1 Ma Sipu Gegeyina pasi kana vimiikovimaruwa ivotawei na iyavo kava kunumai imakamakai na kudubisi ivoguguba da mara gisina.*‘Mara gisina’ iyamna 30 minutes nakanani. 2 Ma akita na aneya miikovimaruwa akitisi, God maghinonai imiimiiri ma ture miikovimaruwa iveresi.

3 Ma aneya sago gold sensa ikavarapiyei da suwara kana kema ririnai imiiri. Ma insens ghamana iviiya da God ina wawaya vovokaravisi i nipowana yavata ivokapui da ita kapuna gold kemana tepanai God ina vikiivavo gawarina maghinonai.*Amos 9:1; Exod 30:1, 3 4 Ma aneya sensa ivovotani na insens buna ma vitumaghana damsi i nipowana yavata ighae God maghinonai. 5 Nani murinai na aneya suwara kana kema tepanai keyama mukina sensa ivi tupoi ma itawei ioru ku dobu da warikeyakeya iruruwa ma iguguguri, mara ikadakadari ma dobu inukenukei.*Lev 16:12; Ezek 10:2; Exod 19:16; Rev 11:19, 16:18

6 Muriyai na aneya miikovimaruwa ivovunagha da i ture ituvena.

7 Ma aneya sago ivi nao, ina ture iuveni na garewa pakapakana†Garewa pakapakana: Garewa pakapakana nakanani ma wakima iyamna na hail bo ice. nakanani ma wakima, ma bade keyama karakaratina tara yavata inekiibau. Ma itawei ioru ku dobu da dobu nevanevana‡Nevanevana iyamna na 1/3 bo 33%. ikaragavovori ma bade kii nevanevana ma inamona kudubina ikaragavovori.*Exod 9:23-25; Ezek 38:22

8 Muriyai aneya viruwina ina ture iuveni na sawara sago nakanani ma koya ghamanakina ere karakaratina itawei ioru ku yegai na yegai nevanevana ivi tara. 9 Ma aviyavisina peyarina yawayawana yegai kamonai na nevanevana§Nevanevana iyamna na 1/3 bo 33%. irabobo, ma waka nevanevana imonu.

10 Muriyai aneya viarobina ina ture iuveni na gwamegwame ghamakina ere yebayebarina nakanani ma kibe kunumai ipeku ioru da okowa ma vusira nevanevana**Nevanevana iyamna na 1/3 bo 33%. ikamowanisi.*Isa 14:12 11 Tuna gwamegwamena kana vava na Kii Kawayarayarana ma meni okowisi kava ikamokamowanisi na kudubina ivi kawayarayara da wawaya ipeyari kirakai nani okowisiyai iuma na irukwa.*Jer 9:15

12 Muriyai na aneya viruwamaruwina ina ture iuveni na madegha ma nawaravi da gwamegwame i rewapana ivowai da nevanevasi††Nevanevasi iyamna na 1/3 bo 33%. ivi nubakutuva. Weni berana itupuwa na dobuwai madegha ke ita rarana kupom, mara tupona kava irarana. Ma bade nawaravi da gwamegwame ke ita karata mareba, mara tupona kava ikarata.*Isa 13:10; Ezek 32:7; Joel 2:10, 31, 3:15

13 Ma akitakita ma tepakuwai bayo irovorovo ma ikiikiirara bo, “Nuwapoya, nuwapoya, nuwapoya. Tami iyavo kava dobuwai komakamakai na koni nuwapoya kirakai, iyamna aneya ivi aroba gisina kava ma i ture inuvena.”