1 «¡Gaparay Job!

Mä pillaga wiyashunquichush.

¿Maygan anjiltataj yäracunqui?

2 Musyanchïmi mana tantiyaj upacunaga rabyallawan wañushanta.

Yargajcunaga munapaycällarmi wañuymanpis chayan.

3 Ricashcämi mana tantiyaj upa runacuna alliman chayajta.

Ichanga jinan öra ima-aycanpis ushacäcusha.

4 Chay runapa wamrancunata pipis manami yanapanchu.

Autoridäcunapis alliga mana arriglanchu.

Pipis manami faburnin ichircunchu.

5 Murupacushan pogojcunata pishipacajcunami micucarcärin.

Cashayoj jachacunapa rurincho caycaptinpis shuntacarcärin.

Ima-ayca charashancunatapis lajwaypa lajwar yargajcunana ushacurcun.

6 Mana alli rurayga manami allpapitachu llojshimun.

Ñacaycunapis manami pachapitachu yurin.

7 Ninapita chispa pintishanno,

quiquin runami ñacananpäpis juchayoj.

8 «Gamno cashpäga Tayta Diostami ruwacöman.

Paypa maquinmanmi dimandöta churäman.

9 ¡Paymi ruran mana ricashanchi fiyupa almiraypajcunata!

¡Chaycunataga pipis manami tantiyanchu!*Job 9.10

10 Paymi tamyachimun cay pachaman.

Chay tamyami pargun intëru jircata.

11 Paymi umildicunataga alliman churan.

Llaquicuycajcunatapis cushicachin.

12 Sabïdu runacuna yarpashancunatapis

Tayta Diosmi mana camacächinchu.

13 Paymi ticrachin sabïducuna yarpaycashanga quiquinman chayananpaj.*1Cor. 3.19

Mana allita yarpaycashantapis mana camacächinchu.

14 Paycunaga yanauyaycaj chacaycho chacäpacusha caycajnöpis

junaj pachapami yatayllapa purircaycan.

15 Tayta Diosga fiyucunapita salbanmi pobricuna ñacaycajcunatapis.

16 Paymi callpaynajcunatapis cushicachin.

Fiyucunatapis upällachin.

17 «Cushisha cachun Tayta Dios corrijishan runaga.

Ima-aycapäpis munayniyoj Tayta Dios corrijishushayquitaga wiyacuy.*Sal. 94.12; Prov. 3.11–12; Heb. 12.5–6

18 Pay garayquita rachishpanga jampipäshunquimi.*Ose. 6.1

Castigashushpayquipis allchacächishunquimi.

19 Tayta Diosga ima mana alli chayashunayquipita yapay yapaymi salbashunquipaj.

Manami camacächengapächu mana alli chayashunayquitaga.

20 Muchuy captinpis mana wañunayquipämi salbashunquipaj.

Guërra captinpis sabliwan wañuchishunayquipita salbashunquipämi.

21 Washayqui rimanantapis manami camacächengachu.

Castïgu captinpis manami manchacunquipächu.

22 Muchuy, ni llaquicuy captinpis

manami imapis gocushunquipächu.

Micucoj jirca animalcunatapis manami manchacunquipächu.

23 Rumicunapis chacrayquicunacho manami quichquirangachu.

Jirca animalcunapis cuyashunquipämi.

24 Wasiquichöpis alli goyayllami canga.

Uywayquicunapis manami jucpis pishengachu.

25 Gampitaga aypallami miranga

jirca jachacunanöraj.

26 Auquinyarpis callpayojllarämi caycanquipaj

timpuncho rutusha rïgunöraj.

27 Chayno cashantaga ricashpanchïmi musyanchi.

Rasunpami chayno.

Chaycunata sumaj wiyay.

Masqui quiquiquipis yarpachacuriy.»