योहन के व्दारा लिखा यीसु मसीह का सुसमाचार
योहन लक लिख्यो यीसु मसीह को साजरा बारता
परिचय
योहन लक लिख्यो यीसु को कथा मा यीसु ला परमेस्वर को सबद को रुपमा चोवायो गयो से। जोन ना मानूस देह मा आय के आमरो बीचमा रह्यो से। यो कथा एको लाय लिख्यो गयो से, का एला बाचन वारा भरोसा करेत का यीसु च परन कियो हुओ सूटकारा देवन वारा परमेस्वर को टूरा से। अना वय भरोसा करके जिंदगी ला पाय सकासे।
पहले यीसु ला परमेस्वर को सबद को रुपमा चोवायो गयो से। वोको मंघा मा कहानी मा पुढ़ा को सात चकित करनवारा काम ला दरसायो गयो से। उन लक यो मालुम होवासे का यीसु परन कियो गयो सूटकारा देवन वारा परमेस्वर को टूरा से।
दुसरो हिस्सा मा जोन सिक्सा से, वोमा यो समजायो गयो से का चकित होवन वारा काम को काजक अरथ से? अना यो भी सांगो गयो से, का काही लोकगीन ना यीसु पर भरोसा करके अखीन वोको चेला बन गईन। अना काही लोकगीन वोको विरोध करके विरोधी बन गईन। अना भरोसा राखन लाय मुकर गईन।
अध्याय 13 लक 17 तकन यीसु ला धरान वालो रात को, यीसु को चेलागीन संग गोस्टी करत, कूरूस मा चघायो जानो को पयले संजा को बेरामा चेलागीन ला समजावनो, आखीर मा कूरूस मा लटकानो, अना वोको कबर लक जिवनो अना चेलागीन को पुढ़ा परगट होवनो को बारे मा सेत। 20:31 योहन यीसु को लक दियो जान वालो अमर जीवन पर जोर देव से। यो असो दान से जो अबा सुरु होवा से। अना उनला भेटा से जोन यीसु को सांगयो रास्ता मा चलासे। अखीन यीसु ला खरो जीवन अना पंथ को रुप मा अपनावा से। योहन आत्मिक गोस्टी ला समजावन लाय साधारन चीज को उदाहरन देवासे। जसो पानी, भाकरी, दियो को उजाड़ो, मेढा को चरवाहा अना अंगूर को बेला, फर चोवान।
रुपरेखा
1. भूमिका योहन बप्तिस्मा देन वालो। 1:1-18
2. अना यीसु का पयलो चेला यीसु को लोक सेवा। 1:19—12:50
3. यरुसलेम मा आखरी का काही दिवस। 13:1—20:31
4. पिरभू को मरो मा लक जीवनो अना ओको चोवनो गलील मा मंग लक चोवनो। 21
1
सबद को देह रुपमा आवनो
1 सबमा सूरू मा सबद होतो। अना सबद परमेस्वर*परमेस्वर को संगा होतो। अखीन सबद परमेस्वर होतो। 2 वोच सुरुमा परमेस्वर को संगा होतो। 3 सबच काही वोकोच लक जलम भयो से, उनमा लक कोनी भी चीज वोको बगर जलम नही भयेव। 4 वोको मा जिंदगी होतो, अना वा जीन्दगी मानूस गिनको उजाड़ो होतो। 5 अखीन उजाड़ो इंधारो मा चमकासे अना इँधारो †अँधेरा वोला नही अपनाय सकयेव।
6 परमेस्वर को कन लक एक मानूस आयो, वोको नाव योहन होतो। 7 उ सच्चो उजाड़ो को बारे मा सबला गवाही देन आयेव होतो, का सब वोको गोस्टी ला मानके भरोसा करेत। 8 उ खुद उजाड़ो नहोत, मंग उ सच्चो उजाड़ो को बारे मा साँगन आयेव होतो। 9 उ उजाड़ो जोन खरो से, वा हरेक मानूस मा उजाड़ो कर देसे। असो उजाड़ो दुनिया मा आवनवारा होतो।
10 उ दुनिया मा होतो, अना सप्पा दुनिया वोको लक जलम लेयी होती, तरी दुनिया को लोक गीनना वोला नही चिन्हो। 11 उ आपरो घर मा आयो, अना वोकोच घरवारो ना वोला धुतकार‡ठुकरा देइन। 12 पर जितरो ना वोला आपनाय लेइन, उनला वोना परमेस्वर को टूरा-टुरी होवन को हक देइस। मनजे जोन लोकगीन वोको नाव पर भरोसा राखासे। 13 की जसो रकत लक मानूस जलम होवासे, ओनो पिरकार लक वय जलम नही लेईन तरी उनको अजी स्वता परमेस्वर से।
14 अना सबद देह मा आयो अना दया अखीन खराई§सच्चाई लक आमरो बीच मा रहयो अना आमी ना उ परमेस्वर को टूरा को महिमा आपरो डोरा लक चोवयो सेजन।
