Uhuna Suha'na Paulus lako Jumaa' dio Korintus
Bätäna issinna
Inde suha' natuli' Paulus napakatuam jumaa' dio Korintus, mesa kota kasalle dio propinsi Akhaya. Buda to Korintus tä'pi muissam Puang Allataala wattunna anna natuli'i Paulus inde suha'. Indo tau ia too umpenombai debata lino pa'papia kalena anna ma'gau' kadake liu. Paulus handam yolo umpa'pakahebaam Kaheba Katilallasam lako to Korintus lambi' deem sanaka-naka tau ungkatappa'i Puang Yesus. Wattu eta too tohhom Paulus dio sataum anna annam bulanna umpa'pa'guhuam Battakada Debata illaam alla'-alla'na to Korintus (Suho 18:1-11). Masäe-säei lessu'na Paulus umpellei Korintus lu lako kota senga', iya sulem mesa to matappa' isanga Apolos to buttu dio mai Aleksandria. Mesa duka' to manähä ma'tula' anna to muissam si'da-si'da issinna Battakada Debata (Suho 18:24-19:1). Indo Apolos umpatahhu' pengkähänganna Paulus umpatudu to matappa' dio Korintus (1Kor. 3:6).
Sanaka amoi bulanna lessu'na Paulus, iya napakatum suha' to Korintus. Inde Uhuna Suha'na Paulus lako Jumaa' dio Korintus, iam too suha'na Paulus umbala' indo suha'na to Korintus. Illaam inde suha'na Paulus untimba'i sanaka-naka pekutanaanna to Korintus (7:1,25; 8:1; 12:1; 16:1,12) anna napatudupi diona gau' tää'na sihatam la dipogau' (5:1; 11:18; 15:12). Ia anna napatudui aka napelele deem si ma'gau' kadake anna tä' ma'mesa penaba. Aka deem muuai: “Paulus kao kutuhu'i,” deem muuai: “Apolos kao,” lambi' kende' kasipengkaam illaam jumaa' (1:10-12; 3:1-6).
Illaam inde suha'na Paulus napatudu duka' diona kasialaam (hondongam 7), diona muande bale puha dipehumalasam lako debata lino (hondongam 8-10), diona kabiasaam ussapu'i ulu illaam pa'sambajangam (11:2-16), diona sihatanna dipogau' illaam pa'tosabeam sanda maseho (11:17-34), diona kapaissangam namanasangkia' Penaba Maseho (hondongam 12, 14), anna diona katibangonganna sule to mate (hondongam 15). Illaam hondongam 13, napomakaleso Paulus diona handam pahallu la dipogau': sikamase mesa sola mesa.
Lesoanna issinna
1. Kada passu'bä' anna katilallasanna Paulus napakende' längäm Puang Allataala (1:1-9)
2. Sanaka-naka pepakilalaanna Paulus (1:10-6:20):
a. Kasipengkaam illaam jumaa', anna deem to Korintus untumpu pala' Paulus (1:10-4:21)
b. To matappa' tä' la mala sola indo to ma'gau' sessu' illaam jumaa' (5:1-13)
c. Issinna jumaa' tä' la mala umbaba solana to matappa' lako to tä' matappa' la ia uhhotto'i (6:1-11)
d. Bätä puntinna to matappa' tä' mala dipake ma'gau' sessu' (6:12-20)
3. Kasialaam (7:1-40)
4. Bale puha dipehumalasam lako debata lino (8:1-11:1)
5. Kabiasaam ussapu'i ulu illaam pa'sambajangam (11:2-16)
6. Sihatanna dipogau' illaam pa'tosabeam sanda maseho (11:17-34)
7. Kapaissangam memanasam Penaba Maseho (12:1-14:40)
8. Katibangonganna sule to mate (15:1-58)
9. Doi' nahempum to Korintus la napamoloiam jumaa' dio Yerusalem (16:1-4)
10. Kada pebubunna Paulus (16:5-24)
1
1 Inde suha' buttu di kao Paulus to puha ditambai mendadi suhona Kristus Yesus aka situhu' pa'elo'na Puang Allataala. Duka' buttu di solasubuntaa' Sostenes 2 lu lako inggannakoa' solasubungki umma'na Puang Allataala itim jumaa' Korintus. Puhangkoa' napasähä' anna nasehoi Puang Allataala mendadi umma'na aka kasilombungammua' Kristus Yesus, susi toi ingganna hupatau lako ongeam senga' to mengkaala längäm Debatantaa' Yesus Kristus indo to tapa'Debataia' pada-pada. 3 Handandanni Puang Allataala Ambetaa' sola Debatanta Yesus Kristus la untamba'koa' anna namana' kamasakkeam sola kamasannangam.
