Suha'na Yakobus
Bätäna issinna
Inde suha' natuli' Yakobus napakatuam ingganna to Yahudi to ungkatappa'im Puang Yesus. Indo Yakobus sipohapu Puang Yesus. Indo to Yahudi tohho lako botto senga' anna ussi'dim buda kamapi'disam. Illaam inde suha'na muala buda pehapangam Yakobus la umpomasiä' ingganna tula' anna penännä'na lako to Sahani diona tanangam penaba anna pakkedoam tubo illaam kamatappasam. Napomasissä' anna natättä' bale mäne' Yakobus too'na pepa'guhuam la situhu'na lalam kasahaniam susinna: pa'sändäsam, pa'se'la-se'la, kamatappasam anna pa'palakoam mapia, ungkuasai lila, kamanähängam, tä' tau mala sipengka-pengka, tä' tau mala sikalla-kalla, tä' tau mala untula'-tula' solata, tä' tau mala ussanga-sanga kale, diona katomakakaam anna kapemase-maseam, kasa'bahasam, sambajam, anna budapi senga'na.
Too'na illaam inde suha'na Yakobus naua: “Kamatappasanna to ungkatappa'im Puang Yesus pahallu la tandaam illaam panggauam.”
Lesoanna issinna
1. Kada passu'bä' (1:1)
2. Pa'sändäsam (1:2-18)
3. Menna-menna bassa' me'guhu kada Debata anna napalakoi la natamba' Debata (1:19-27)
4. Tä' la dipakende' pa'se'la-se'la (2:1-13)
5. Tä' deem gunana kamatappasam ke tä'i sitonda panggauam mapia (2:14-26)
6. Lila pahallu dikuasai indana mebabai lako lalam kakadakeam (3:1-12)
7. Dua hupa kakeakasam (3:13-18)
8. To untuhu' lino umpadadi kalena balinna Puang Allataala (4:1-10)
9. Tä' tau mala untula'-tula' solata (4:11-12)
10. Tä' tau mala uhhannuam kamatohoam kaleta (4:13-17)
11. Pepakilalaam lako to makaka (5:1-6)
12. Kasa'bahasam anna sambajam (5:7-20)
1
1 Salama' buttu di kao Yakobus sabua'na Puang Allataala sola Debatanta Yesus Kristus, lako inggannakoa' pessubunna to sapulo dua änä'na Israel, to tisembu' lako botto senga'.
Pa'sändäsam
1:2-18
2 Inggannakoa' solasubungku, maka' nalambi'koa' ma'hupa-hupa pa'sändäsam, sangai ia too mesa kakehongkosam kasalle, 3 aka muissammia' muua ia too mendadi peuji lako kamatappasammua' anna mala umpakende' kamanontongam illaam kalemua'. 4 Patubo liuia' indo kamanontongam illaam kalemu sampe kembua mapia, anna mala umpasundum anna umpatepu katuboammua' napolalam tä'um deem sassaimmua'.
5 Maka' deem tau illaam alla'-alla'mua' tä' naissam aka la dipogau' muoloi pa'sändäsam, la umpelau akkalam längäm Puang Allataala to si ma'pebeem sola kamatutuam anna to tamannau-nau, anna nabeenni kaha-kaha ia too. 6 Sapo' la napelau sola ponno kamatappasam, tä' deem la bata-bata penabanna, aka to bata-bata penabanna sihhapam ia bombam dio le'bo' napalusau' napaludekke hibu'. 7-8 Aka indo to ma'dua penaba anna tä' manontom pa'palakoanna, tä' ia la nahannuam untahima aka-aka yabo mai Debata.
9 Inggannakoa' solasubungku to mase-mase, sipäto'koa' la ponno liu katilallasam aka napatadongkommokoa' Puang Allataala yabo ongeam kamatandeam. 10-11 Anna ikoa'-iko to makaka, susi liukoa' bunga-bunga la malasso bäbä. Aka maka' delle'um allo malussu, ullasso humpu' napolalam hä'dä' bunganna, iya pa'de siaham kamapiaanna. Susim too duka' lako to makaka, mahassampi illaam pamumbusanna, pissananna pa'de bäbä. Dadi lako ikoa' to makaka, la tilalla'ungkoa' aka dipomahempoammokoa' penabammu.
