Uhuna Suha'na Petrus
Bätäna issinna
Inde suha' natuli' Petrus napakatuam to Sahani taianna to Yahudi to tohho dio Asia Kecil, disangaim temo Turki. Indo Petrus mesa duka' suhona Yesus Kristus. Indo to Sahani wattu eta too nahua pandahhaam kahana kamatappasanna lako Puang Yesus. Deem si napakolo'-kolo'i tau senga' (2:11-12; 2:15; 3:16; 4:4), deem duka' sabua' nakahha'i puäna (2:18-20), anna deem baine to matappa' napomasussa muanena aka indo muanena tä' ungkatappa'i Puang Yesus (3:1). Napakatu Petrus inde suha' anna mala matoto' kamatappasanna ingganna indo to matappa' dio, lambi' la tontä liu manontom illaam muoloi kamasussaam.
Situhu' issinna inde suha', ia anna nahuakia' pa'sändäsam aka dipangngitai kamatappasantaa' (1:6-7; 4:12-17). Anna maka' nalambi'kia' kamasussaam, la pahallukia' tontä liu umbeho kaleta lako olona Puang Allataala anna tä'kia' la monda umpogau' kamapiaam (4:19). Ma'hupa-hupapi pepakilalaam natula' Petrus la umpatigaha' penabanna to umbatai anna mala tontä liu mahannu längäm Puang Allataala, la ma'gau' mapia liu, anna la tontä liu manontom muoloi kamasussaam.
Lesoanna issinna
1. Kada passu'bä' (1:1-2)
2. Ponno pahhannuam to matappa' aka tontä liu najagai Puang Allataala sule lako natahima ponno indo kasalamasam (1:3-12)
3. To napilei Puang Allataala la pahallu tubo maseho (1:13-2:10)
4. Ma'hupa-hupa pepakilalaam la diaka susi ma'gau' mapia illaam inde lino ponno kakadakeam (2:11-4:19)
a. Hupatau pahallu matinuhu' lako to ma'pahenta, sabua' pahallu matinuhu' lako puäna, kasilumbangam mapia illaam dapo', anna la sihatanna napogau' to matappa' lako padanna (2:11-3:12)
b. Kamanontongam illaam muoloi kamasussaam (3:13-4:6)
c. To matappa' pahallu sipamoloi mesa sola mesa (4:7-11)
d. To matappa' abana inna la ussi'dim kamasussaam (4:12-19)
5. Pepakilalaam lako pebaba ada' sola issinna jumaa' (5:1-11)
6. Kada pebubunna Petrus (5:12-14)
1
1 Inde suha' buttu di kao Petrus mesaä' duka' suhona Yesus Kristus,
lu lako ingganna to napilei Puang Allataala to tisembu' lako mobotto-bottoam mendadi to messihuhu lako propinsi Pontus, Galatia, Kapadokia, Asia, anna Bitinia.
2 Ikonna' too umma' to napilei Puang Allataala Ambeta situhu' pattujunna mengkalao dio mai. Napileikoa' umpolalam pengkähäna Penaba Maseho to umpasähä'koa' mendadi umma' to maseho, anna malakoa' manuhu' lako Yesus Kristus anna nabaseikoa' haha titollona.
Handandanni Puang Allataala untamba'koa' anna namana' kamasakkeam sola kamasannangam sanda silapi'.
Pahhannuam matoto' anna kamatappasam
1:3-12
3 Dipuji sanganna Puang Allataala Ambena Debatanta Yesus Kristus to napenombai! Tä'um deem la untondonni pa'kamasena lako kitaa' lambi' nadadiam polekia' umpolalam katibangonganna sule Yesus Kristus dio mai alla'na to mate, nasuhum matoto'um pahhannuanta. 4 Anna tahannuanna' la taampuam indo pa'mana' puha napatokaangkia' Puang Allataala yabo suhuga, tala deem kadake, tala deem bosi, dapaka ia la malele. 5 Anna la najagaikoa' kakuasaanna Puang Allataala kahana kamatappasammua' sampe untahima ponno indo kasalamasam to la dipellatteam illaam allo ma'katampasanna. 6 Iam too anna la tilalla'ungkoa' moinna anna napomasussa salapokoa' säpäi' indo ma'hupa-hupa pa'sändäsam. 7 Ia anna nahuakoa' aka dipangngitai kamatappasammua', battu matappa' si'da hakoa' battu tä' di. Aka bulabam duka' to tä' la da'da' liu anna disudi hi tia yolo tama api, damoaham ia kamatappasammua' to keangga' puha ia anna la bulabam. Anna maka' matappa' tongangkoa' illaam ussi'dim pa'sändäsam, iya katampasanna pole' la dipujikoa', dipa'kasallei, anna dipomatande illaam allo kasuleanna Yesus Kristus ma'penduanna. 8 Indo Yesus Kristus, moi anna tä'pia' deem muita, sapo' tontäa' ungkamasei. Susi siam duka', ungkatappa'ia' moi anna tä'pia' deem muita. Iam too anna tilalla'ungkoa', anna indo katilallasammua' tä' dibela dipaju anna tä' diissam disangai. 9 Tilalla'koa' aka untahimangkoa' kasalamasam, buana kamatappasammu.
