21
Jerusalén ushacänanpaj cashanta willacushan
1-2 Ray Sedequiasga Malquiaspa wamran Pasurtawan Maasiaspa wamran cüra Sofoniasta cacharan Jeremías cajman payta cayno ninanpaj: «Tayta Diosta tapucuycuy nogacunapaj. Babiloniapa raynin Nabucodonosormi magamaj yaycaycämun.* 2Rey. 25.1–11; 2Crón. 36.17–21 Diosga capaschari ima milagrullatapis ruraycunman Nabucodonosor cuticunanpaj.»
3 Chaura Jeremiasnami ray Sedequiaspa cachancunata niran: «Gamcunaga Sedequiasta willay. 4 Israelcunapa Tayta Diosnenga caynömi nin: ‹Babiloniapa suldäruncunawan pillyarcaycashanpitami suldäruyquicunaga gueshpimonga. Curral wajtanpa tumaraycaj suldärucunatami siudä chaupinman gaycaramushaj. 5 Quiquëmi gamcunapaj fiyupa rabyasha cashpä contrayqui pillyashaj. Munayniyoj cashpämi gamcunata magashayqui.* Deut. 29.28 6 Cay siudächo carcaycajtaga llapantami wañuchishaj. Runapis, uywapis fiyu gueshyawanmi wañonga. 7 Judäpa raynin Sedequiasta, suldäruncunata, mas mandaj suldäruncunatapis cachaycushaj contran ray Nabucodonosorpa maquinmanmi. Contrancunapa maquinmanmi cachaycushaj fiyu gueshyawan, yargaywan, guërrawan mana wañur siudächo cawaycar quëdaj runacunatapis. Nogami camacächishaj chay rayga mana cuyapaypa sabliwan wañuchinanpaj. Noga Tayta Diosmi chayno në.› »
8 Jeremiastana Tayta Dios niran: «Chaynöpis chay runacunata niy noga Tayta Dios cayno nishäta: ‹Acray maygantapis, cawayta car wañuyta carpis. 9 Jinan siudällacho quëdacojcunaga wañonga guërrawan, man'chäga yargaywan, u fiyu gueshyawanmi. Cay siudäpita aywacur Babiloniacuna pillyaj aywaycämojpa maquinman chayarga cawayllapis cawangami.* Jer. 38.2 10 Nogami camacächishcä cay siudäta alliman chayachinäpa ruquenga fiyupa castiganäpaj. Chaymi Babilonia raypa maquinman cachaycushaj. Chaura paynami rupaycachenga.* Jer. 38.17–18 Noga Tayta Diosmi chayno në.›
Judäpa raynincunapaj rimashan
11-12 «Davidpita mirar aywaj Judäpa raynincunata willanqui noga nishäta:
«Waran-waran alli cajllata ruray.
Ñacachejcuna ñacarcaycächishanta jorguy.
Man'chäga mana allita rurashayquipitami
nina ratarejnöraj fiyupa rabyacurcushaj.
Chaura rabyashäpitaga ninata upichiyta mana camäpacushanno pipis manami allchacächimangachu.
Jerusalenman castïgu chayananpaj cashan
13 «Jerusalén runacuna, gamcunaga patacho cashpayquimi nircaycanqui:
‹¿Piraj noganchïmanga yaycamunman magamänanchïpaj?
¿Piraj chayamunman pacacunanchïcho carcaycashanchïcama?› nir.
Nogami gamcunapäga fiyupa rabyasha caycä.
14 Chaymi imatapis rurashayquimanno castigashayqui.
Ima-aycayquitapis rupaycachishämi.
Llapantami ninaga rupacurcongapaj.
Noga Tayta Diosmi chayno në.»