3
Yesu, Moses ighekuyowei.
1 Varevaresiku vovokaravimi, tami ma tokai God ikwatuta da ku kunuma taghae. Debiiyai tavi mamatara da Yesu na God ina yonayona ma ita suwara kapuna badana na ami nota tuna kurina koterei. 2 God, Yesu ivinei da ina biga ita berai ma vaghina peyarina ibera bubuni. Maghimaghighina Moses nakanani, ina biga ibera bubuni da God ina wawaya ikoyaghisi. 3 Tomowa numa kiimatanina ita vowai na kana vigheghena ita rakata, ke nani numana nakanani. Maghimaghighina, Yesu tuna vigheghena ghamana kata verei, ke Moses nakanani. 4 Numa peyarina na wawaya evowavowa, ma kegha da God bera yavu kudubina iyamoni. 5 Moses na God ina bigabiga, ma ina biga ibera bubuni da God ina wawaya ikoyaghisi. Ma aviyavisina Moses iberaberai na ivivi matakira da God ina bera vaghata karakava ini debei. 6 Ma Keriso*Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’ na God Natuna, ma ina biga eberabera bubuni da God ina wawaya ekoyakoyaghisi. Ma tota iyavo kava titepatora ma nota rewapanai tatumatuma na God ina wawaya kamosiyai tamakamakai.
God ina wawaya ini yakam.
7 Tuna kubiine na Kanuma Vovokaravina evonavona bo,
“Karako God gamona koni yanei,
8 na ke koni tinakurukuru ami kaekiki mau nakanani.
Ti na nani maranai warereyai God ivi kawakiikiiyei ma ivorubui.”
9 God ivona bo,
“Madegha ivi 40 kamonai,
bera ghamaghamasi aberaberai na matasiyai ikitakitai,
ma kegha da nani dobunai ivorubuku.
10 Tuna kubiine na kurisi nuwanuwaku ipughu da avona bo,
‘Ti damsi nuwanuwasi kamonai na ibarakamtaweku
da taku ivonavonavikoniyeku.’
11 Nuwanuwaku ipughu kubiine na vonakiiyapa bagibagina aterei da avona bo,
‘Viyakam gawarina ata veresi ma kegha, nani ku dobuna kaesi ke ina tere tovoni.’ ”*Psa 95:7-11
12 Keresiyana turaturaku, kokitaruvimi da ke sago iyai nuwanuwana kamonai berabero emakamakai ma vitumaghana kegha da God yawayawana ina miirikupukuputei. 13 Ma mara nonowa kamomiyai kovi kiiepepavivirana da ami nota ini rewapana ma berabero ke ini bademi da tinimi ina kurukuru. Marana na weni, ‘Karako,’ wekarakava taraboga patana da emakamakai da nakanani taberai. 14 Karenai ikikava tavi tumaghana na nani vitumaghanina tavokikini da ku damona, tota Keriso yavata tisagota.
15 Ma giruma katamana evonavona bo,
“Karako God gamona koni yanei,
na ke koni tinakurukuru ami kaekiki mau nakanani.
Ti na God ivi kawakiikiiyei.”*Psa 95:7-8
16 Meni damsi na God gamona ivi yanei ma kegha da ivi kawakiikiiyei? Ti na iyavo kava Moses irutinisi da Egypt ikiibutawei. 17 Ma meni damsi madegha 40 kamonai God inuwanuwapughuwesi? Ti na iyavo kava berabero iberai, tuna kubiine warereyai iririgha da irukwamakai. 18 God ina vonakiiyapa bagibagina iterei da ivona bo, “Viyakam gawarina ata veresi ma kegha, nani ku dobuna kaesi ke ina tere tovoni.” Tuna na meni damsi kii sisiya? Iyavo kava God ivivi kawakiikiiyei na kii sisiya. 19 Ma vaghina, takovi da ti na ke kovokovoghina da viyakam ku dobuna ita rui, iyamna ke iti tumaghana.