10 Indo kasalamasam, napahessa anna napetua' manappa ingganna nabi to umpayolo lambanni inde mana' pa'kamase nabeengkoa' Puang Allataala. 11 Penabanna Kristus mengkähä illaam penabanna indo nabi umpaissannii indo ingganna kamasussaam la uhhua Kristus sola indo kamatandeam la natahima ke puham ia too. Sapo' tä' makaleso illaam pikkihanna indo nabi piham la dadi anna kaha-kaha aka la umpadadii ingganna ia too. Iam too anna napahessa manappam. 12 Napomakaleso Puang Allataala lako ingganna indo nabi diona indo kada napayolo lambam indo nabi tä' napalako kahana la lu tama kalena, sapo' napalako aka la keguna lako ikoa' to tubo lapi' temo. Temo masiä'unna' uhhingngi kaha-kaha ia too dio mai to umpa'pakahebaam Kaheba Katilallasam diona Yesus Kristus. Napalandasangkoa' kaha-kaha ia too kahana kuasanna Penaba Maseho to dipatuhum yabo mai suhuga. Anna ingganna malaika' mohäe duka' la napengngissanni kaha-kaha ia too.
To napilei Puang Allataala la pahallu tubo maseho
1:13-25
13 Iam too anna la umpasatutunna' penabammu lako indo la dipogau'na. Majagakoa' anna uhhannuam ponnoi indo mana' pa'kamase la dimanasangkoa' ke sulem Yesus Kristus ma'penduanna. 14 Kahana änä'nangkoa' Puang Allataala to manuhu', iam too anna tä'ungkoa' la tubo untuhu'i pa'elo'na sipa' dosamu umba susi si umpogau'a' indo anna tä'pokoa' muissam Puang Allataala. 15 Sapo' umba susi maseho Puang Allataala to untambaikoa' la mendadi umma'na, susim too duka' la pahallukoa' maseho umpalako ingganna pa'palakoammu, 16 aka deem tisuha' illaam Battakada Debata naua: “La pahallukoa' maseho, aka Kao masehoä'.”*Sand. 11:44-45, 19:2.
17 Si muuaanna' Puang Allataala “ambe'” ke ma'sambajangkoa'. Anna Ia siam to uhhotto' hupatau situhu' pa'pogausanna si mesa-mesa, tä' ma'se'la-se'la. Iam too anna la pahallungkoa' mengkahea' dio olona Puang Allataala anna umpa'kasallei upu' tubomu illaam inde lino to muongeia' messihuhu. 18 Aka muissammia' indo pesolonna Puang Allataala anna malakoa' lappa' dio mai katuboammua' yolona to tä' deem gunana indo ullombunganna' dio mai nene to umponene. Taia baham-baham tä' la da'da' liu sule lako salako-lakona nasolongangkoa', susinna bulabam battu haka peha', 19 sapo' Kristus to tä' deem la pada angga'na nasolongangkoa' wattunna dipatitollo hahana. Sihhapam änä' domba tä' deem sassainna dipehumalasam längäm Puang Allataala. 20 Aka tä'pi deem dipadadi inde lino anna puham napa'tantu Puang Allataala Kristus la mendadi To Mepasalama'. Sapo' illaam dam inde wattu la kasuppisanna lino mane dipopellattei anna malakoa' salama'. 21 Pengkähänam too Kristus napolalam ungkatappa'ikoa' Puang Allataala to puha umpatibangonni sule dio mai alla'na to mate anna napomatande. Iam too anna ungkatappa'ingkoa' Puang Allataala anna uhhannuam.
22 Puhangkoa' manuhu' lako indo kaheba kamaloloam napolalam umpomasehokoa' penabammu lambi' ungkamaseikoa' solamu to matappa' mengkalao illaam unä' penabammu. Iam too anna kuuaammokoa': la sikamasekoa' mesa sola mesa sola ponno penaba. 23 Aka puhangkoa' didadiam pole. Anna indo katuboam bakahu tä' buttu di hupatau to la mate, sapo' nabeengkoa' Puang Allataala to tä' deem la matena. Ullambi'a' inde katuboam, aka ungkatappa'ikoa' Battakada tubona Puang Allataala indo to la da'da' liu sule lako salako-lakona. 24 Umba susi tisuha' illaam Battakada Debata naua:
“Katuboanna ingganna ma'hupatau sihhapam humpu',
anna kamatandeanna sihhapam bunganna.
Humpu' la malasso,
anna bunganna la hä'dä',
25 sapo' kadanna ia Debata la da'da' liu sule lako salako-lakona.ӠYes. 40:6-8.
Anna indo Kadanna Debata, ia siam indo Kaheba Katilallasam puha dipakahebaiangkoa'.