To Israel anna Kaheba Katilallasam (9:1-11:36)
9
Kuasa Puang Allataala umpilei to la mendadi umma'na
9:1-29
1-2 Inde tula'ku kada tongam tä' kuua bäbä, aka pentuhu'naä' Kristus. Penaba Maseho ungkuasai unä' penabangku, nasuhum kuissam kuua tappa' inde tula'ku kuua: Tä' deem pada samasussa penabangku umpikki'i diona solaku to Israel. 3 Tandana masussa penabangku diona solaku to Israel, iya meangga la nahuaä' tädona Debata sule lako salako-lakona anna la dipasitäntängannä' Kristus, iya la ahu'pä', assala'na mala ullambi' kasalamasam to Israel. 4 Aka abana inna to puha napilei Puang Allataala napopendadi änä' ikalena. Anna umpa'paitaam kamatandeanna anna napadeengam pa'dandiam la mendadi umma'na anna nabeem Pepaondonganna Musa. Anna napaissanni toi Puang Allataala lalanna diona mehumala' anna nabeempi ingganna pa'dandiam senga'na. 5 Inde to Israel pessubunna Abraham, Ishak, anna Yakub, kabuttuanna duka' tandai mehhupataunna To dilanti' la mepasalama'.*To dilanti' la mepasalama': illaam basa Yunani diua Kristus; illaam basa Ibrani diua Mesias. Anna indo To dilanti' la mepasalama' Ia handam matande yabona ingganna-ingganna sia. Ia siam ma'kale Puang Allataala anna sihatam dipuji anna dipa'kasallei sule lako salako-lakona. Abana inna la diua!
6 Tentomai buda to Yahudi taia umma'na Puang Allataala. Tä' diua tä' napasule lako Puang Allataala indo pa'dandianna. Sapo' abana hi tia inna tä' napilei asam Puang Allataala to Israel la mendadi umma'na. 7 Tä' tia diua ingganna pessubunna Abraham la mendadi asammi umma'na Puang Allataala. Aka ma'kale Puang Allataala ma'dandi lako Abraham naua: “Ishak la naongei buttu pessubummu situhu' pa'dandiangku.”† Kad. 21:12. 8 Kalembasanna ia too, tä' diua ingganna pessubunna Abraham la disangai asammi änä'na Puang Allataala. Sapo' indo pessubunna Abraham, anggam mala diuaam pessubunna indo dadi kahana situhu' pa'dandianna Puang Allataala. 9 Aka puha nadandi Puang Allataala diona kadadianna Ishak naua: “Katenanna inde taum pole la suleä', iya wattu eta too la deemmi änä'na Sara muane-ane.”
10 Mane deenni, Ribka duka' undadiam dua muane-ane, mesa ambena isanga Ishak. Ishak mesa duka' nene to taponene inggannakia' to Yahudi. 11-12 Sapo' tä'pi subum indo dua änä'-änä' anna naua loppo'um Puang Allataala lako Ribka: “Indo kakanna la napahe' leko' adinna.” Wattu eta too, indo dua änä'-änä' tä'pi deem ma'pogau' mapia haka kadake haka, aka illaampi tambu'na indona. Sapo' inna natuho loppo'um Puang Allataala mesa to la untahima pa'tamba'na, anna mala tontä liu sule lako pattujunna la umpilei hupatau situhu' pa'elo'na Puang Allataala taia kahana pa'palakoanna hupatau. 13 Umba susi puha tisuha' illaam Battakada Debata naua: “Kukamasei ia Yakub anna tä' ia kukamasei Esau.”
14 Maka' susi, iya la mala haka diuaam Puang Allataala tä' malolo aka ma'se'la-se'la? Mannassa anna tä'i mala, 15 aka inna puham ma'battakada Puang Allataala lako Musa naua:
“La ma'kaleä' ungkamasei to la kukamasei,
anna la ma'kale tooä' uhhäntängam bua to la kuhäntängam bua.”‡ Täss. 33:19.
16 Dadi, hupatau napilei Puang Allataala taia kahana pa'elo'na hupatau battu haka pengkähäna, sapo' ia too mesa-mesanna pa'kamasena Puang Allataala. 17 Aka maka' moka ungkamasei mesa tau, iya tä' too nakamasei, umba susi puha napogau' lako Firaun indo tomahaja Mesir yolona. Tä' nakamasei Puang Allataala, sapo' nauaam: “Ia anna kuäkä'ko mendadi tomahaja, aka la kupa'paolai kupatandaam kakuasaangku, anna mala kaleleam sangangku illaam inde lino.”§ Täss. 9:16. 18 Dadi, Puang Allataala ungkamasei mesa tau ke abanai napoelo', anna Puang Allataala toi duka' umpomakahha' penabanna mesa tau ke abanai inna napoelo' la susi ia.