15 योहन ना वोको बारे मा गवाही दियो से। अना हाकल के कव्हयो “यो वोच से जोन को बारे मा मिना साँगयो होतो, जोन मोरो मँघा आवनवालो से, मोरो लक मोठयो से, काहेकि उ मोरो लक पयले होतो।”
16 काहे का वोको मोठयो दया लक एक नही पर आमी ला दुई बार दया मिलि से। 17 एको लाय का मोसे को नियम*नियम ता मोसे ना दियो से। पर खराई अना दया यीसु मसीह सूटकारा देवन वालो लक धाड़ियो गयो से। 18 कबच कोनी न परमेस्वर ला नही चोयोसेस, पर परमेस्वर को टूरा नाच परमेस्वर ला चोवयोसेस, काहेका जोन वोकोच कन लक आईसे, वोनाच परमेस्वर ला चोवायोसेस।
योहन को गवाही
(मत्ती 3:1-12; मरकुस 1:1-8; लूका 3:1-18)
19 जबा यहूदिगीन ना यरुसलेम मा याजक अना लेवी दासगिन ला योहन लक यो पुसन काजी धाड़ीन का “तु कोन आस?”
20 ता वोना यो गवाही देइस अना बिना संका को राजी भय गयो। “की मी मसीह नही सेव।” 21 तबा उनना योहन लक पुसिन, “मंग तु कोन आस?” “का तू भविस्यवक्ता एलिय्याह आस?” योहन ना कव्हयो “मि एलिय्याह नही सेऊ” तो “का कोनी मोठयो भविस्यवक्ता सेव?” योहन ना कहीस, नही। 22 तबा उनना वोको लक पुसिन का तू कोन आस? जोन ना आमला धाड़ीसेस उनला आमी काजक साँगबिन? “तू आपरो बारेमा काजक कव्हसेस?” 23 योहन ना कव्हयो, जसो भविस्यवक्ता यसायाह ना साँगिसेस “जंगल मा एक हाकलनवारा को आवाज का पिरभू को पंथ†रास्ता ला सरल करो।” मि वोच सेव।
24 वय मोसे को नियम को गुरू को कन लक धाडो गयो होतिन। 25 उनना योहन लक पलट के पुसिन, “तू ना ता मसीह ना तो भविस्यवक्ता ना ता एलिय्याह आस। मंग तु काय साठी बप्तिस्मा देसेस?”
26 तबा योहन ना जवाब दियो, “मि तो तुमी ला पानी मा बप्तिस्मा देवासू, पर तुमारो बीच मा एक मानूस उभो से, जेनला तुमी नही जानसो। 27 मतलब मोरो मँघा आवनवालो से, जोन मोरो लक ज्यादा साजरो से, मि जोन को जूता की दोरी खोलन लायक भी नही सेउ।”
28 यो गोस्टी यरदन नदी को वोनागन बैतनिहा गाँव मा भयो होतो जहान योहन बप्तिस्मा देत होतो।
परमेस्वर को पाठी
29 दुसरो दिवस मा योहन बप्तिस्मा देवनवारा ना यीसु ला आपरो कन आवता चोइस अना कहीस, चोवो यो परमेस्वर को पाठी‡पाठी से, जो दुनिया को पाप ला उचल ले जावसे। 30 जोन को बारेमा मीना सांग्यो होतो, क एक मानूस मोरो मंघा आवन वारा से यो वोच से, जोन मोरो लक साजरो से काहेका उ मोरो लक पूढा होतो। 31 अना मी वोला चिन्हत नही होतो। पर यो काजी मी पानी मा बप्तिस्मा देवसू का यो गोस्टी इसरायल जाती मा सब ला मालुम भई जाहेति।
32 अना योहन ना यो गवाही देइस, मी ना परेवा को जसो आतमा ला सरग लक उतरतो चोयी सेऊ अना आतमा आयके वोको वरता रुक गयो। 33 अना मी ता वोला चिन्हत§जानता नही होतो। पर जोन परमेस्वर ना मोला पानी लक बप्तिस्मा देवन लाय धाड़िसेस, वोना मोला सांगीस, का तुमी जोको वरता आतमा ला उतरतो अना रुकतो चोवजोस वोच पवितर आतमा लक बप्तिस्मा देवनवारा से। 34 अखीन मीना चोवयो अना मि सांगुसू, का योच परमेस्वर को टूरा आय।
यीसु को पहिला चेला
35 दुसरो दिवस योहन ओको दुई चेला को संगा उभो होतिन। 36 जबा उनना यीसु ला चलता चोयो, तबा कव्हन लगयो, चोवो यव परमेस्वर को पाठी आय।
37 तबा वय दुई चेला ना यव आयकिन ता यीसु को संगा भय गईन।
38 यीसु ना मुरक के उनला मंघा आवता चोयो, ता पुसासे, तुमी कोन ला चोवासेव? तबा उनना कहिन, हे गुरू तू कहाँन रव्हसेस?
