3
Judäpa contrancunata castigananpaj cashan
1 Tayta Diosmi nin:
«Chay junaj chayamuptinmi camacächishäpaj
Judäwan Jerusalén runacuna yapay allina goyänanpaj.
2 Llapan nasyun runacunata shuntarcurnami apashaj Josafat guechwa pampaman.
Chaychönami chay runacunataga jusgashaj acrashä Israelcunata imanöpis rurashanpita.
Chay runacunami intëru mundupa mashtacächiran Israelcunataga.
Nircur acrashä nasyuntaga raquipänacuran.
3 Acrashä runacunataga raquipänacusha surtita jitarcur jitarcurmi.
Wamracunata ollguta warmitapis ranticusha.
Ranticur chasquishan guellaytanami ushasha upyananpaj bïnuta rantir,
guellaypaj cacoj warmicunawan cacushpan.
4 «Tiro, Sidón,* Isa. 23.1–18; Eze. 26–28; Amós 1.9–10; Zac. 9.1–4; Mat. 11.21–22; Luc. 10.13–14 Filistea* Isa. 14.29–31; Jer. 47; Eze. 25.15–17; Amós 1.6–8; Sof. 2.4–7; Zac. 9.5–7 parti runacuna ¿imatataj gamcuna nogawan munanqui? ¿Ayñita cutichimaytachu munanqui? ¿Imatapis ruramaytachu yarpanqui? Chayno captenga rurashayquimannömi castigashayqui. 5 Gamcunami suwashcanqui guellaynëta, gorëta. Nogapa imäpis alli cajtaga templuyquicunamanmi apacushcanqui. 6 Judá runacunata, Jerusalencho tiyajcunataga fiyupa carumanmi apashcanqui. Chayno aparcurnami uyway cananpaj ranticushcanqui Griego runacunaman. 7 Ichanga nogami jorgamoj-aywä maymanpis ranticushayquipita. Nircurmi camacächishaj paycuna ñacashanno gamcunana ñacanayquipaj. 8 Judá runacunamanmi ranticushaj ollgu warmi wamrayquicunata. Paycunanami ranticonga Sabá runacunaman. Chay runacunaga musyashayquinöpis fiyupa caruchömi tiyarcaycan. Noga Tayta Diosmi nishcä chayno cananpaj.»
Nasyuncuna jusgasha cananpaj cashan
Sercacho caycaj nasyuncunapaj Joel niran:
9 «¡Nasyuncuna, wiyay-llapa!
¡Guërrapaj camaricuyna-llapa!
¡Jinyu suldärucunata shuntay-llapa!
¡Pillyajcunaga shuntacarcur aywachunna!
10 Rëjancunapita rurachun sablincunata.
Ösinpitana rurachun lansata.* Isa. 2.4; Miq. 4.3
Callpaynajcunapis ‹¡Callpayojmi cä!› nichun.
11 Sercacho caycaj nasyun runacuna, llapayqui juclla shamuy waquin cajwan shuntacänayquipaj.
Tayta Dios, paycunawan pillyananpaj callpayojcunata cachamuy ari.
12 Llapan nasyuncho tiyaj runacuna llapayqui camaricuy.
Nircorga ayway Josafat guechwa pampaman.
Chaychömi Tayta Dios jusgaj-aywan
Israelpa bisïnun nasyun runacunata.
13 Paycuna fiyu runacuna cashanga pasaypanami pogupaycan.
Chaymi paycunataga Tayta Dios castiganga ösita aptacurcur rïguta runa rutushanno.* Apoc. 14.14–16
Tayta Diosmi usharenga übasta bïnupaj runa lluchcajno.* Isa. 63.3; Lam. 1.15; Apoc. 14.19–20; 19.15
14 Chay Jusgana Pampachöga aypallami shuntacasha carcaycan.
Chaynöga shuntacasha carcaycan Tayta Dios jusganan junaj chayamunanpaj wallcana pishiptinmi.
15 Chay junäga intipis quillapis chacacäcongami.
Goyllarcunapis manami achicyanganachu.
Jerusalenpita-pachami räyuno busninta wiyacächimonga.
Syëluwan cay pachapis sicsicyangami.
Acrashan Israel runacunatami ichanga Tayta Dios ima-aycapitapis washashpan chapanga.»
Shamoj watacunacho Judá bindisyuntana chasquinanpaj cashan
17 Acrashan runacunata Tayta Dios niran:
«Chay junaj chayamuptin gamcuna tantiyacunquipaj noga Tayta Diosniqui cashätami.
Nogaga tiyashaj Templö caycashan Sión lömachömi.
Chay Jerusalén siudäga cangapaj acracushä siudämi.
Jäpa runacuna yapayga chay siudäta manami imaypis munaynincho chararanganachu.
18 Chay wichanga intëru jircacunacho, intëru lömacunachöpis
bïnuwan lëchi canga yacu-jina aypallami.
Judächo caj ragracunapapis aypalla yacumi aywanga.
Templöpitanami yacu pashtaycangapaj.
Chaynami parguycangapaj Sitim guechwa pampata.* Eze. 47.1–12
19 Egiptoga pasaypa ushacashami quëdangapaj.
Edomnami chunyajman ticrangapaj.
Chaynöga cangapaj Judá runacunata magashanpitami,
mana juchan caycaptin nasyunnincho Judá runacunata wañuchishanpitami.* Abd. 10
20 Judächöwan Jerusalenchömi ichanga imaypis runacuna tiyarcaycangapaj.
21 Nogaga llapantami ayñita cutichishaj.
Juchata rurajcunataga manami perdunashächu.
«Noga Tayta Diosnami Sión lömacho tiyaycäshaj.»
*3:4 Isa. 23.1–18; Eze. 26–28; Amós 1.9–10; Zac. 9.1–4; Mat. 11.21–22; Luc. 10.13–14
*3:4 Isa. 14.29–31; Jer. 47; Eze. 25.15–17; Amós 1.6–8; Sof. 2.4–7; Zac. 9.5–7
*3:10 Isa. 2.4; Miq. 4.3
*3:13 Apoc. 14.14–16
*3:13 Isa. 63.3; Lam. 1.15; Apoc. 14.19–20; 19.15
*3:16 Jer. 25.30; Amós 1.2
*3:18 Eze. 47.1–12
*3:19 Abd. 10