2
Ishcay caj llaquicuy
Álef
1 Tayta Diosga fiyupami rabyacurcusha casha.
Chaymi cuyayllapaj Siontapis yanamaypa chapacurcuran.
Syëlupitami illgarachimusha Israelcho mas cuyayllapaj caj siudätaga.
Rabyasha caycashan öraga manami yarpärishachu chaquin lluchcaränan Templutapis.
Bet
2 Tayta Diosga manami ni jucnayllatapis cachaycushachu ichiraycajta Jacob famillyapa wasincunataga.
Rabyasha caycashan öra illgarachiran Judäpa sumaj curalasha caycaj siudänincunatapis.
Mandajcunatapis manacajman churasha.
Waquin mandäshejcunatapis manacajman churasha.
Guímel
3 Fiyupa rabyacurcorga Israel munayniyoj caycajta
juc maquillachömi illgarachisha.
Chiquimajninchïwan pillyaycashapis payga mananami yanapämashcanchïchu.
Israelchöga ninatami ratarcachisha.
Chay ninami tarishan cajta llapanta rupar ushaycan.
Dálet
4 Tayta Diosga chiquimajninchïnöpis
callpaycurmi lëchata chutasha jitananpaj.
Cuyayllapaj alli cajcunataga contranchïnömi ushajpaj illgarachisha.
Rabyashanga casha ninanömi.
Chayno rabyarmi usharamashcanchi.
He
5 Tayta Diosga chiquimajninchïnömi ruramashcanchi:
Israeltaga ushajpämi illgarachisha.
Palasyucunatapis ushajpämi juchurachisha.
Sumaj curalasha siudänincunatapis juchuchisha.
Judäpa cuyayllapaj siudäninmanga
jananman-jananman llaquicuyllatami chayaycächin.
Vav
6 Chucllata usharejnömi Tayta Diosga Templunta usharisha.
Tayta Diosmi camacächisha
fistacunata, säbadu jamay junajcunatapis Sioncho gongaycärinanpäna.*Isa. 1.13
Fiyupa rabyacurcushpanmi camacächisha raypis ni cürapis manana cananpaj.
Zayin
7 Tayta Diosga Templunta manami ricaytapis munannachu.
Altarnintapis manacajmannami churasha.*Eze. 24.21
Chiquejcunapa munayninmanmi cachaycusha siudäta curalaraj pergacunatapis.
Nircur Tayta Diospa Templunchöga fistacho caycaj-jinaraj talluypa-tallur gaparpaycan.
Jet
8 Quiquin Tayta Diosmi camacächisha cuyayllapaj Sión siudäta curalaraycaj pergan juchuchisha cananpäpis.
Paymi camacächisha imano illgächinanpäpis.
Mana cuyapaypami ushajpaj illgächisha.
Pergancunata paymi juchuchisha.
Cananga muntuy-muntuyllanami goturpaycan.
Tet
9 Siudäpaga mananami cannachu puncuncuna, ni rancancunapis.
Paquir-ushashami intëru pampacho mashtaraycan.
Raytapis gobernadorcunatapis juc-lä nasyuncunamanmi apacusha.
Tayta Diospa layninpis manami cannachu.
Profëtacunatapis Tayta Diosga mananami musyachinnachu.*Sal. 74.3–9; Eze. 7.26
Yod
10 Cuyayllapaj Sión siudächo caj rispitädu auquincunapis upällallami pampacho jamarpaycan.
Llaquicurmi umancunaman allpata wiñacurcaycan, gachga röpacunata jaticurcaycan.
Jerusalén jipashcunaga pengay-tucushpanmi uysurpaycan.
Caf
11 Wagaycaptillämi ñawëpis chacaycanna.
Mayaptë pëchöpis rachicäcojnöraj caycan.
Marca-masëcuna tiyashan siudä illgashata ricashcä.
Chuchuycaj wamracunapis cällicunacho yargaypita wañuycajtami ricashcä.
Chaymi balurnëpis manana cannachu.
Lámed
12 Pishi wamracunami mamanta nircaycaran:
«Fiyupami yargaycä mama.»
Chayno nircur siudäpa cällincunacho wañoj.
Mamanpa mellgaynincunacho wañucäcoj.
Mem
13 Cuyayllapaj Jerusalén, ¿imamanraj o imawanraj gamta tincuchëman?
Cuyayllapaj Sión siudä, ¿gamta imaman tincuchiyparaj willapäman shoganäpaj?
Gamtaga fiyupami mana allicuna chayashurayqui.
Cananga ¿piraj allchacächishunquiman?
Nun
14 Profëtayquicuna willashushayquega manami rasunpachu caran.
Juchayoj cashayquita paycunaga manami willashurayquichu.
Willashuptiquega canan manami prësu aywanquimanchu caran.
Llutanta willapäshushpayquimi gamcunataga riguichishurayqui.*Jer. 5.31; 23.25–27; Eze. 13.10
Sámej
15 Näninpa päsajcunaga
cushipäshushpayqui maquintapis macshunraj.
Manacajman churashushpayqui umantapis awinraj.
Jerusalén, gampäga caynömi nin:
«¿Tagaychi caycan ‹intëru munducho caj siudäcunapita
mas cuyayllapaj› nishan siudä?» nir.
Pe
16 Llapan chiquishojcunami washayquita parlan.
Wichyacachashpan, jamurpäshushpayqui cayno nin:
«Ushajpämi illgächishcanchi.
Chayno canantami munaranchïpis.
Cananga ¿manachu ricanchi?» nir.
Ayin
17 Tayta Diosga yarpashancunata llapantami camacächisha.
Imano canayquipäpis nishantaga cumlishami.
Mana cuyapaypami illgächishurayqui ñaupatana yarpashanno.*1Rey. 9.6–9
Chiquishojcuna asipäshunayquipämi camacächisha.
Contrayquicuna fiyupa munayniyoj cananpämi camacächisha.
Tsade
18 Cuyayllapaj Sión, Tayta Dios yanapäshunayquipaj mañacuy.
Chacaypa junajpapis weguiquega yacunöraj aywaypa aywachun.
Mana chawaypa wagay.
Qof
19 Chacaycunapapis jatarcur waray-waray gaparay.
Llapan llaquicuycashayquipita Tayta Diosta willapay, wagapay.
Mañacushpayqui maquiquitapis chojpacuy.
Ruwacuy yargaypita wamrayquicuna mana wañunanpaj.
Micunanpaj imapis mana captinmi wamrayquicunaga cällicunachöpis wañurcaycan.
Resh
20 Jerusalennami nin: «Tayta Dios, masqui ricay
nogacunata imano päsaycämashantapis.
Chuchuycashan wamrancunatami warmicuna micucarcärin.
Cüracunatawan profëtacunatapis Templuchömi wañuchin.
¿Pillataga chayno rurashcanquichuraj?*Deut. 28.53; 2Rey. 6.28–29; Jer. 19.9
Shin
21 «Wamracunapis, auquincunapis cällicunachömi wañusha mashtarpaycan.
Mösucunapis, jipashcunapis cuchuypami wañusha.
Rabyasha caycashayqui örami wañuchishcanqui.
Mana cuyapaypami wañuchishcanqui.
Tav
22 «Gammi camacächishcanqui wacpita caypita mana allicuna chayamunanpaj.*Sal. 31.13; Jer. 20.3, 10; 46.5; 49.29
Fistaman runa aywajnörämi tucuy-niraj mana allicuna chayamasha.
Tayta Dios, rabyasha caycashayqui öraga manami pipis gueshpishachu.
Noga uywashäta yachachishätaga chiquimajcunami wañuycachisha.»