6
Isaiasta Tayta Dios gayashan
1 Ray Uzías wañushan watachömi Tayta Diosta ricarä fiyupa cuyayllapaj jamacunacho syëlucho jamaraycajta. Templu rurichöga jacurashanpa cantuncuna junta mashtaraycasha.*2Rey. 15.7; 2Crón. 26.23 2 Paypa jananpanami caycaran nina ratataycaj serafín anjilcuna. Cada-ünun caycaran sojta älayoj. Ishcay älanga caran gagllanta chapacunanpaj. Mas ishcay cajna caran cuerpunta chapacunanpaj. Yapay ishcay cajna caycaran pärinanpaj. 3 Paycunami gayaraypa ninacuycaran:
«Munayniyoj Tayta Diosga
Santo, Santo, Santumi.
Paypa munayninmi intëru pachacho juntasha caycan.»*Apoc. 4.8
4 Chayno nishan wiyacaptin Templupa puncuncunapis sicsicyaran. Templu rurichöpis goshtay juntacurcuran.*Apoc. 15.8 5 Chaymi nogaga gapachacur nirä: «¡Ay, cananga wañushächari! Nogaga juchayoj runa caycashpämi, juchasapa runacunawan tiyaycashpämi caway-ñawëpa ricashcä munayniyoj Tayta Diosta. Rayninchi Tayta Diostami ricashcä» nir.*Éxo. 33.20
6 Chayno rimaycaptë juc serafín anjil päriypa shamuran noga cajman. Tinäsuwan apamuran altarpita jorgamushan shanshata. 7 Chayta shimëman tanurcur nimaran:
«Cay shanshacunami shimi wirpayquiman töpasha.
Cananga mananami juchayojnachu canqui.
Juchayquicunapita perdunashanami caycanqui.»
8 Chaypitaga Tayta Diostana wiyarä cayno niycajta: «¿Pitaraj cachashaj? ¿Piraj canga nogacunapa willacoj cachä?»
Chaura noga nirä: «Tayta, caycho noga caycä. Nogata cachamay ari.»
9 Paynami nimaran: «Aywar chay runacunata cayno niy:
« ‹May-jina wiyashpayquipis manami tantiyanquipächu.
May-jina ricashpayquipis manami cuentata gocunquipächu› nir.
10 Isaías, chay runacunapa yarpayninta ticrachiy mana tantiyajman.
Rinrincunatapis llutarcuy mana wiyananpaj.
Ñawintapis chaparcuy mana ricananpaj.
Chaynöpami mana ricar mana wiyar mana tantiyangachu.
Chaynöpami mana arpinticongachu.
Chayno captenga nogapis manami allchacächishächu.»*Eze. 12.2; Mat. 13.14–15; Mar. 4.12; Luc. 8.10; Juan 12.40; Hech. 28.26–27
11 Chayno nimaptin tapurä: «Tayta, ¿imaycamaraj chaynöga canga?» nir.
Paynami nimaran:
«Chaynöga canga siudäcuna ushajpaj illgänancamami,
chay siudächo runacuna jucnayllapis mana tiyanancamami,
wasicunapis chunyaj canancamami,
chacracunapis purunyänancamami,
12 runacunata juc-läman prësu apachinäcamami,
nasyun chunyaj quëdanancamami.
13 Nasyuncho cada chuncapita jucnaylla quëdasha captinpis
ushajpämi illgächishaj.
Ichanga gueruta muturiptin runcun quëdashannömi quëdanga.
Chaypitami Tayta Dios acrashan chillguimonga.»