meꞌe játse chika ko yua xranchi ngajní ko sine. Ko jaa kunxin tikonni xranchi jaa kujenda ko roꞌa ba tachrjexin iꞌnchi ko xroꞌi ko azufre. 18 Ko ti nínxin parte chujni kuintekenꞌen na̱ ixi kaníi ngeꞌe kuachrjexin roꞌa kunxin meꞌe xroꞌi, iꞌnchi ko azufre. 19 Ko juachaxin chónda kunxin meꞌe tachrjexin roꞌa ba ko ntanée ba. Ko ntanée ba jii xranchi kunchee chónda jaa meꞌe sincheníexin ba chujni.

20 Ko chujni kuenxinꞌa ixi iꞌnchi, xroꞌi ko azufre, ni meꞌe kuintueꞌa na̱ juincheꞌe na̱ ti ndakoꞌa ko kuintueꞌa na̱ kuajon na̱ juasaya ngajin Xixronꞌanxrée ko tsango jueñao na̱ ídolo tsikóñaxin chika oro, chika plata, chika bronce, ixro ko nta̱a̱, ídolo meꞌe juaꞌi tikon, tienꞌa ko chrjiꞌa. 21 Ko ni meꞌe kaxon kuintueꞌa na̱ ti ndakoꞌa kuancheꞌe na̱, ti naabakóñaxón na̱ chujni ko kuintueꞌa na̱ kuitikaon na̱ ichin tuso ko ti chónda na̱ inaa nchri jeꞌa janchriꞌe na̱ ko ti teꞌe kichuu na̱.