3
Mayur ermänu cananpäga ¿imanötaj canman?
1 Rasunpa pipis inlisyacho mayur ermänu cayta munarga allitami yarpaycan. 2 Mayur ermänuga canman pipitapis mana jamurpasha, juc warmillapa majan, alli tantiyacoj, sumaj yarpachacurir imatapis ruraj, rispëtuyoj, runa-masinta cuyapar pachächej y yachachinanpaj listu caycaj. 3 Upyallacho, pillyallapaj ama canmanchu. Chaypa ruquenga cuyapäcunman. Allilla goyanman. Guellayllapäga ama imatapis ruranmanchu. 4 Warminta wamrancunata alli uywanman. Wamrancunatapis yachachinman wiyacoj car pï-maytapis rispitananpaj. 5 Famillyanta sumaj mana uywarga ¿imanöparaj Tayta Diosman yäracojcunata alli ricanman? 6 Mushoj ermänucunaga inlisyacho mayur ermänu cayta ama ashinmanchu. Mayur ermänu cananpaj churaptenga capaschari yachaj-tucunman. Yachaj-tucorga Satanás castigasha cashannömi paycunapis castigasha canga. 7 Mayur ermänu cayta munajcunaga Tayta Diosman mana yäracojcunapitapis alli rispitasha canman. Chauraga pipis manami manacajman churangachu. Chaynöpami Satanaspis mana engañanganachu.*Tito 1.6–9
Diácono cananpäga ¿imanötaj canman?
8 Chaynöpis diaconucunaga canman pipitapis alli ricasha, imapäpis parlashantaga cumlej, mana upyaj, guellayllapaj mana wañoj. 9 Tayta Diosninchi nishancunata yachacushannölla juchata mana ruraypa cawanman. 10 Chaynömi diácono cayman pitapis churananpäga jinyunta sumajraj musyapanman. Imano cawashantapis sumajraj ricanman. Alli cawashanta ricar-raj diácono cananpaj churanman.
11 Warmicunapis*Waquin yarpan diaconucunapa warminpaj rimaycashanta. Waquinna yarpan diaconisapaj rimaycashanta (ricay Rom. 16.1). cachun pï-maypitapis alli ricasha, pipa washantapis mana rimaj, mana upyaj, nishanta cumlej.
12 Diaconucunaga juc warmillawan goyaj canman. Warminta, wamrancunatapis sumaj ricanman.*Hech. 20.4; Efe. 6.21–22; Col. 4.7–8; 2Tim. 4.12 13 Pipis inlisyacho diácono carga pï-maypitapis amatar alli ricashami canga. Tayta Jesucristumanpis sumajmi yäraconga.*Hech. 18.24; 1Cor. 16.12
Pablo imapaj cay cartata apachishanpis
14 Timoteo, shamuyta munaycarpis rimëroga cay cartatami apachicamö. 15 Juclla mana shamuptë-imaga cay cartacho niycänami Tayta Diosman yäracojcuna imano alli cawananpaj cashantapis. Noganchëga cawaycaj Diospa wamranmi caycanchi. Chaynöpis noganchïmi rasun cajta niycanchi. Llutancunata Tayta Diosninchïpaj rimaptinpis rasun cajta tantiyachinanchïpämi caycanchi.
16 Llapanchïmi musyanchi Jesucristupa willacuynin llapanpitapis mas alli cashanta.
Jesucristoga runami yuriran.
Wañuptinna Espíritu Santu cawarachimuran.
Anjilcunapis ricashpan aduraran.
Willacuynenga maychöpis willacusha caran.
May-chaychöpis paymanmi yäracuran.
Syëluman cutirnami Tayta Diospa ñaupanman chayaran.