14
1 «Gamcunaga Tayta Diospa cuyay wamrancunami canqui. Chaymi pipis wañuptin Diosman mana yäracoj runacuna rurashanno cuerpuyquicunata ama pishtaypa pishtar cuchucunquichu ni urcuyquicunapapis ama galaypa rutucunquichu.*Lev. 19.28; 21.5 2 Gamcunaga Tayta Dios acracushan runacunami caycanqui. Paymi llapan nasyun runacunapitapis gamcunata acrasha-cashunqui cuyaynin canayquipaj.*Éxo. 19.5–6; Deut. 4.20; 7.6; 26.18; Tito 2.14; 1Ped. 2.9
Limyu caj, ganra caj animalcuna
(Lev. 11.1–47)
3 «Ganra cajtaga ama imatapis micunquichu. 4 Micunayquipaj caj uywacuna caycan wäca, uysha, cabra, 5 lluychu, tarush, llapan wagrayojcuna, jacha cabracuna. 6 Maygan uywatapis gamcunaga micunqui chajchaj cajta, gasha shilluyoj cajta. 7 Ichanga chajchaj captinpis, gasha shilluyoj captinpis waquin uywacunata ama micunquichu.
«Ama micunquichu camëlluta, gopita, wishcashta. Chaycunataga ganrapa rejsinqui chajchaj captinpis shillun mana gasha cashanpita.
8 «Cuchi aychatapis ganrapa ricanqui. Shillun gasha captinpis manami chajchanchu. Chaymi aychanta ama micunquichu. Wañuptinpis ama yatanquichu.
9 «Yacucho tiyajcunatapis micunqui alëtayojcunallata, pispayojcunallata. 10 Alëtaynaj pispaynajtaga ama micunquichu. Chaycunataga ganrapa rejsinqui.
11 «Pärejcunatapis limyu cajllata micunqui. 12 Ama micunquichu ancata, quebrantahuesosta, gocha ancata, 13 milanota, tucuy-niraj quillicsacunata, 14 tucuy-niraj cuervocunata, 15 avestruzta, chushyajta, wachwata, llapan casta ancacunata, 16 tucuta, ibista, cisneta, 17 pelicanota, wisculta, cormorán nishan yacu pätuta, 18 cigüeñata, abubillata, chicchita.
19 «Älayoj cajtaga llapan curucunatapis ganrapami rejsinqui. Chaycunataga ama micunquichu. 20 Limyupa rejsisha caj älayojcunata ichanga micunqui.
21 «Gamcunaga Tayta Dios acracushan runacunami canqui. Chaymi ima animaltapis quiquillan wañushataga ama micunquichu. Chaypa ruquenga siudäniquicunacho tiyaj jäpa runacunatami goycunqui micucunanpaj. Caminanti jäpa runacunatapis micunanpaj ranticuycunquimanmi.
«Cabra-mallwapa aychanta ama yanunquichu mamanpa lëchinwanga.*Éxo. 23.19; 34.26
Diesmupaj Moisés willapashan
22 «Cada wata cosëchata usharcullar mana gongaypa diesmuta raquinqui.*Lev. 27.30–33; Núm. 18.21; Mal. 3.8–10 23 Chaymi rïguta cusichar, bïnuta rurar, olivopita asëtita rurar cada chunca tupuypita juc tupuyta raquinqui diesmupaj. Wäcayquipa, uyshayquipa, cabrayquipa wawancunapita cada chuncapita jucta raquinqui diesmupaj. Chay diesmutaga Tayta Diosta maychöpis aduranayquipaj acrashan pachaman apaycur paypa ñaupancho micunqui. Chaynöpami Tayta Diosta imaypis sirbinquipaj. 24 Tiyashayquipita chay pacha alläpa carucho captenga Tayta Dios bindisyunta goshushayquipita jorgushayqui diesmuta apayta mana camäpacorga 25 ranticuycunqui. Nircur guellayllatanami apanqui Tayta Diosta aduranayquipaj acrashan pachaman. 26 Chaychönami ranticushayqui guellaywan munashayquita rantinqui wäcata car, uyshata car, bïnuta car, ima machächicojta carpis. Nircorga Tayta Diospa ñaupancho llapan famillyayquicunawan cushicushpayqui micunqui.
27 «Marcayquicho tiyaj Leví trïbu runacunataga mana gongaypa yanapanqui. Paycunapaga manami chacrapis canchu.
28 «Cada quimsa watacho micuyniquicuna shuntashayquipita diesmuta raquinqui. Chaycunataga siudäniquicunacho shuyni churanqui. 29 Chaypitami pacha junta miconga Leví trïbu runacuna, gamcunacho tiyaycaj jäpa runacuna, wacchacunawan biyüdacuna. Chayno micunanpaj churaptiquimi Tayta Diospis arushayquiman bindisyunta churamonga.