19 Umbai' la muuaannä' tentomai: “Maka' susi, iya maaka hi anna la umpasala liupi hupatau Puang Allataala? Aka mennam la mala ullabai pa'elo'na?” 20 Akaa' la ussangaiam kalemu anna la bahanikoa' umbali-bali Puang Allataala? Moi kela daa hupatau biasa hakoa'! La mala haka to dipapiai ma'kada lako to umpapiai naua: “Akanna umpateenni kao tampaku?” 21 Tä' daka tia la mala beba' mesa pa'tampa kuhim muala litä' pulu' sabokkom anna natampai dua kuhim situhu' pa'elo'na, mesa napapi'dä' anna mesa napapia susi biasa?
22 Susim too duka' Puang Allataala kuasa ma'pogau' lako hupatau situhu' pa'elo'na. Aka maelo' la umpa'paitaam kakuasaanna anna umpahuai aha'na lako ingganna tau to sihatammi napahuai aha' kasallena sule lako salako-lakona. Moi anna susi, sapo' tontä liupi sa'baha' lako tau ia too. 23 Ponno sa'baha'pi Puang Allataala anna malai umpa'patandaam kamatandeanna taditondom lako inggannakia' to nakamasei battu diua to napatoka la mangngala taba illaam kamatandeanna. 24 Kitanna' too indo to napilei, deem diala dio mai to Yahudi anna deem diala dio mai taianna to Yahudi. 25 Umba susi indo puha napayolo lambam Puang Allataala napalanda' nabi Hosea naua:
“Indo taianna umma' petauangku yolona
anna to tä' kukamasei,
iam too pole' la kupopendadi umma'ku,
anna la kukamasei.** Hos. 2:23.
26 Anna dio indo ongeam naongei Puang Allataala ma'kada naua:
‘Taiakoa' umma'ku,’
iya ongeam eta siam too la naongei hupatau disangai,
‘änä'nam Puang Allataala Debata tubo.’ ”†† Hos. 1:10.
27 Naua toi duka' nabi Yesaya yolona lu lako to Israel:
“Moi anna pada budanna bungim dio bihim le'bo' to Israel,
sapo' anggam saidi' la dipasalama'.
28 Aka abana inna la sule Puang Allataala
anna sulena too tappa untahungkum ingganna hupatau to la sihatam natahungkum.”‡‡ Yes. 10:22-23.
29 Anna napayolo lambam polepi nabi Yesaya naua:
“Maka' hapanna tä' la napada'dasangkia' Puang Allataala Debata To Handam Kuasa sanaka-naka pessubuntaa',
iya mannassa anna la pa'de asammi duka' pessubuntaa' umba susi issinna kota Sodom anna Gomora.”§§ Yes. 1:9.
Anggam mesa-mesanna kamatappasam mala mepomalolo Puang Allataala
9:30–10:4
30 Dadi illaam inde tula'ku susi inde pungngu' tannunna: Indo taianna to Yahudi tä' ia si napeä lalanna anna mala napomalolo Puang Allataala. Sapo' ia leko' di napomalolo Puang Allataala kahana kamatappasanna. 31 Anna to Israel ia, si untuhu'i liu Pepaondonganna Musa aka napeä lalanna anna mala napomalolo Puang Allataala, sapo' ia leko' di tä' napomalolo. 32 Akanna tä' ia mala? Tä' mala, aka indo pa'palakoam kalena nahannuam, tä' ungkatappa'i Puang Allataala. Nasuhum illaam ia too, titedo lako mesa “Batu Katitedoam”.***titedo lako mesa Batu Katitedoam: kalembasanna, moka matappa' lako Puang Yesus nasuhum ullambi' katilakaam. 33 Inna puham tisuha' illaam Battakada Debata naua:
“Paalaia' penaba inde tula'ku:
Kupaokko' mesa Batu dio Sion†††Sion: mesapi sanganna kota Yerusalem.
nasuhum buda tau la untitedoi.
Sapo' menna-menna ungkatappa'i,
tä' ia la salanduam.”‡‡‡ Yes. 28:16.
*9:5: To dilanti' la mepasalama': illaam basa Yunani diua Kristus; illaam basa Ibrani diua Mesias.
‡9:15: Täss. 33:19.
§9:17: Täss. 9:16.
**9:25: Hos. 2:23.
††9:26: Hos. 1:10.
‡‡9:28: Yes. 10:22-23.
§§9:29: Yes. 1:9.
***9:32: titedo lako mesa Batu Katitedoam: kalembasanna, moka matappa' lako Puang Yesus nasuhum ullambi' katilakaam.
†††9:33: Sion: mesapi sanganna kota Yerusalem.
‡‡‡9:33: Yes. 28:16.