9
Israelcunapa juchanpita Diosta Esdras mañacushan
1 Chay ganchis quillalla ishcay chunca chuscu (24) junajnincho Israelcuna yapay shuntacaran ayunananpaj. Gachga röpacunata jaticuran. Umancunamanpis allpata wiñacuran. 2 Nircur ichircärir reconösiran «nogacunapis unay awilöcunapis juchasapami cä» nir. Israelcunallami juc-lä nasyun runacunapita*Esd. 10.11 acracaran. 3 Ichirpaycaptillan Tayta Diospa layninta llapan wiyananpaj quimsa öra liguiparan. Yapay quimsa örana juchancunapita Tayta Diosta mañacuran y aduraran. 4 Nircur cüracunata yanapaj Leví runacuna Josué, Binuy, Cadmiel, Sebanías, Buni, Serebías, Bani, Quenani wicharan chacranca caycajman. Paycuna gayarayparaj Tayta Diosta mañacuran. 5 Cüracunata yanapaj Leví runacuna Josué, Cadmiel, Binuy, Hasabnías, Serebías, Hodías, Sebanías, Petaías cayno niran:
«Tayta Diosninchïta imaycamapis llapayqui alabay.
¡Payga fiyupa rispitädu cashpan munayniyoj cashpan alabasha cachun!
Gammi camashcanqui syëluta, syëlucho llapan caycajcunata.
Gammi camashcanqui cay pachata, cay pachacho cajcunata,
lamarta, lamar rurincho cajcunatapis.
Gammi llapan ima-aycatapis cawaycächinqui.
Chaypitami janaj pachacho caycajcunapis adurashunqui.
7 «Tayta Dios, gammi Abramta acrarayqui.
Gammi pushamurayqui Caldeacho caycaj Ur marcapita.*Gén. 12.1
Nircur ‹Abraham› nirna jutinta churaparayqui.*Gén. 17.5
8 Gamga musyarayquimi Abraham gamman yäracamushanta.
Chaymi paywan parlacur aunirayqui paypita mirajcunata goycunayquipaj Cananeo, Het, Amorreo, Ferez, Jebús, Gerges runacuna tiyaycashan chacrata.*Gén. 15.18–21
Cumlej carmi aunishayquitaga cumlishcanqui.
9 «Ricarayquimi Egiptucho unay caj famillyäcuna imano ñacashantapis.*Éxo. 3.7
Wiyarayquimi Puca Lamar cantuncho fiyupa llaquicushpan mañacamushantapis.*Éxo. 14.10–12
10 Fiyupa almiraypajcunata rurarmi castigarayqui faraonta, mandäshejnincunata, llapan pampa runacunatapis.*Éxo. 7–12
Acrashayqui Israelcunata mana cuyapaypa ñacachishanpitami castigarayqui.
Chaypitami gampäga maychöpis allita parlan canancamapis.
11 Israelcuna ricaycäshuptiquimi lamartapis ishcayman raquirirayqui.
Chaura paycunaga chucru allpapana päsaran.
Gaticachajcunatami ichanga ushajpaj yacuwan chaparcachirayqui jundu yacuman rumita jitarpojno.*Éxo. 14.21–29; 15.4–5
12 Israelcunata junajpaga pusharayqui pucutay ichiraycajwan, chacaypana nina ratataycar ichiraycajwan maypa aywananpäpis achquipashpayqui.*Éxo. 13.21–22
13 «Sinaí puntamanmi urämurayqui.
Paycunataga syëlupitami willapämurayqui.
Munashayquino goyänanpaj tantiyachirayqui.
Alli cajta yachachirayqui.
Allillata rurananpaj laycunatapis, mandamintucunatapis willaparayqui.
14 Uywayniqui Moiseswan willapächirayqui cada semänacho juc junaj jamar alabashunayquipaj, munashayquino laycunatapis mandamintuyquicunatapis cumlinanpaj.*Éxo. 19.18–23.33
15 «Paycunataga syëlupitami tantata gomurayqui micunanpaj.*Éxo. 16.4–15
Yacunaptinpis gagapitami yacuta llojshichipämurayqui.*Éxo. 17.1–7
Nircur nirayqui aunishayqui nasyunman tiyaj yaycunanpaj.*Deut. 1.21
16 Chay unay caj awilöcunaga casha mana tantiyaj, mana wiyacoj runacunami.
Chaymi mandamintuyquitapis mana cumlishachu.