Katilallasanna Paulus diona pa'mana' di ada'na Puang Allataala lako jumaa' Korintus
1:4-9
4 Tä' deem kattunna umpakende'ä' katilallasam längäm Puang Allataala aka malangkoa' nakamasei nabeem pa'mana' di ada'na kahana kasilombungammua' Kristus Yesus. 5 Aka pentuhu'nangkoa' Yesus Kristus, nasuhum puhangkoa' nabeem ingganna pa'mana' di ada'na illaam jumaa'mu susinna kamanähängam ma'tula' anna kapaissangam illaam ingganna kaha-kaha diona Puang Allataala. 6 Kaha-kaha iam too umpomannassai diua titanam tongammi illaam penabammua' indo kapaissangam diona Kristus, 7 nasuhum sundum illaam jumaa'mua' ingganna pa'mana' di ada' illaam inde wattu umpemmitai kasuleanna Debatanta Yesus Kristus ma'penduanna. 8 La napakatoto'koa' Debatanta Yesus Kristus sule lako allo ma'katampasanna anna mala tä' deem sassaimmua' nalambi' ke sulem ma'penduanna. 9 Puang Allataala tontä manontom umpasule lako pa'dandianna to puha untambaikoa' napasakalebu Änä'na, battu diua Yesus Kristus Debatanta.
Kasipengkaam illaam jumaa'
1:10-17
10 O inggannakoa' solasubungku, sola sanganna Debatanta Yesus Kristus, kupelau anna sambättu'koa' anna mesa pengngolo illaam ingganna kaha-kaha. Daa umpakende'a' kasipengkaam illaam alla'-alla'mu, sapo' la mesa penaba hakoa' ia anna mesa pattuju. 11 Ia anna ma'kada susiä' matim inggannakoa' solasubungku, aka deem sanaka-naka tau sahapunna Kloe sule umpa'tulasannä' naua: “Deem kende' kasipengkaam dio.” 12 Indo kuuaam kasipengkaam, deem muuai: “Paulus kao kutuhu'i,” deem muuai: “Apolos kao,” deem toi duka' muuai: “Petrus kao kutuhu'i”*Petrus: illaam basa Yunani naua: Kefas. Batai duka' 3:22; 9:5 anna 15:5. Petrus battu diua Simon Petrus si disangai duka' Kefas. anna deem piha muuai: “Pentuhu'naä' kao Kristus.” 13 Moi kela daa tä' kao deem kuissam dibahe-bahe Kristus! Tä' toi deem dipäso'ä' yabo kaju sitambem la umpendudungangkoa' dosamu! Tä' tookoa' deem ditedo' sola sangangku, le'? 14 Mapianna hia aka padakoa'i, iya anggam Krispus sola Gayus kao untedo'i, 15 nasuhum tä'koa' deem la mala muuai: “Natedo'ä' Paulus anna malaä' mendadi pentuhu'na.” 16 (O Stefanus-pi toda' sahapu kutedo' bale'! Sapo' situhu' pa'kilalaangku, tä'um deem tau senga' kutedo' sulibanna ia too). 17 Aka kao-kao tä' deem nasuaä' Kristus la mantedo', sapo' nasuaä' la umpa'pakahebaam indo Kaheba Katilallasam buttu yabo mai Puang Allataala. Anna taia kamanähängam hupatau kupake umpa'pakahebaam indo Kaheba Katilallasam lako hupatau. Aka maka' la ia nasuhum matappa' hupatau, iya la labu' bäbä indo kakuasaanna kamateanna Kristus yabo kaju sitambem.
