मरकुस के व्दारा लिखा यीसु मसीह का सुसमाचार
मरकुस लक लिख्यो यीसु मसीह को साजरा बारता
परिचय
मरकुस को नवा करार, इंजील को साजरा बारता को चार किताब लक एक से। यो मा यीसु मसीह को जिंदगानी को बारे मा लिख्यो से, साजरी बारता, मजे “साजरा खबर” सेत, “साजरा बारता” को किताब को लेखक, मत्ती, मरकुस, लूका अना योहन सेत। यो किताब यीसु को मरनो को मंघा लिख्यो सेत। मरकुस को किताब चारो साजरा बारता को किताब मा सब लक नहान किताब से। यो भी मसीह को जलम को मंघा 65-70 साल को बीच लिख्यो गयो सेत, काही गियानीगिन अना गजब लोकगीन, को असो माननो से, का यो रोम राज को ईसाईगिन ला बढ़ावा देवन काजी, लिख्यो गयो होतो। योहन, मरकुस, पेरीत पौलुस, अना बरनबास को एक सँगी होतो, पर जब वोला आपरो मिसनरी या मा वय संग नही ले गईन। तबा वोको मान ला गजब चोट लगयो, मजे बेइज्जती जसो लगन लगयो होतो पेरीत 13:13 मंग मरकुस बरनबास को संगा या मा ले गयो। पेरीत 15:37-39 मरकुस अना पतरस दुई। 1 पतरस 5:13 गाढो संगी होतिन। यो यीसु के जीवन ला डोरा लक नही चोवयो होतो। गियानी को माननो सेत का मरकुस ला पतरस ना जोन गवाही दियो होतो। वोच यो साजरा बरता को आधार सेत। साजरा बारता को आखीर मा मरकुस ना यीसु को आखीर सिक्सा चेला बननो पर आधारित सेत।
मरकुस लक लिखयो सजरा बारता को दोन बिसय मजे, यीसु को सच्चो चेला बननो या आखट्ट को भबिस्य को बारे मा यीसु लक दियो गयो सिक्सा।
मरकुस लक लिख्यो सजरा बारता मा यीसु ला नरम सेवक या आपरो बाप को इक्सा पुरो करनो मा हमेसा तैयार, असो परमेस्वर ला यो दोन रुप मा दरसा यो गयो से, यो साजरा बारता को अखट्ट यीसु को चेला गीनला दियो गयो महान आदेस से।
रूपरेखा
1. मरकुस को किताब को भुमिका 1:1-13
2. यीसु को यातरा को बारे मा मरकुस लिख्यो से। जबा उ मा गलील नगर मा होत्यो 1:14—9:50
3. यीसु ना यरुसलेम नगर की यातरा को बारे मा सांगीस 10:1—12:44
4. यरुसलेम नगर मा यीसु को बेरा मा, वोकी खबर। 13:1-37
5. मरनो अना जित्तो होवनो अना आखरी सिक्सा लक लिखनो खतम होवासे। 14:1—16:20
1
योहन बप्तिस्मा देवनवालो को परचार
(मत्ती 3:1-12; लूका 3:1-18; योहन 1:19-28)
1 यो परमेस्वर को टूरा*परमेस्वर को टूरा यीसु मसीह को साजरा बारता से। 2 येको सुरुवात जसो की यसायाह भविस्यवक्ता को किताब मा लिखयो गयो होतो। की आयको,
परमेस्वर ना कहीस “मि एक दुत ला धाड़ूसू,
जो तोरो लाई रास्ता सुधारेत।”
3 “बियाबान मा कोनी हाकल रहयो होतो,
की पिरभु को गाडादान ला तैय्यार करो अना
ओको पगदन्डी ला सीधो करो।”
4 एकोलाय योहन आयो, अना मुनादी करयो “आपरो पाप लक मन हटाव अना बप्तिस्मा लेव, तब परमेस्वर तुमरो पाप ला छिमा करयेत।” 5 अना यहुदिया छेतर लक अना यरुसलेम नगर का गजब सा रव्हन वारा हिटके योहन जवर आइन। अना आपरो पाप ला मानके यरदन नदी मा लक बप्तिस्मा†पानी मा बुड़की लगावनो लेइन।
