Hageo
Tayta Diosta adurananchïpaj juc wasi captin ¿allichu canman?
¿Israelcunaga imanötaj ricaj Templuta?
¿Pitaj caran? Hageo ninan caycan «fista» ninanmi. Israelcuna juc-lä nasyunman prësu aywashanpita Jerusalenman cutimushan-wichanmi payga profëta caran. Esdras 5.1; 6.14 rimaycan chay-wichan Hageo y Zacarías profëta cashantami.
¿Maychötaj willacuran? Hageo willacuran Judá nasyuncho caycaj Jerusalén siudächömi. Tayta Dios acrashan runacuna chayrämi Babiloniapita cutimusha caran.
¿Imaytaj willacuran? Pay willacushanchöga tantiyaycächimanchi Tayta Diospa willacuyninta chuscu quilla willacushantami. Willacuran Persia nasyuncho Darío ray caycaptinmi (520 a.C.).
¿Imataj caycan cay librucho? Wata 539 a.C. ray Ciromi niran Persiapita Israelcuna nasyunninman cuticunanpaj (Esd. 1.1–4). Chay cutimojcunami Templupa simintuncunata, altarta allchachiran (Esd. 3). Chaypitaga chunca isgunnin (19) watami aruyta cachaycäriran. Chaycamaga wasincunata y chacrancunacho arucuran. Chay wichanmi fiyupa usya caran. Chaura micuypis mana wayuranchu.
Hageo willacuycan imanir usya caycashanta, imanir micuy mana sumaj wayushantapis. Pay niycan juc-lä nasyunpita cutimojcuna Templuta aruyta mana ushashanpita ñacaycashantami. Chay runacunaga quiquincunapa wasinta rurashanami caran. Tayta Diosta aduranan Templutami ichanga rurayta mana usharanrächu. Chayno willacuptin Israelcunaga wiyacuran (1.12–15).
1
Templuta yapay jatarachinanpaj piñacushan
Ray Darío mandar ishcay wataman aywaycaptin sojta caj quilla rimir junajcho Tayta Diosga profëta Hageota willaparan. Willaparan Judäpa gobernadornin Zorobabelpaj. Payga Salatielpa wamranmi caran. Chaynöpis willaparan cüracunapa mandajnin Josuëpaj. Payga Josadacpa wamranmi caran.* Esd. 4.24–5.2; 6.14
2-3 Munayniyoj Tayta Diosga profëtanwan willacachishpan caynömi niran: «Cay runacunaga nircaycan: ‹Tayta Diospa Templunta yapay jatarachinapäga pishinrächu› nir. Nogapa Templö juchuchir-ushacasha caycaptin ¿gamcuna alli wasicunacho, cuyayllapaj wasicunacho tiyanayqui camacanchu? Noga munayniyoj Tayta Diosmi në:
«Imano cawaycashayquitapis sumaj yarpachacuy.
Gamcunaga aypallatami murupacunqui;
ichanga wallcallatami shuntanqui.
Micushpayquipis jinallami yargaycanqui.
Upushpayquipis jinallami yacunarcaycanqui.
Sumaj pitucurpis manami goñurinquichu.
Arupacuptiqui pägashushayquipis manacajnöllami ushacäcun.
«Noga munayniyoj Tayta Diosmi në:
«Imano cawaycashayquitapis sumaj yarpachacuy.
Puntacunaman ayway-llapa.
Chaypita guerucunata apaycamushpayqui Templuta yapay jatarachiy.
Templuta jatarachiptiqui nogaga cushicushämi.
Chaymi nogaga alabasha cashaj.
Gamcunaga achcata ashirpis
wallcallatami tarinqui.
Wasiquicunaman churacushayquitapis
Nogaga juc pücayllawanmi apacushaj.
Chaynöga ¿imanirtaj rurashaj?
Chaynöga rurashaj tiyanä Wasi pasaypa juchuchisha captinmi.
Chaynöta ricaycarpis gamcunaga yarpachacurcaycanqui quiquiquipa cajcunallapämi.
10 Chaypitami gamcunamanga mana tamyamunchu.
Micuyniquicunapis mana wayunchu.* Lev. 26.18–20
11 Nogami camacächishcä fiyupa usya cananpaj,
jircacunacho cajpis shanaywan chaquinanpaj,
rïgu, übas, olivo chacrayquicuna chaquicäcunanpaj,
maycho caycaj micuypis chaquicäcunanpaj.
Runa, ni animalcuna imata arushanpis yangallanami caycan.»
Mandajcunawan llapan runacuna aruyta gallaycärishan
12  Tayta Dios chayno Hageowan willacachishanta wiyaycärir Zorobabel, Josué, waquin runacunapis fiyupa manchariran. 13 Chaura Tayta Diospa profëtan Hageoga cayno willaparan: «Tayta Diosga nin: ‹Noga Tayta Diosmi në: Nogaga gamcunawanmi caycä.› »
14-15 Chayno nishpanmi Tayta Diosga shacyächiran Judäpa gobernadornin Zorobabelta, cüracunapa mandajnin Josuëta, waquin runacunatapis. Chaypitaga ray Darío ishcay wata sojta quillanna mandaycaptin ishcay chunca chuscu (24) junajnincho gallaycäriran munayniyoj Tayta Diospa Templunta yapay jatarachiyta.* Esd. 5.2

*1:1 Esd. 4.24–5.2; 6.14

*1:10 Lev. 26.18–20

*1:14-15 Esd. 5.2