Efesios
¿Llapantapis maquincho chararaycaj Tayta Diospita mas juc munayniyoj canchuraj?
¿Imatataj ruraycanchi ermänucuna juc shongunölla cawananpaj?
¿Pitaj isquirbiran? Apóstol Pablo.
¿Picunapätaj isquirbiran? Cay carta caran Éfeso siudächo caycaj ermänucunapämi.
¿Imaytaj isquirbiran? Romachöna carsilcho caycashanpitami wata 62 d.C. wichan cay cartata Pablo isquirbiran.
¿Imataj cay librucho caycan? Achca nasyuncunata Roma maquincho chararashan-wichanga Éfeso caran jatuncaray siudämi. Chay siudämanga Pablo chayaran ishcay cutimi. Ishcay cuti cajcho aywar chay siudächo Pablo goyaran ishcay wata mas (Hech. 18.19–21; 19.1–20.1). Efesucho caycaj ermänucunaga sumajmi Tayta Diosman yäracuran. Paycunaga Tayta Diosman yäracur fiyupami ñacaran (Apocalipsis 2.1–3). Chaura Pablo shacyaycächin. Y willapaycan imano goyänanpäpis.
Cay carta gallariycan Tayta Jesucristuta cachamur achca bindisyunta Tayta Dios gomashanchïpita alabashpanmi (1.3–14). Chaypitana sïguir Tayta Diosta agradësicun y mañacun (1.15–23). Nircur rimaycan Jesús imatapis rurashancunapita. Pay cruscho wañuyninpami cananga llapanchi salbacuycanchi. Israel runa carpis mana Israel runa carpis juc shongullana Tayta Diosta sirbircaycan (2.1–22). Pablo sumaj cushicun chayno Tayta Diosman yäracur juc shongunöllana cawaptinmi (3.1–13). Chayno cushisha carmi Tayta Diosta mañacur alabaycan (3.14–21).
Waquin caj yachachishanga caycan imanöpis rurananpaj cajmi. Chaura ermänucunaga juc shongunölla alli ricanacur Tayta Diospa maquincho goyäshun. Chayno cawananchïpaj Jesucristumi cruscho wañuran (4.1–5.20). Wasinchïchöpis juc shongunölla alli ricanacur cushisha cawashun (5.21–6.9).
Cay carta ushananchönaga shacyaycächin munayniyoj espiritucuna cay pachacho imata ruraptinpis sïguir Tayta Jesucristuman yäracuycänanchïpami (6.10–20). Ushanantaga Efesucho caj ermänucunapita dispidicun wamayashpan. Chaynöpis paycunapaj mañacuycan Tayta Diosta y Tayta Jesucristuta (6.21–24).
1
Carta gallaycunan
1 Éfeso*Hech. 18.19–21; 19.1 siudächo caycaj ermänucuna:
Noga Pablumi cay cartata apachicamö. Nogataga Jesucristupa apostulnin canäpaj Tayta Diosninchïmi acramasha. Gamcunapis Tayta Dios acrashan carmi Jesucristuman yäracur pay munashanno carcaycanqui. 2 Tayta Diosninchi y Taytanchi Jesucristo cuyapaycushunqui ari alli cawanayquipaj.
Tayta Diosta Pablo agradësicushan
3 ¡Tayta Diosninchïta alabashun! Paymi Taytanchi Jesucristupa taytan. Paymi Jesucristu-raycu syëlupita-pacha tucuy bindisyunta gomanchi. 4 Pay-raycumi cay pachata manaraj camar Tayta Diosninchi acramashcanchi perdunasha car paypa ñaupancho juchaynaj cawananchïpaj. 5 Jesucristu-raycu cuyapämashpanchïmi unaypita-pachana acramaranchi wamrachacamänanchïpaj. Chaynöga camacächisha quiquin munashannömi. 6 Chaynöga rurasha cuyapämashanchïpita imaypis Tayta Diosninchïta alabananchïpämi. Cuyay wamran-raycumi Tayta Diosga chasquimashcanchi. 7 Wamran Jesucristo cruscho wañur yawarninta jichashanpitami*Mar. 10.45; 14.24; Heb. 9.12–14 juchanchïcunata Tayta Diosninchi perdunamashcanchi.*Col. 1.14 8 Chaynöpis cuyapämashpanchïmi alli yarpayta gomashcanchi sumaj tantiyacunanchïpaj.
9 Tayta Diosga quiquillan musyashanta musyachimashcanchi. Chaymi Tayta Diosninchi unaypita-pacha yarpashanga Jesucristo chayamuyninpa cumlisha. 10 Unaypita-pachami Tayta Diosga yarparan syëlucho caycajcunapis, cay pachacho caycajcunapis Jesucristupa munaynincho cananpaj. Chaycunataga nishan junajmi cumlenga.
11 Nogacunatapis Jesucristu-raycumi Tayta Diosga unaypita-pacha acracamasha erensyata chasquinäpaj. Tayta Diosninchëga llapantapis yarpashanno ruraj carmi aunimashan partisyunta gomanga. 12 Rimëruga camacächisha nogacunaraj Jesucristupa alli willacuyninta chasquicunäpaj, pay munayniyoj cashanpita alabanäpaj. 13 Gamcunapis alli willacuyninta wiyar Jesucristuta chasquicurmi salbasyunta tarishcanqui. Chaynöpami Tayta Diosninchi aunishan Espíritu Santuta chasquicushcanqui señalashano paypäna canayquipaj.*Luc. 24.49; Juan 14.26; 16.13–15; Hech. 1.4; 2.33 14 Chay Espíritu Santupa munaynincho cawarmi*2Cor. 1.22 musyanchi syëluman chayar chasquinanchïpaj cashanta. Chayno Tayta Diosninchi camacächisha imaycamapis alabananchïpämi.
Ermänucunapaj Tayta Diosta Pablo mañacushan
15 Taytanchi Jesucristuman alli yäracushayquita, ermänucunawan cuyanacushayquita musyä. 16 Chaymi mana gongaypa Tayta Diosninchïta mañacur gamcunapaj agradësicuycä. 17 Chaynöpis Jesucristupa taytan Diostami mañacö Espiritunwan sumaj tantiyachishunayquipaj. Chaynöpami Tayta Dios imano cashantapis musyanquipaj. 18 Payta mañacö imaypis alli yarpayta goshunayquipaj. Chayrämi musyanquipaj imapaj salbashushayquitapis; chasquinayquipaj caycaj erensya fiyupa alli cashanta; 19 Payman yäracojcunataga Tayta Diosninchi fiyupa munayninwan yanapashanta, chay munaynenga imamanpis mana tincushanta. Chay munayninwanmi Tayta Diosninchëga 20 Jesucristuta wañushanpita cawarircachimur syëlucho derëchu caj-lädunman jamachisha.*Sal. 110.1 21 Chaynöpami Jesucristuta Tayta Diosninchi churasha pï-may runapitapis, anjilcunapitapis, dyablucunapitapis cay bïdacho juc bïdachöpis mas munayniyoj cananpaj. 22 Chaynöpami Tayta Diosninchëga llapantapis Jesucristupa maquillanmanna churar*Sal. 8.6 inlisyapapis umanno cananpaj churasha. 23 Chaura inlisyapäga Jesucristo caycan cuerpupa umannömi. Chaymi paypa maquincho captinchi may-chaychöpis noganchïwan caycan. Pay munashanno cawananpaj cumlëtunami caycan.*Col. 1.18