6 योहन ऊट को चुन्दी को कपरा घालत होतो। अना आपरी कमर मा चमड़ा को पट्टा बान्धत होतो। अना फाफा‡जंगली किड़ा या एक परकार को सेंगा सहेद जेवत होतो। 7 अना यो परचार करत होतो की “मोरो मंघा उ आवन वालो से जो मोरो लक ताकतवर से। मि यो काबिल नही सेऊ, की नवके ओको सेन्डिल की दोरी खोलू। 8 मि तो तुमला पानी लक बप्तिस्मा देसू पर, उ तुमला पवीतर आतमा§परमेस्वर को आत्मा जोन निराकार रुपमा मानूस को हिरदय मा काम करा से, अना परमेस्वर को जघा मा होयके काम करा से। लक बप्तिस्मा*पाप को लाय मरनो अना भलो काम को लाय जिवनो। देहे।”
यीसु को बप्तिस्मा अना परिक्सा
(मत्ती 3:13—4:11; लूका 3:21-22; 4:1-13)
9 ओना बेरा मा यीसु ना गलील छेतर को नासरत नगर लक आयके, यरदन नदी मा योहन लक बप्तिस्मा लेइस। 10 जसोच यीसु पानी लक हिटीस वसोच बादल उघड़तो हुयो अना पवीतर आतमा परेवा को जसो ओको वरता उतरतो चोवीस। 11 अना बादल लक आवाज भई “की तु मोरो चहेतो टूरा आस, तोरो लक मि बेहद खुस सेउमत्ती 12:18; मरकुस 9:7।” 12 तबा परमेस्वर की पवीतर आतमा ना गदने ओला जंगल कन ले गयो। 13 अना जंगल मा चालीस दिवस तकन सैतान ना ओकी परिक्सा लेईस, अना उ जंगल-को जनावर को संग रहयो; अना सरगदूत ओकी सेवा करता रहीन।
यीसु को सेवा को सुरुवात
(मत्ती 4:12-17; लूका 4:14-15)
14 योहन ला जेल मा डाकनो को मंघा, यीसु ना, गलील छेतर मा आयके, परमेस्वर को राज को साजरा बारता ला परचार करन लगयो। 15 अना कव्हयो “बेरा भई गई से, परमेस्वर को राज कठा आय गई से पाप ला छोड़ोमत्ती 3:2 अना साजरा बारता पर भरोसा राखो।”
चार ढीमर ला हाकलनो
(मत्ती 4:18-22; लूका 5:1-11)
16 गलील को झील को कगर जावत-जावत, ओना समौन अना ओको भाऊ अन्दिरयास ला झील मा जाल डाकत देखीस, काहेकि वय ढिमर होतीन। 17 अना यीसु ना उन लक कहीस “मोरो मंघा आव! ता मि तुमला मसरी धरन की जघा लोकगीन ला परमेस्वर को राज मा आननो सिकाहु।” 18 वय गदने जाल ला सोड़के ओको मंघा भय गईन।
19 काही दूहुर जायके ओना जबदी को टूरा याकूब, अना ओको भाऊ योहन ला, नाव मा जाल ला सुधारता चोविस। 20 ओना गदने उनला हाकलीस, अना वय आपरो बाबूजी जबदी ला बनिहार को सँग नाव पर सोड़के, यीसु को मंघा चली गईन।
यीसु बुरो आतमा वालो मानूस ला साजरो करनो
(लूका 4:31-37)
21 यीसु अना चेलागीन कफरनहुम नगर मा आइन। अना उ गदने यहुदी गीन को बिसराम को दिवस मा पिराथना घर†यहुदि गिनको पिराथना घर मा जायके सिक्सा देवन लगयो। 22 अना लोक गीन ओको सिक्सा लक चकित भईन, काहे की उ उनला मोसे को नियम को गुरू जसो नही, पर अधिकार लक सिक्सा देवत होतो।मत्ती 7:28-29
23 अना ओनो बेरा, यहुदीगीन को सभाघर मा एक मानूस होतो। जोनमा एक भुत होतो। 24 ओना चिल्लायके कव्हयो “ओ यीसु नासरी हमरो लक तोरो काजक काम से? का तु आमीला नास करन ला आईसेस? मी तोला जानासू, तू कोन आस? परमेस्वर कन लक धाड़ो गयो पवीतर मानूस आस!”