Kaheba Katilallasam diona Kristus naongei ma'tandaam kakuasaanna Puang Allataala
1:18–2:5
18 Anna maka' dipa'pakahebaam kaheba diona kamateanna Kristus yabo kaju sitambem, iya nasangai ia to inna la ullambi' katilakaam: “Tula'na to maho.” Sapo' lako kita to dipasalama', taissanna' kita pada-pada taua kaheba ia too naongei Puang Allataala umpa'patandaam kakuasaanna. 19 Aka deem tisuha' illaam Battakada Debata naua:
“Indo kakeakasanna to ma'keaka'-aka' la kusapui,
anna indo kapaissanganna to ma'manähä-nähä la kupempa'deam.”†Yes. 29:14.
20 Iya akam gunana indo to manähä? Akam gunana indo to ullatta' Pepaondonganna Musa? Anna akam gunana indo to manähä ma'tula'? Iya mannassa anna napa'patandaammi Puang Allataala indo kamanähänganna hupatau tä' deem gunana! 21 Aka moi la umba susi kakeakasanna hupatau, tala malai umpengngissanni Puang Allataala kela kakeakasam di kalenai. Sapo' situhu' kakeakasanna Puang Allataala nakattu naua menna-menna ungkatappa'i indo Kaheba Katilallasam kipa'pakahebaam, tau ia too la salama', moi anna nasangai hupatau indo kaheba ia too: “Tula'na to maho.” 22 To Yahudi ia moka matappa' ke tä'i deem tanda memängä-mängä naita. Anna to Yunani ia, moka matappa' ke taiai to manähä umpa'tula'i. 23 Sapo' kami'-kami', anggam diona kamateanna Kristus yabo kaju sitambem kipa'pakahebaam. Sapo' tä' ia naala akkalanna to Yahudi, anna nasangai ia to Yunani katomahoam. 24 Sapo' indo ia to puha natambai Puang Allataala, susi to Yahudi teem taianna to Yahudi, dibukkaiam ia mata di ada'na anna mala naissam naua indo kaheba diona Kristus naongei ma'tandaam kakuasaanna anna kakeakasanna Puang Allataala. 25 Aka indo kakeakasanna Puang Allataala to nasangai hupatau: “katomahoam,” setonganna keaka' puha ia anna la kakeakasanna hupatau. Susi toi pa'palakoanna Puang Allataala to nasangai hupatau: “kamalammaam,” setonganna matoho puha ia anna la kamatohoanna hupatau.
26 O inggannakoa' solasubungku, la ungkilalai hia' tia katuboammu indo anna wattunnai natambaikoa' Puang Allataala. Wattu eta too, anggam saidi' illaam alla'-alla'mua' indo to disangai to keaka', to kasalle, anna änä' puä. 27 Aka naägä'i hi tia Puang Allataala umpilei to nasangai hupatau to maho, anna mala masihi' ingganna to keaka'. Anna naägä'i toi duka' Puang Allataala umpilei to naangga' hupatau malamma, anna mala masihi' ingganna to ussangai kalena matoho. 28 Napilei Puang Allataala to nasangai hupatau tä' keangga', to napa'pa'dei solana, susi toi duka' to nasangai hupatau tä' deem gunana anna mala napa'dei Puang Allataala indo to nauaam hupatau to la dipa'kasallei. 29 Napateem anna mala tä' deem moi podo la mesa hupatau ussanga-sanga kalena dio olona Puang Allataala. 30 Aka ma'kale Puang Allataala ungkähäi lambi' malakoa' dipasakalebu Kristus Yesus, nasuhum malaa' taissam kakeakasanna Puang Allataala. Ia toi napolalam anna malakia' napomalolo Puang Allataala anna napasähä' mendadi umma'na anna nalappasam dio mai kakuasaanna dosa. 31 Dadi, “Menna-menna la tilalla', taia kalena la nasanga-sanga, sapo' indo to puha napogau' Puang Allataala, ia hi tia pahallu napa'kasallei,” umba susi puha tisuha' illaam Battakada Debata.‡Yer. 9:24.