17 Paycunata salbanayquipaj milagrucunata rurashayquitapis gongaycärirmi yachachishayquicunataga manana rurarannachu.
Chayno mana wiyacoj cashpanmi paycunaga churacarcäriran juc mandajninta yapay uyway cananpaj Egiptuman cutichinanpaj.*Núm. 14.1–4; Deut. 1.26–33
Chaypis gamga canqui Tayta Dios llapantapis perdunaj, alli, cuyapäcoj, jucllaga mana rabyacojmi.*Éxo. 34.6; Neh. 9.17; Sal. 86.15; Joel 2.13
Chaymi paycunataga mana cachaycushcanquichu.
18 «Jundiypa töru-mallwata ruracarcärir ‹Caymi Egiptupita jorgamajninchi diosga› niran.*Éxo. 32.1–4
Chayno nirmi fiyupa rabyachishurayqui.
19 Cuyapäcoj cashpayquimi chunyajchöga mana cachaycurayquichu.
Pucutaypis caminuta rejsichinanpaj manami junajpa illgaranchu.
Nina achquipis manami illgaranchu chacaypa caminuta rejsichinanpaj.
20 «Alli Espirituyquiwanmi paycunata tantiyachirayqui.
Micunanpäpis mana pishiypami casha maná.
Yacutapis manami pishëchirayquichu.
21 Chunyajchöpis chuscu chunca watantinmi cawachishcanqui.
Imapis manami pishishachu.
Röpancunapis manami ushacaranchu.
Ni chaquinpis manami shuplluranchu.
22 «Paycuna tiyananpäpis munayniyojcunapa marcanta, nasyunninta entregarayqui.
Nircur shuyni-cama chacrata raquipashcanqui.
Paycuna yaycuran ray Sehón mandashan Hesbón partiman ray Og mandashan Basán partiman.*Núm. 21.21–35; Deut. 2.26–3.4
23 Gammi camacächirayqui goyllarcunano aypallaman mirananpaj.*Gén. 15.5; 22.17; Deut. 1.10
Mas unay caj awilöcunata aunishayqui chacramanpis pusharayqui goycunayquipaj.*Jos. 3.14–17
24 Paycunanami Canaanman yaycuycur guechuran.
Gammi camacächirayqui chay particho tiyajcuna paycunata manchacunanpaj.
Chaycho tiyarcaycajcunataga raynintinta paycunapa munayninman churarayqui munashanta rurananpaj.*Jos. 11.23
25 Guechur charicarcäriran intërunpa curalasha siudäcunata, micuy alli wayunan chacracunata, ima-aycanpis junta caycaj wasincunata, yacu pösuncunata, übas chacrancunata, olivo wertancunata, waquin früta wertancunata.
Chaychömi paycunaga micuytapis cushisha micuran werayänanyaj.
Yanapashayquipitami fiyupa cushicur alli goyaran.*Deut. 6.10–11
26 «Ichanga mana wiyacojmi caran.
Contrayqui ricacuran.
Layniqui niycashantapis mana cumlir manacajman churaran.
Mana allita ruraptin profëtayquicuna piñacushpan willaparan gamman yapay yäracamunanpaj.
Chaura paycuna fiyupa rabyachishushpayquimi profëtayquicunata wañuchiran.
27 Chayno captinmi chiquejcunapa munayninman cachaycurayqui.
Chauraga ñacachisha.
Ñacar llaquicur-rämi yarpärishpan gamtaga mañacushurayqui yanapänayquipaj.
Chaura gamna cuyapashpayqui syëlupita-pacha wiyamushcanqui.
Ñacaycashanpita jorgamunanpaj acrashayqui runacunata cachashcanqui.
28 Alli goyashpannaga yapayna juchata ruraj.
Chaynöpami yapaypis cachaycurayqui chiquejcunapa munayninman.
Chay runacunana llaquicachir ñacachiran.
Chayno cashpanraj yapay mañacushoj cashunqui.
