1 Kui̱nꞌa̱n naa tée sen nichja tsango séen kui̱xi̱n niꞌngo, ko ndache sen ya̱a̱to̱ ndo ángel:

―Itjinta ko tjintjinta ngataꞌa nunte xasintajni ti jitjiá ya̱a̱to̱ copa juañaue ndo Dio.

2 Tjumeꞌe ndo ángel saꞌó kui̱i̱ ndo ko kuintjí ndo ti jitjiá copee ndo ngataꞌa nunte xasintajni ko ngataꞌa kain chujni chónda chjiꞌe neꞌe iku tsango chjinga jii, ko ni bakajon juasaya ngajin ti tjatuꞌo tsikachrjeya ba, ko ti tjiá copa meꞌe naa ichin ñaꞌi ko tsango ixra̱ chin.

3 Ndo ángel yuxin ikjui ndo ko kuintjí ndo ti jitjiá copee ndo, ngataꞌa ndachaon ko ndachaon ikjan inda ijni̱, xranchi jnié naa ti tsikenꞌen ko kain ngeꞌe jichón ngangi ndachaon nda kuenꞌen.

4 Ko ndo ángel nínxin kuintjí ndo ti jitjiá copee ndo ngataꞌa ndajitinga ko ngataꞌa ti no jitonoxixin nda ko ikjan nda ijni̱. 5 Tjumeꞌe kui̱nꞌa̱n nichja ndo ángel tetuenꞌen inda ko ndachro ndo:

―Ndo Dio jian jaꞌanta. Ncháina tsango tjúá jaꞌanta, ndo Dio, ndo jichón saꞌó ko ndo jichón jai ko ndo jian nchéña ijie̱, 6 ixi ni ningakonꞌannta kóña na̱ sen kuachronga chijnianta ko sen tjúá aséen, méxin jai jaꞌanta tájonnta ijni̱ tsiꞌi na̱ ixi kondeexin ti ndakoꞌa juincheꞌe na̱.

7 Kaxon kui̱nꞌa̱n tée naa sen kui̱xi̱n altar ko nichja sen:

―Jaꞌanta nduaxin Ncháina, ndo Dio, jaꞌanta chondanta kain juachaxin ko jian ko ndako nchéñanta ijie̱.

8 Tjumeꞌe ndo ángel noóxin kuintjí ndo ngeꞌe jitjiá copee ndo ngataꞌa chjiixro, ko chjiixro kuayéꞌe juachaxin sinchechján kain chujni ixi xroꞌi. 9 Kain na̱ tsango ichján na̱ ko maski jaña kuintekonꞌen na̱, kuitikaonꞌa na̱ ndo Dio ko kuajonꞌa na̱ juasaya ngajin ndo; cháña nichjangíꞌe na̱ xranchi tinꞌin ndo, ndo chónda juachaxin ngataꞌa kain ichin meꞌe.

10 Tjumeꞌe ndo ángel naꞌóxin kuintjí ndo ti jitjiá copee ndo ngataꞌa trono neꞌe iku tsango chjinga jii. Tjumeꞌe ti no baketuanxin iku tsango chjinga jii, ntiꞌa konaxixeꞌe. Ko chujni juinetja na̱ nejen na̱ ixi tsango tiín na̱. 11 Ko ixi tsango tiín na̱ ko tsango tangi konꞌen na̱, ni meꞌe kuintueꞌa na̱ ti ndakoꞌa bancheꞌe na̱ ko ícha nichjangíꞌe na̱ ndo Dio, ndo jii ngajní.

12 Tjumeꞌe ndo ángel inkjaoxin kuintjí ndo ti jitjiá copee ndo ngataꞌa ndajitinga ijié ndatinꞌin Eufrates. Ko nda meꞌe xema inda ixi chao tsintekatsinga xi rey tsi̱ꞌxi̱n chjuya.

13 Ko bikon ixi roꞌa kudragón, roꞌa iku tsango chjinga jii ko roꞌa xi ndakoꞌa bajako kuachrjexin níi espíritu ñaꞌi tikonni xranchi kurrána. 14 Espíritu jiꞌi, espíritue Xixronꞌanxrée kuancheꞌe ixra̱ ijié. Kuintekachrje espíritu jiꞌi ixi tsjaꞌo kain xi rey ste nunte xasintajni ixi tse̱ꞌto̱ xa nchakon ndo Dio sinchéña ndo ijie̱ ngajin kain chujni, ni ste nunte xasintajni. 15 Mt. 24:43, 44; Lc. 12:39, 40; Ap. 3:3.*Méxin ndo Dio ndachro ndo: “Janꞌan ó tuinxin tsjiꞌi xranchi naa xicheꞌe. Juaxruxin tsintee sen tejuaꞌi ko steyá mantée sen ko jeꞌa turuchu ste sen, ixi jaña tsosueꞌa sen ixi turuchu ste sen.” 16 Ko espíritu ñaꞌi juaꞌo kain xi rey nunte ndatinꞌin Armagedón, ngigua Hebreo xrondachro jiꞌi.

17 Tjumeꞌe ya̱tu̱xi̱n ndo ángel kuintjí ngeꞌe jitjiá copee ndo ngataon chrinto, ko ngaxinꞌin niꞌngo jii ngajní kuinꞌenni naa tée sen nichja tsango séen ndachro:

―Ó juexin konꞌen kain ngeꞌe.

18 Ap. 8:5; 11:13, 19.*Ko kongíxin ko kuinꞌenni tsango séen juatee ko tsango kontengí nunte xranchi naiꞌa bikon chujni kontengí nunte. 19 Ti tsango soji kontengí nunte níi xitjeꞌe̱ inche tjajna Babilonia ko kain tjajna jié ste nunte xasintajni chjenjin tjajna. Ko ndo Dio xraxaon ndo ixi xrojuincheníꞌe ndo ni tjajna Babilonia ko tsango juincheniꞌe ndo na̱ ixi tsango koñao ndo ngajin na̱. 20 Ap. 6:14.*Ko kain nunte ste ngusine ndachaon ko ijna̱ naakuitjáñaxón. 21 Ap. 11:19.*Ko ngajní kuaniaxin tuni tsango ndantua, xranchi yuu kán kilo yexin ngujngu tuni. Ko chujni ícha nichjangíꞌe na̱ ndo Dio ixi jaña konꞌen, ixi xratja na̱ tuni.