1 Ap. 7:3.*Tjumeꞌe janꞌan bikon Xjantuchjon jixin tutée xjan ngataꞌa ijna̱ Sión. Ntiꞌa jikao ndo ciento cuarenta y cuatro mil chujni jitaxin ntatjen sen nombrée Xjantuchjon ko nombrée Ndotée ndo. 2 Ko kui̱nꞌa̱n naa ngisen nichja, tée sen kui̱xi̱n ngajní, tinꞌenni xranchi xroin yee inda jitinga o̱ xranchi séen tjateé, ko xranchi tinꞌenni ti ste kueya sen, sen stetinga sen arpa. 3 Ko stetsje̱ sen naa soon natjúá tjenka trono, ti ste noó sen jichón ko sen ikán ko no tachríi. Xroꞌan ngisen chónda juachaxin chao xrotsje̱ soon meꞌe; jeꞌo sen ciento cuarenta y cuatro mil, sen tsikayéꞌe juachaxin tsechón kain nchakon ti xrabakeꞌe sen nunte xasintajni. 4 Sen jiꞌi ó kuachóndaꞌi sen inaa nchri jeꞌa janchriꞌe sen ko tsango tjúá aséen sen, ko kuarueꞌe sen Xjantuchjon nguixin ti no bakaji ndo. Sen jiꞌi kuincheꞌe ndo Dio sen xranchi naa ngeꞌe saꞌó xrokuayéꞌe ndo ko Xjantuchjon. 5 Jeꞌe sen naiꞌa juincheya sen ko xroꞌan ngeꞌe ti ndakoꞌa juincheꞌe sen, jeꞌe sen tjúá aséen sen.

6 Tjumeꞌe bikon inaa ndo ángel jitjanga ngusine ngajní jichrónga ndo chijni jian, chijni naiꞌa tsjexin, ti tsinꞌen kain ni nunte xasintajni ko tsinꞌen kain nación, kain chujni, kain ngigua ko kain tjajna. 7 Ndo ángel meꞌe séen kuyako ndo ko ndachro ndo:

―Xrakuenꞌanta ndo Dio ko tájonnta juasaya ngajin ndo ixi ó kui̱i̱ nchakon sinchéña ndo ijie̱. Tájonnta juasaya*juasaya respeto, honor ngajin ndo, ndo juinchéña ngajní ko nunte xasintajni ko ndachaon ko no jitonoxixin inda.

8 Ap. 18:2.*Tjumeꞌe kui̱i̱ inaa ndo ángel, ko ndachro ndo:

―Ó kuitjáña, ó kuitjáña tjajna Babilonia, tjajna ijié. Ni tjajna meꞌe juinchekateya kain nación xrokuiꞌi na̱ vino, ko tjumeꞌe juincheꞌe na̱ kain ti ndakoꞌa, ti chónda na̱ inaa nchri jeꞌa janchriꞌe na̱.

9 Tjumeꞌe konoxin ndo ángel nínxin ko séen nichja ndo:

―Siá xrojan ngisen tsajon juasaya ngajin iku saꞌó tsango chjinga jii ko ngajin tjatuꞌo tsikachrjeya ba o̱ kaxon siá tsituexin na̱ tsayéꞌe na̱ chjiꞌe ba ntatjen na̱ o̱ itja na̱, 10 méxin tsayéꞌe na̱ kain juañaue ndo Dio ko tsango tangi tsonꞌen na̱. Tsikaonxin na̱ ngajinxin sen angéel ndo Dio ko ngajinxin Xjantuchjon ixi xroꞌi ko ixi azufre jiche. 11 Iꞌnchi tachrjexin xroꞌi naiꞌa tsjexin ꞌnchi. Kain nchakon tsajinꞌin iꞌnchi ko ni kuitikaon iku saꞌó tsango chjinga jii ko tjatuꞌo tsikachrjeya ba ko kaxon ni jitaxin ngataꞌa xranchi tinꞌin ba, tiie, nchakon juaꞌi tsjokéꞌe na̱. 12 Méxin nchakon tsi̱i̱ jiꞌi xrokonda sen titikaon ndo Dio tsikixinꞌen sen tsatsinga sen kain ti tangi, ko tsintueꞌa sen xrochuntia sen ndo ko tsitikaon sen ngeꞌe kuetuanꞌan ndo ko xrokonda tsjako sen ixi chuntia sen ndo Jesús.

13 Tjumeꞌe kui̱nꞌa̱n naa tée sen nichja kui̱xi̱n ngajní ko ndachro:

―Ikjian jiꞌi: “Jai xrangíxin juaxruxin tsakeꞌe sen titikaon Ncháina ko tsenꞌen sen.”

Jaán, ndachro Espíritue ndo Dio, ixi jeꞌe sen tsjokéꞌe sen, ísincheꞌa sen ixra̱ tangi kuancheꞌe sen ixi ndo Dio tsjengeꞌe ndo sen ꞌna̱ ixi ti jian ixra̱ juincheꞌe sen.

14 Tjumeꞌe bikon naa itjui̱ tjúá ko ntiꞌa jitaꞌa naa ndo jitsjeꞌe xranchi Chjenꞌen ndo Dio, xjan jongíꞌe xranchi chujni, ko naa corona chika oro jitaꞌa jaa ndo ko yaa ndo naa joso tsango yao. 15 Tjumeꞌe inaa ndo ángel kuachrjexin ndo niꞌngo ko séen nichjeꞌe ndo ngisen jitaꞌa itjui̱ ko ndachro ndo:

―Tjangíxian tonchrijian ixi joso ixi ó kui̱i̱ nchakon tsandáa ixi ó tsicha ngeꞌe tsikoña nunte xasintajni.

16 Ko ndo jitaꞌa itjui̱ juinchekatsinga ndo joso nguixin nunte xasintajni ko juáꞌka ndo ngeꞌe tsikoña.

17 Tjumeꞌe inaa ndo ángel kuachrjexin ndo niꞌngo jii ngajní ko kaxon tikao ndo naa joso tsango yao. 18 Ko ti altar kuachrjexin inaa ndo ángel, ndo meꞌe tetuanꞌan ndo xroꞌi ko séen ndache ndo ndo ángel chónda joso yao:

―Tonchrijian ixi joso yao itsjé tu uva tsikoña nunte xasintajni ixi ó tsichje itu.

19 Ko ndo ángel juinchekatsinga ndo joso ngataꞌa nunte ko konchrinjin ndo tu uva tsikoña nunte ko bengachjian ndo tu ti no tseeneni tu. Jiꞌi xrondachro, ndo Dio toñao ndo ngajin chujni. 20 Ap. 19:15.*Ko kuayáa na̱ tu uva ngandeꞌe tjajna ko ti no kuenexin na̱ tu kuachrjexin tsango yee ijni̱, kuiji ijni̱ noi ti jikaxin chika teya roꞌa kunxin ko níi ciento kilómetro binga ijni̱.