Chaura gamga cuyapäcoj cashpayqui syëlupita-pacha wiyashpayqui achca cuti yanapashpayqui salbarayqui.*Deut. 32.15–43; Jue. 2.11–16
29 Layniquicunata cumlinanpaj yaparir-yaparir tantiyachirayqui.
Chaura paycunami ichanga yachaj-tucoj.
Alli cawayta tarichicoj layniquicunata mana cumliranchu.*Lev. 18.5
Paycunaga mana wiyacoj cashpanmi gam nishayquita mana cäsucuranchu.
30 «Chaypis achca watami awantashcanqui.
Tucuynöpa tantiyachirayqui Espirituyquiwanraj profëtayquicunawanraj.
Chaypis manami paycunaga wiyacuranchu.*2Rey. 17.13–18; 2Crón. 36.15–16; Zac. 7.12
Chayno captinnami gamga cachaycurayqui juc-lä nasyun runacunapa munaynincho cananpaj.
31 Cuyapäcoj cashpayquimi ushajpäga mana illgächishcanquichu, ni gongaycushcanquipischu.
Gamga fiyupa cuyapäcoj Tayta Diosmi canqui.
32 «Tayta Dios gamga canqui munayniyojmi, manchacunami.
Parlacushayquitaga manami gonganquichu.
Cuyacunquimi.
Asiriapa*2Rey. 15.19, 29; 17.3–6; Esd. 4.2, 10 raynincuna cashanpita canancamami castïgu nogacunaman, raynëcunaman, mandajnëcunaman, cüräcunaman, gampita willacojcunaman, unay caj awilöcunamanpis chayasha.
33 Chaypis gamga alli cajtami rurashcanqui.
Nogacunami ichanga juchata rurashcä.
34 Gam willacachishayquicunata, mandamintuyquicunata manami cumlishachu raynëcunapis, mandajnëcunapis, cüracunapis, awilöcunapis.
35 Chaypa ruquenga mandashancho ima-aycayoj cananpaj yanapaycaptiquipis, micuy alli wayunan jatun chacrata goycaptiquipis manami adurashurayquichu.
Jucha ruraycunatapis manami cachaycuranchu.
36 «Awilöcunataga chacrata unay gorayqui micur upur goyänanpaj.
Canan nogacunaga fiyupami ñacaycä.
Uywayman ticrashana carcaycäcuna.
37 Chay chacracho wayojcunaga raycunallapämi caycan.
Chay raycunataga churapämashcanqui juchäcunapitami.
Nogacunapis, uywäcunapis paycuna munashanta ruranalläpämi carcaycä.
Chayno captinmi fiyupa llaquicuycho carcaycä.
Lay imanöpis cashanta cumlinanpaj nishan
38 «Chaypitami nogacunaga papilta rurä cumlinäcunapaj jurashpä. Chay papil rurashäcunamanga firmanga mandajnëcuna, cüracunata yanapaj Leví runacuna y cüracunami.»
*9:2 Esd. 10.11
*9:6 Deut. 6.4
*9:7 Gén. 12.1
*9:7 Gén. 17.5
*9:8 Gén. 15.18–21
*9:9 Éxo. 3.7
*9:9 Éxo. 14.10–12
*9:10 Éxo. 7–12
*9:11 Éxo. 14.21–29; 15.4–5
*9:12 Éxo. 13.21–22
*9:14 Éxo. 19.18–23.33
*9:15 Éxo. 16.4–15
*9:15 Éxo. 17.1–7
*9:15 Deut. 1.21
*9:17 Núm. 14.1–4; Deut. 1.26–33
*9:17 Éxo. 34.6; Neh. 9.17; Sal. 86.15; Joel 2.13
*9:18 Éxo. 32.1–4
*9:22 Núm. 21.21–35; Deut. 2.26–3.4
*9:23 Gén. 15.5; 22.17; Deut. 1.10
*9:23 Jos. 3.14–17
*9:24 Jos. 11.23
*9:25 Deut. 6.10–11
*9:28 Deut. 32.15–43; Jue. 2.11–16
*9:29 Lev. 18.5
*9:30 2Rey. 17.13–18; 2Crón. 36.15–16; Zac. 7.12
*9:32 2Rey. 15.19, 29; 17.3–6; Esd. 4.2, 10