ISANKINATZINIRI HEBER-IITI
1
Pawa ityaantakiri Itomi inkinkithata-kotairi
1 Pairani, ininti-rika Pawa iyota-kayiri awaisatzitini ompaityaa-rika, iriitaki Kamantan-tzinkari amironi ñaantsi. Oshiki yapii-yapiitakiro Pawa, tzimatsi imatakaa-yitakiriri Kamantan-tzinkari-payi. 2 Iro kantacha owakira ityaanta-kayiri Itomi irirori inkinkithata-kotairi. Tima iriitaki Itomi iwitsika-kaaki pairani iroka kipatsi, iriitaki yasitakaaka okaratzi iwitsika-yitakiri. 3 Iriitaki Itomi ikimita-kaantakari iriimi iwaniinkatani, siparyaa ikanta. Ari ikimiwaitari tsika ikanta Asitariri. Tima sintsin-kantsi onatzi iñaanitari, irootaki asi owantarori tsika okanta-jaanta owakira iwitsika-itakiro. Tima imonkarata-paintziro pairani omatantakari ikiti-sirita-kaantai, ijatai inkitiki, saikapaji irako-piroriki Asitariri itsipata-paari ipinkathari-wintantzi. 4 Ari opoñaanakari yanaako-yitziri Imaninkariti Pawa, antaroiti yiriipirota-kaitairi.
Iriitaki Itomi anaakoyitairiri Maninkariiti
5 Tima Pawa kantawairi:
Notomi nowimi awiroka.
Naakataki pirintana iroñaaka.
Ikantawajiri aajatzi:
Naaka tomitajyaarini,
iriritajyaana irirori.
Tima tikatsira aparoni Maninkari inkantiri Pawa kimityaaroni iroka ñaantsi. 6 Apaata aririka yapiitajiro intyaantajiri aka kipatsiki itarori itomi, inkantaiti:
Intharowinta-jyaari maaroni Imaninkariti Pawa.
7 Tzimatsi aajatzi ikinkithata-koitziri Maninkariiti, iroka ikantaitzi:
Iriitaki matakairi Imaninkariti inkimita-kotyaaro tampyainka.
Iriitaki matakairi ityaankani-payi inkimita-kotyaarimi paamari.
8 Irooma aririka inkinkithata-kotiri Itomi irirori, iroka ikantzi:
Pawa, pasi piwairo awiroka pimpinkathari-wintantai.
Ari pinkimita-kota-jyaari pinkathari-payi otzimi-motziri iyariwati imatantari ipinkathari-wintantzi.
Iro kantacha awiroka mataironi pintampatzika-siritai aririka pimpinkathari-wintantai.
9 Awiroka kowirori kamiithari, irooma kaari-pirori oshiki owatsimaimi.
Irootaki isaipatzii-totan-taamiri Pawa, pimpinkatha-ritan-tajyaari. Iriitaki piwawani matakimirori.
Isaitan-taamiro yiinkantsi ari okanta pikimo-siritan-taari, panaa-kotairi pitsipata-piinta-witari.
10 Iroka pasini ikinkithata-kotai-tziri Itomi, ikantaitaki:
Pinkatharí, owakira itantanakari pairani awirokataki owitsikakiro kipatsi.
Awirokataki owitsika-jaantakiro inkiti.
11 Iroka okaratzi piwitsikakiri, aritaki apirotajyaa apaata, irooma awiroka pasi piwairo.
Ari onkimita-jyaaro okaratzi piwitsikani aparoni paisato-masiri kithaarintsi.
12 Tima aririka ompai-sato-masitaki piithaari, pankowii-maitziro, paminaji pasini owakirari pinkithaata-jyaari.
Ari pinkimitaa-jirori apaata piwitsikani kipatsi aajatzi inkiti.
Irooma awiroka pasi piwairo airo pipasini-waitaji.
Airo papirotaatsi.
13 Ikinkithata-koitairi aajatzi, ikantaitzi:
Pisaikapaji nakopiroki, ampinkathari-wintanti,
Irojatzi noitsinampaan-tajyaariri kisaniintzimiri,
Aripaiti intyiirowa-sita-jyaami, pimakoryaa-kitzitan-tajyaari.
Tima tikatsi Maninkari inkimita-kaantiri Pawa inkamantiri iroka. * makoryaa-kitzitaantsi 14 Tima maaroni Maninkariiti, apatziro ityaantai-tziri yamitako-yitairi atziri-payi awisako-siri-yitaa-tsiri.