12 Kehongko' ia to matoto' muoloi pa'sändäsam, aka maka' patalom illaam pangngujiam ia too, iya la untahimam salokokati katuboam indo puha nadandiam Puang Allataala lako to ungkamasei.* salokokati: tontäm ke diuai songko' kapataloam.
13 Maka' deem tau nalambi' pa'sändäsam maelo' la umpogau' kakadakeam, tä' la naua: “Napa'sändä'iä' Puang Allataala.” Aka Puang Allataala tä' mala napa'sändä'i kakadakeam, anna tä' toi deem la buttu di Ia pa'sändäsam lako hupatau. 14 Sapo' si mesa-mesa tau napa'sändä'i kamailuam sugali' illaam kalena, iam too uhhuntu'i anna nasakkai. 15 Maka' patalom indo kamailuam, iya ungkembuaammi dosa. Pissananna lobo'i indo dosa ungkembuaammi kamateam.
16 Inggannakoa' solasubungku to kukamasei, daa umbulinna' la muua pa'sändäsam ia too buttu yabo mai Puang Allataala. 17 Aka ingganna pa'pebeem mapia anna pa'mana' tä' deem sassainna buttu yabo mai Puang Allataala to umpadeem to ma'pomasiä' yabo langi', anna to manontom tä' susi kalibajo tidende lelem. 18 Pa'elo'na anna nadadiam polekia' umpolalam kamatappasam lako Battakada kamaloloanna. Napogau' ia too anna malakia' mendadi änä'na to handam ma'kalolosam illaam alla'-alla'na ingganna pa'padadinna.
Menna-menna bassa' me'guhu kada Debata anna napalakoi la natamba' Debata
1:19-27
19 Inggannakoa' solasubungku to kukamasei, pengkilalai manappaia' muua lako si mesa-mesa tau pahallu si'da-si'da bassa' ma'pehingngi, la ungkambi' pudu'na, anna tä' toi la madomi' keaha'. 20 Aka aha'na hupatau tä' la umpadadi gau' malolo la situhu'na pa'elo'na Puang Allataala. 21 Iam too anna pahallum ditibe ingganna kakadakeam, indo tä' deem pada sabuda illaam kaleta. Anna tatahimai sola penaba malunä' kada Debata napatitanam illaam penabanta aka iam too kuasa umpasalama'kia'.
22 Anna pahallukoa' tandaam ungkedoam kada Debata, tä' angga bassa' bäbä ma'pehingngi. Aka maka' anggangkoa' bassa' bäbä ma'pehingngi, umpasalanduangkoa' kalemu. 23 Lako tau to anggam bassa' bäbä umpehingngii kada Debata sapo' tä' napogau', dipasihhapam to ungkalempei lindona illaam dahammim. 24 Puhai umpetua' kalena, le'ba'um. Iya nakalembei siaham sule maaka susi hupanna.
25 Sapo' menna-menna bassa' umpe'guhui manappa pepaondonganna Puang Allataala anna tä' nakalembei indo bali napehingngii sapo' napogau' liu, la natamba' Puang Allataala illaam ingganna pa'palakoanna. Pepaondongam ia too tä' deem sassainna anna kuasa ullappasam hupatau illaam mai kakuasaanna dosa.
26 Maka' deem tau ussangai kalena mesa to manontom illaam peadasam, sapo' tä' nabela ungkambi' pudu'na, tau ia too umpasalanduam kalena, aka labu' indo lupu'na tama peadasam. 27 Indo diuaam peadasam mahändä anna tä' deem sassainna dio olona Puang Allataala Ambeta, ke umpamoloiki' änä' bium sola to balu-balu baine illaam kamasussaanna, anna ungkambi'ki' kaleta indana nakadakeiki' lino.