3
Jè pâra wiâ Kériso, càcaa pwi jè âboro
1 Tèpa béeò naa na nee Kériso, guwà gére pwaduwà kà tèpa âboro gòropuu [na càra caa tâmogòori Kériso]! Êkaa na, na ia go tâa jaawà, â go patùrawà, pwacèwii pâ nari èpo. Ba càcaa cimwü ê cèikî kàwà naa gooé.
2 Hébéru 5.12–13; 1 Pétéru 2.2 [Na ia go pacâmuriwà, â] câgo caa naa tàwà ê utimuru cèna gòo, ba pwacoé na guwà ija. Go naa tàwà dilé, ba na guwà wâdo. Â bwaa nye ipaiwà tiagoro nabàni, 3 1 Korénito 1.10–11ba guwà nama dàtiwà ê pâ auniimiri kàwà na èpà. Â guwà piboo goowà, â guwà iputàmuriwà. Êkaa na go ina pâ, guwà ipwacèwii tèpa âboro gòropuu, [na càra caa tâmogòori Kériso]. 4 1 Korénito 1.12Ba wiàna guwà ina pâ: «Wâgo, âna go pâra wiâ Paulo» é, «Wâgo, âna go pâra wiâ Apollos», â guwà paari pâ, ipaiwàguwà ma tèpa âboro gòropuu.
Bu tupédu ênawéna co
5 Apostolo 18.4,11 Wàilàapà Apollos? Â wàilàapà Paulo? Bu nye po tupédu ênawéna co kà Pwiduée. Â é wakè goobu, ba na guwà cèikî [naa goo wà Pwi Ukai Iésu Kériso]. Â wàibu jècaa, âna bu jèpa pwa ê wakè, na é naa tâbu. 6 Wâgo, âna go câmi [ê popai] â wà Apollos, âna é *upwaa. Êco na nye wà Pwiduée na é pwa ma cipu.
7 Wà pwina é picâmi, ma wà pwina é upwaa, âna càcaa pwamuru naa gooru. Wà pwina é dau piâjimuru, âna wà Pwiduée, ba é pwa ma cipu. 8 Mataio 13.3–9; Éféso 2.20–22Â câé caa pwaké goo wà pwina é câmi, ma wà pwina é upwaa. Ba é tòpò tàru jècaa ê pumara wakè kàru, wiâra ê jèpa wakè kàru. 9 Ba wàibu ma Apollos, âna bu piwakè naima ba kà Pwiduée*Bu piwakè naima ba kà Pwiduée—é, Bà piwakè naima ma wà Pwiduée.. Â wâguwà, âna guwà pwacèwii ê aupwanapô kêe.
Guwà wâ kà Pwiduée
Guwà pwacèwii mwara ê wâ kêe [na gére bari]. 10  go pwacèwii pwi a ba wâ na é pwabwàti ê pàaé, wiâra ê âraimeai†Âraimeai—Nii bau ê autâmogòorimuru târa wakè kà Pwiduée. (Côo note goo 1 Korénito 12.4.), na é naa tôo wà Pwiduée.  mwa wà pàra tàpé na rà mwa bari naa gò.  wàilà jècaa, âna wâdé na rà pwacôoco bwàti, cè pai bari kàra naa gò. 11 Ésaïe 28.16; 1 Pétéru 2.4–6Ba ê pàaé na jèe tòpò, âna wà Iésu Kériso.  o nye ticè pwi jè âboro cèna ée mwa caa tòpò cè jè pàaé.
12 [O wâru na rà bari, naa gòro ê pàaé bèepwiri.] Wà pàra tàpé, âna rà o tòpò mwani mii, ma mwani pwaa, ma atü na dau maina wâri wèe‡Mwani mii… Ucina goo pâ muru na pâri târa ê wakè kà Pwiduée, ba muru na o tâa awé.. Â wà pàra pwi, âna rà o tòpò pâ upwâra ma jò, ma murumwatò§Pâ upwâra…ma murumwatò—Popai na càcaa pwéelaa naa na grec. Ucina goo muru na càcaa pâri, ba o tòo naa na ânye..
13 1 Korénito 4.5 Êco na, na cè jè tòotù, âna o nye paari bwàti wiàna wâdé, é, wiàna èpà ê jèpa wakè kàra jècaa. Ba jè tapacîri ê Tòotù na ée mwa [tèepaa me na wà Kériso, ba na é] tèi tèpa âboro. [Â ê pitèimuru kêe, âna o] pwacèwii ê ânye. 14 Â wiàna ê wakè kà pwi jè âboro, âna càcaa tòo ê ânye, â wà pwi bèepwiri, âna ée mwa tòpi ê pumara wakè kêe. 15 Â wiàna ê wakè kêe, âna tòo, â é tubatiàu diri*Tubatiàu diri—é, Tubatiàu ê pumara wakè kêe.. Â wà pwiibà, âna pwacèwii pwi âboro, na càùé gée gòro ânye, ba na é udò.
