1 «Rejsisha jircachömi caycan guellay mïnaga.

Chayno rejsisha partichömi caycan gorita acranapäpis.

2 Allpa rurinpitami fyërrutaga jorgunchi.

Rumicunata chulluchishami cubri acracan.

3 Runaga pacha rurin chacajmanpis yaycunmi.

Chayno yaycurmi pacha rurin may-may rurimanpis chayan.

Chaychönami yanauyaycaj chacaycho rumicunata ashin.

4 Pipis mana purinan jircacho,

siudäcunapitaga caruchömi mïnataga uchcun.

Chaychönami wac-läman cay-läman caylintaycar wascawan warcuyllapa yaycun uchcunanpaj.

5 Cay pachachöga chacracuna micuyta wayuchin.

Rurinpanami ichanga caycan nina ushashano uchcu-uchcu.

6 Chay rurichömi tarinchi cuestaj zafiro jutiyoj rumita,

goritapis allpawan tacucashata.

7 Chay uchcucunataga imaypis manami ricashachu

wamäshupis ni ima ancacunapis.

8 Chaymanga manami chayannachu aycha micoj jirca animalcunapis.

Ni liyuncunapis chaychöga manami purinnachu.

9 Runaga gagacunachömi ojtin.

Niycällarmi puntacunatapis sapipita juchuchin.

10 Gagacunacho ruran mïna uchcucunata.

Chaychöna tarin tucuy-niraj achca casta cuestajcunata.

11 Chayno ojtiycällarmi tarin mayu yuriycashantapis.

Mana pipis ricashantami jorgamun.

12 «Ichanga ¿maychötaj tarinchi yachayta?

¿Maychötaj caycan tantiyay?

13 Runaga manami musyanchu chaycuna alli cashantapis.

Cay pachachöga manami tarinpischu.

14 May-may jatun lamarpis ‹caychöga manami canchu› ninmi.

Ruri yanauyaycaj lamarpis ‹nogachöga manami canchu› ninmi.

15 Chaytaga goriwanpis manami rucanchïchu.

Ni guellaywanpis manami rantinchïchu.

16 Fiyupa mas alli caj goriwanpis manami pägashwanchu.

Manami pägashwanchu ni ‹cornalina› ni ‹zafiro› cuyayllapaj rumicunawanpis.

17 Yachayga goripitapis, achicyaj gueshpipitapis masmi cuestan.

Chaytaga manami rucashwanchu gori aläjacunawanpis.

18 Yachayga lamarpita jorgushan ‹coral› jutiyojpitapis mas cuyayllapämi.

Achicyaj gueshpicunapitapis perlascunapitapis mas cuyayllapämi.

19 Yachaywan tincuchishaga Etiopiacho caj ‹crisólito› cuyayllapaj chanin cuestaj rumipis manami tincunchu.

Manami rantishwanchu mas allinnin caj goriwanpis.

20 «Chaura ¿maychötaj tarinchi yachayta?

¿Maychötaj caycan tantiyay?

21 Llapan cawajcuna mana ricananchömi pacaraycan.

Päriypa purejcuna mana ricananchömi chaparaycan.

22 Infiernupis wañuypis ninmi:

‹Chaycunapäga wiyayllami wiyashcä parlajta› nir.

23 «Diosmi ichanga musyan yachay maycho caycashantapis.

Payllami musyan maycho tariytapis.

24 Payga ricaycanmi allpapa cuchuncamapis.

Chayno payga ushajpämi ricaycan syëlupita uraman cajtaga.

25 Tayta Diosmi wayrapa callpantapis gosha.

Yacutapis nisha maycamalla chayananpäpis.

26 Paymi nisha imay tamyapa timpun cananpäpis;

räyucuna, illguycuna imay wichan cananpäpis.

27 Chay örami yachaytapis chaycho ricaran.

Imano cashantapis musyaycur ricaycur ‹alli› niran.*Prov. 8.22–31

28 Nircur runacunata Tayta Dios niran:

‹Yachaj runaga Nogallatami rispitaman.

Mana allita rurananpitaga manchapacuypami cawan.› »*Sal. 111.10; Prov. 1.7; 8.13; 9.10