11
Davidpita miraj mandananpaj cashan
1 Tumpupitaga chillguinmi.
Chaynöllami Davidpa papänin Isaïpitapis*1Sam. 16.1–20 juc ray yurenga.*Apoc. 5.5; 22.16
2 Paychöga Tayta Diospa Espiritunmi caycangapaj.
Chaymi yachaj canga; yarpaysapa canga;
yarpachacuycur imatapis ruranga; callpasapa canga;
musyaj canga; Tayta Diosta rispitanga.
3 Payga Tayta Diosta rispitashpanmi fiyupa cushiconga.
Payga manami ricärillarchu jusganga.
Castigacänanpäpis manami jucpa shimillanwanchu nenga.
4 Pipis mana yanapashancunata alli arriglanga.
Nasyuncho caj pobricunatapis rispitacachenga.
Paymi nenga ñacachicojcuna castigacänanpaj.
Paypa jämaynenga espädanömi fiyucunata wañurachenga.*2Tes. 2.8
5 Pay imaypis alli cajllata, rasun cajllata ruraj cashanmi canga
chegllanta watacunanno.*Efe. 6.14
6 Chauraga atojpis uyshawan tallushanami purengapaj.
Tinriwan cabra-mallwapis iwalmi puñongapaj.
Besërawan liyunpis iwalmi caycangapaj.
Chaycunataga juc wamrallanami michengapis.
7 Wäcapis ösupa läduncho micur goyäconga.
Wawancunapis iwalmi goturpangapaj.
Liyunpis buyinömi guewatana micongapaj.
8 Lätaycaj wamranami pucllanga fiyupa benënuyoj culebrapa uchcuncho.
Chayraj wasguisha wamrapis maquinta jatenga culebrapa gueshtanman.
9 Jerusalenchöga mananami pipis mana allita ruranganachu.*Isa. 65.25
Imanömi lamarcho yacu juntan,
chaynömi cay pachachöpis Tayta Diosta rispitaj runacunallana juntasha canga.*Hab. 2.14
10 Chay wichanga
tumpuno caycaj Isaïpita mirar aywaj yurejmi*Rom. 15.12
llapan runacunata shuntanga.
Llapan nasyun runacunami payta ashej aywanga.
Pay caycashannami fiyupa rispitädu cangapaj.
Prësu aywajcuna cutimunanpaj cashan
11 Chay wichanga Tayta Dios yapaymi acrashan runacunata shuntanga.
Cutichimonga Asiriapita, Egiptupita,
Patrospita, Etiopiapita, Elampita,
Sinarpita, Hamatpita, lamar cantunpa caj nasyuncunapitapis.
12 Señalwanmi nasyuncunata musyachenga.
Nircorga prësu aywaj Israelcunata shuntamonga.
Judá runacunataga wacpa-caypa machicasha caycajta
intërupita shuntamonga.
13 Efraín runacunaga mananami Judá runacunata chiquipanganachu.
Judá runacunapis mananami Efraín runacunata rabyapanganachu.
14 Ishcan nasyunnami aywanga inti yaganan caj-lächo caycaj Filistea nasyunman.
Paycunata magananpaj yagaparconga.
Inti yagamunan caj-lächo tiyajcunapatapis
ishcanmi ima-aycantapis guechumonga.
Chaynöpami paycunapa maquinchöna canga
Edom runacunapis, Moab runacunapis, Amón runacunapis.
15 Tayta Diosmi nänita camaripanga Puca Lamar chaupinpa.
Éufrates mayu jananpanami maquinta jogarconga.
Nircorga fiyupa manchariypaj wayrächimonga.
Chay wayranami yacutaga ganchis pachapa raquirengapaj.
Chaura runacunaga llanguintapis mana jorguyllapanami yacuta päsangapaj.*Apoc. 16.12
16 Israelcuna unay Egiptupita llojshicamur jatun näninpa shamushannömi
Asiriacho quëdajcunaga jatun nänipa cutimongapaj.*Éxo. 14.21–22