39 तबा यीसु ना चेलाहुन ला कव्हसे, “चलो अना चोय लेव” तबा वोना जायके वोको रव्हन को जघा चोयो अना वोको संगा रहयो, यो महातनी बेरा होती।
40 जोन चेला योहन को गोस्टी आयकिन होतीन यीसु को मंघा भई गयी होतीन, उन दुही मा लक समोन अना एक अंद्रियास नाव को होतो। 41 अंद्रियास पयले आपरो सगो भाऊ समौन ले भेटयो अना वोला कव्हयो “आमला बचावन वारो मसीह मिल गयो से।”
42 तबा अंद्रियास ना समौन ला यीसु को जवर आनिस। तबा वोना टकटकी लगायके ओला चोयके कहीस, “तु योहन को टूरा समौन आस, तू पतरस*लहान गोटा कहलाजोस।”
यीसु ना फिलिप्पुस अना नतनएल ला हाकलीस
43 दुसरो दिवस यीसु ना गलील जानो को निरनय लेवो,। उ फिलिप्पुस लक भेटयो अना ओको लक कव्हयो “मोरो मंघ होय लेव।” 44 फिलिप्पुस, अन्दिरयास, अना पतरस को नगर बैतसेदा को रव्हन वारा होतीन। 45 फिलिप्पुस नतनएल लक भेटयो अना वोको लक कव्हयो जेनको बारेमा भविस्यवक्ता मोसे ना, मोसे को नियम मा अना पवीतर भविस्यवक्ता गीनना पवीतर गिरंथ मा सांगिने, उ हमला मिल गयो से, उ यूसुफ को टूरा यीसु आय, जोन नासरत नगर मा रव्हासे।
46 नतनएल ना वोको लक कहीस, का कोनी साजरो चीज नासरत नगर लक हीट सकासे?
फिलिप्पुस ना वोको लक कव्हयो, आयके चोय ले।
47 यीसु ना नतनएल ला आपरो कन आवत चोवके वोको बारेमा कव्हयो, “चोवो एकोमा कपट नहात, यो खरो-खर इसरायली से?”
48 नतनएल ना वोको लक कव्हयो, तू मोला कसो जानासेस?
यीसु ना वोला जवाब दियो, ओको लक पुढा की फिलिप्पुस ना तोला हाकलीस, जबा तु अँजीर को झाड़ को खाल्या होतो, तबा मिना तोला चोवयो होतो।
49 नतनएल ना वोला जवाब दियो, “हे गुरू तू परमेस्वर को टूरा, अना इसरायल जाती को महा राजा आस।”
50 यीसु ना उनला जवाब दियो, “मीना जो तोरो लक कव्हयो का मिना तोला अँजीर को झाड़ को खाल्या चोवयो सेव का तू एकोलाय भरोसा राखासे? तू एको लक मोठो-मोठो काम चोवजोस।” 51 मंग वोको लक सांग्यो मी तूमी लक खरो-खर सांगसू का, “तुमी सरग ला उघड़ो हुयो अना परमेस्वर को सरगदूत गिनला वरता जातो अना मानूस को टूरा†यीसु खुद को बारेमा कव्हासेत ला खाल्या उतरतो चोवने।”