25 यीसु ना भूत-पलीत ला डटकार के कहीस “उघो-मुघो रव्ह, अना ओमा लक हिट जाय।”
26 तबा भुत ओला मरोड़ के अना मोठो आवाज लक बेमीया के ओमा लक हिट गयो। 27 एको लाई सब लोकगीन अचंभा करता हुया आपस मा गोस्टी करन लगीन की “यो कसो गोस्टी आय? यो तो कोनी नवो सिक्सा से? उ अधिकार को संग भुत ला भी हुकूम देवासे, अना वय ओको हुकूम मानासेती।”
28 एकोलाय या गोस्टी गलील छेतर को इतानी-उता लगत देस मा फैल गयो।
लगत सा रोगीगीन ला चांगलो करनो
(मत्ती 8:14-17; लूका 4:38-41)
29 जसोच यीसु पिराथना घर चेलागीन याकूब अना योहन को संग समौन अना अन्दिरयास को घर आयो। 30 समौन की सासु बीमारी लक खाट मा लेटी होती एकोलाय वोको बारे मा यीसु ला सांगिन। 31 तबा ओना जवर जायके ओको हात धर के ओला उचलीस अना ओको बुखार उतर गयो अना वा वोकी सेवा करन लगि।
32 झुलाखाली जबा दिवस बुडतो बेरा भय गयो तो लोक सब बीमार ला अना जिनमा भुत आतमा होतीन यीसु को जवर आनीन। 33 अना नगर को सप्पा लोकगीन बेसकुड़ को जवर एकठ्ठो भइन। 34 अना यीसु लगत लोकगीन जोन गजब-गजब को बीमारी‡रोग से लक परेसान होतीन, उनला साजरो करीस, अना लगत बुरो आतमा ला हेड़िस। पर उनला बोलन लक मना करीस। काहे की वय ओला चिन्हत होतीन।
एकलो मा यीसु को पिराथना करनो
(लूका 4:42-44)
35 यीसु पहट को बेरा दिवस हिटन लक लगत पुढा, जाग के हिटयो, अना एकांत जघा मा गयो, उता पिराथना करन लगयो, 36 तबा समौन अना ओको संगी ओला ढुंढन ला गईन। 37 जबा उ मिलयो, तो ओको लक कहिन “की सब लोक तोला ढुंढ रही सेत।”
38 ओना उन लक कहीस “आव हमि अखीन कोनी गांव-बस्ति मा जाबिन, की मि उता भी साजरा बारता सांगु, काहे की मि परचार करन लाई आइसेव।”
39 अता उ सप्पा गलील छेतर मा यहूदी गीन को पिराथना घर मा जायके गोस्टी सांगत होतो अना बुरो आतमा ला हेड़त होतो।मत्ती 4:23; 9:35
कोढ को रोगी ला साजरो करनो
(मत्ती 8:1-4; लूका 5:12-16)
40 एको मंघा एक कोढी यीसु कठा आयके ओको लक बिनती करन लगयो अना ओको पुढा टोघरा टेकके कव्हयो! “यदि तु चाव्हसेस तो मोला साजरो कर सकसेस।”
41 ओना ओको पर दया करके हात बड़ाइस, अना ओला छुयके कहीस “मि चाव्हसू की तु साजरो होय जाय।” 42 अना ओको कोढ सजरो भय गयो अना उ साजरो भय गयो। 43 तबा यीसु न चेताय के वोला सार करीस। 44 मंघा ओको लक कहीस “आयक! कोनी ला काही नोको कव्हजोस। पर जायके आपरो आप ला याजक§अरपन करन वालो पुजारी ला दिखाजोस, अना आपरो साजरो होवन को बारे मा जो काही मोसे ना ठहराईसेस, ओला चढावा चढाजोस, का उनला गवाही भई जाय।”
45 पर उ जयके यो गोस्टी ला लगत सांगन लगयो अना यहान तकन परचार भयो। की यीसु मंग खुल्लम-खुल्ला नही फिरयो। पर बाहेर जायके जगंली जघा मा रहयो। अना चारो कन लक लोक ओको जवर आवत होतिन। अना कोनी मोठयो नगर मा नही जाय सकयो।
*1:1 परमेस्वर को टूरा
†1:5 पानी मा बुड़की लगावनो
‡1:6 जंगली किड़ा या एक परकार को सेंगा
§1:8 परमेस्वर को आत्मा जोन निराकार रुपमा मानूस को हिरदय मा काम करा से, अना परमेस्वर को जघा मा होयके काम करा से।
*1:8 पाप को लाय मरनो अना भलो काम को लाय जिवनो।
1:11 मत्ती 12:18; मरकुस 9:7
1:15 मत्ती 3:2
†1:21 यहुदि गिनको पिराथना घर
1:22 मत्ती 7:28-29
‡1:34 रोग से
1:39 मत्ती 4:23; 9:35
§1:44 अरपन करन वालो पुजारी