32
Elihú parlashan
1 Chay quimsaj runacuna Jobwan rimanacuycashanpita upällacaycäriran Job yaparir-yaparir «juchaynaj cä» niptin. 2 Chauraga Ram famillyapita mirar aywaj Buz parti runa Baraquelpa wamran Elihú, Jobpaj rabyacurcuran «juchaynaj caycaptë Dios castigaycäman» nejta wiyashpan. 3 Jobpa quimsa amïguncunapäpis rabyacurcuran imanöpapis mana cutichiyta camäpacur Tayta Diosta manacajman churashanpita. 4 Elihüga caran paycunapita mas mösullaraj. Chaymi shuyaraycaran quimsanraj Jobwan parlayta ushananta. 5 Wiyashpanmi payga musyaran waquin cajcunaga Jobta imanöpa cutichiytapis manana camäpacushanta. Chaymi fiyupa rabyacurcur 6 rimayta gallaycuran.
«Ricamashayquinöpis, nogaga cä mösullarämi,
gamcunami ichanga canqui mas auquinna.
Chaymi yarpaycashäta rimaytapis mana camäpacushcächu.
7 Yarparä: ‹Mayur cajcuna parlachun musyashanta.
Achca watana yachaj cashancunata mä nichun› nir.
8 Ichanga Tayta Diospa Espiritunmi runataga yarpayniyoj cananpaj yanapan.
Munayniyoj Tayta Diosmi pücashpan yanapan tantiyaj cananpaj.
9 Achca watayoj cashanga pitapis manami yachajyächinchu.
Ni auquin cashanchïpis manami tantiyachimanchïchu.
10 «Chaymi cananga nogatapis wiyarcallämay.
Nogapis mä imallatapis parlarcamushaj.
11 Nogaga upällallami wiyaräcushcä.
Chaymi gamcuna imano parlashayquitapis wiyashcä.
Imano parlanayquipaj yarpachacojtapis tantiyashcä.
12 Chaynöpis wiyashcämi mayganiquipis
Job parlashanta allitaga mana cutichishayquita.
13 Gamcuna nirgunquiman ‹Yachashallanchïtaga nishcanchïnami.
Cananga Diosllanami cutichenga.
Manami runachu cutichenga.›
14 Jobpis nogataga manami imatapis nimashachu.
Nogapis manami gamcuna nishayquinöllaga Jobta nishächu.
15 Paycunaga äyaraycarmi quëdasha.
Manami tarishachu imano cutichishunayquipäpis.
16 Gam ama yarpaychu paycuna upälla cacushanno
nogapis upälla cacunätaga.
17 Ninäpaj caycashantaga nogapis nishayquimi.
Imata ninäpäpis yarpaycashäta nogapis nishayquimi.
18 Rimanäpäga aypallami caycan.
Mananami upällallaga cacömannachu.
19 Rimar pashtapacunäpänami caycä.
Mushoj ordiman bïnuta wiñarpusha pogur rachiriyta munaycashannönami caycä.
20 Parlarcuptërämi shongöpis achicyärenga.
Gamtaga imanöpapis cutichishayquirämi.
21 Manami mayganiquipapis faburniqui cashächu.
Llapaniquipäpis iwalmi parlashaj.
22 Nogaga pipäpis manami faburnin parlächu.
¡Chayno parlaptëga Camamajninchi Tayta Diosmi jinan öra castigamanman!