É tâa goowà ê Nyuâaê Pwicîri
16 1 Korénito 6.19; 2 Korénito 6.16 Wâguwà, co tèpa béeò, âna guwà pwi wâ kà Pwiduée, â ê Nyuâaê Pwicîri kêe, âna é tâa goowà. Â gona câguwà caa tâmogòori pwiri? 17 Â wiàna é nama tòri†Nama tòri—Grec: Nama tiàu (détruire). ê wâ kà Pwiduée wà pwi jè âboro, â ée mwa nama tiàué wà Pwiduée. Ba ê wâra pwapwicîri kà Pwiduée, âna é pwicîri, â ê wâ bèepwiri, âna wâguwà [tèpa cèikî].
Guwà wâgoo Kériso
18 Guwà ipwacôoco, ba guwà péa ipa-imwüruwà! Ba gona guwà niimiri pâ, tâa tàwà ê autâmogòorimuru na wâgòro wiâra ê autâmogòori kâra pâ âboro gòropuu? Guwà naaco pâ autâmogòorimuru bèepwiri‡Naaco pâ autâmogòorimuru bèepwiri—Grec: Wâdé na guwà pâ nau pimwüruwà., ba na o tâa tàwà ê âji autâmogòorimuru! 19 Job 5.13Ba napwa ê autâmogòori kâra pâ âboro gòropuu, âna pâra ma imwüru na ara Pwiduée.  jèe wii naa na *Tii Pwicîri pâ: Wà Pwiduée, âna ée mwa nama rà coo goropwiinawâ§Ée mwa nama rà coo goropwiinawâ—Grec: É tâjùru., tèpa tàmanga, goro ê tàmanga kàra. Job 5.13
20 Psaume 94.11 Â jèe wii mwara pâ: Napwa wà Pwi Ukai, âna é tâmogòori, ê pâ aunünüma kà tèpa tàmanga. Ba nye ticèmuru naa goo. Psaume 94.11 21-22 Êkaa na guwà cibwaa pi-ina kàwà pâ, guwà tèpa âboro kà Paulo, é, wà Apollos, é, wà Pétéru. Ba guwà côo, wà diri tàpéebà, âna rà [me na wakè ba] kàwà—wâgo Paulo, ma Apollos, ma wà Pétéru. Â cau kàwà diri pâ muru [na é tòpò wà Pwiduée]—ê gòropuu, ma ê wâro, ma ê pwâra bà, ma ê tòotù nabà, ma ê pâ tòotù na o bwaa wâ naigé! 23 Â wâguwà, âna guwà wâgoo wà Kériso, â wà Kériso, âna é wâgoo wà Pwiduée.
3:2 Hébéru 5.12–13; 1 Pétéru 2.2
3:3 1 Korénito 1.10–11
3:4 1 Korénito 1.12
3:5 Apostolo 18.4,11
3:8 Mataio 13.3–9; Éféso 2.20–22
*3:9 Bu piwakè naima ba kà Pwiduée—é, Bà piwakè naima ma wà Pwiduée.
†3:10 Âraimeai—Nii bau ê autâmogòorimuru târa wakè kà Pwiduée. (Côo note goo 1 Korénito 12.4.)
3:11 Ésaïe 28.16; 1 Pétéru 2.4–6
‡3:12 Mwani mii… Ucina goo pâ muru na pâri târa ê wakè kà Pwiduée, ba muru na o tâa awé.
§3:12 Pâ upwâra…ma murumwatò—Popai na càcaa pwéelaa naa na grec. Ucina goo muru na càcaa pâri, ba o tòo naa na ânye.
3:13 1 Korénito 4.5
*3:15 Tubatiàu diri—é, Tubatiàu ê pumara wakè kêe.
3:16 1 Korénito 6.19; 2 Korénito 6.16
†3:17 Nama tòri—Grec: Nama tiàu (détruire).
‡3:18 Naaco pâ autâmogòorimuru bèepwiri—Grec: Wâdé na guwà pâ nau pimwüruwà.
3:19 Job 5.13
§3:19 Ée mwa nama rà coo goropwiinawâ—Grec: É tâjùru.
3:20 Psaume 94.11