Abdías
Cay libro imano cashanpis
¿Imayllaga cumlingachuraj Tayta Dios aunishancuna?
¿Bisïnunchi nasyuncuna ñacachimashanchïpita Tayta Diosga castigangachuraj?
¿Pitaj caran? Abdías ninanga caycan «Tayta Diosta sirbej» ninanmi. Manami musyachimanchïchu pï cashantapis.
¿Maychötaj willacuran? Abdiasga Judäpa capitalnin Jerusalencho y Jerusalenpa sercancunachömi Tayta Diospa willacuyninta willacuran.
¿Imaytaj willacuran? Payga Tayta Diospa willacuyninta willacuran Jerusalén siudä juchurcuptillannami (586 a.C.).
¿Imataj caycan cay librucho? Cay libro caycan Unay Testamentucho mas tacshannin cajmi. Ishcay cösatami Abdías parlaycan: Israelcunapa contran Edom nasyun ushacänanpaj cashanta (1–15) y Israel nasyun yapay allina cananpaj cashanta (16–21).
Génesis librucho niycan Jacob wauguin Esaüwan apänacushanta (Gén. 24–36). Jacobpitami miraran Israel nasyunpaj. Esaüpitami miraran Edom nasyunpaj. Mamanpa pachanchöpis paycunaga pillyaycarannami. Y sïguir pillyaycasha Abdías willacushan-wichancamapis.
Abdías willacuycan Edom runacuna alli-tucushanpita, Tayta Dios acrashan runacunapa contran juchata rurashanpita Tayta Dios castigananpaj cashantami. Paycunaga castïguta chasquenga Israelcunata rurashanmannömi.
1
1 Caychöga isquirbiraycan Abdiasta Tayta Dios ribilashanmi.
Edom runacunapa contran rimashan
Edom runacunapaj Tayta Diosga caynömi nin:
«Nogaga Israelcunapa Tayta Diosninmi cä.
Juc cachatami nasyuncunaman cachashcä.
Chay cachami cayno niycan:
‹¡Aywashun-llapa! ¡Aywashun Edom runacunawan pillyaj!›*Isa. 34.5–17; 63.1–6; Jer. 49.7–22; Eze. 25.12–14; 35.1–15; Amós 1.11–12; Mal. 1.2–5
2 «Edom runacuna sumaj wiyamay.
Nogami camacächishaj llapan nasyuncunapita mas manacaj canayquipaj.
Pasaypa pengaymanmi churashayquipaj.
3 Gamcunaga gaga shilli uchcucunacho tiyarmi alli-tucurcaycanqui.
Altunnin puntacunacho goyarmi yarparcaycanqui
pipis mana binsishunayquipaj cashanta.
Ichanga chayno alli-tucushpayqui quiquillayquimi engañacuycanqui.
4 Ancano may janajcama wichaptiquipis,
goyllarcuna caycashancho tiyanayquita ruraptiquipis chaypita garpamushayquipämi.
5 «Suwacuna suwapäshunayquipaj chacaypa shamushpan
imayquitapis ushajpäga manami apacunmanchu.
Übasta pallajcuna gam cajman shamushpan
juc ishcay sartataga cachaycunmanrämi.
Gamcunatami ichanga contrayquicuna ushajpaj illgächishunquipaj.
6 Gamcunataga ima-aycayquicunatapis ushajpämi guechushunquipaj.
Llapan aläjayquicunatami apacongapaj.
7 Llapan yanapäshojcunami engañashunquipaj.
Nasyunniquipitami jitarishunquipaj.
Asta yanasayquicunapis chiquicurcushunquipämi.
Mas yäracushayqui caj amistäniquicunami
llullapäshunquipaj mana alliman chayanayquipaj.
Edom runacuna, ¿maytaj musyaj yachaj cashayqui?
8 «Edom runacunata castigashä junäga llapan musyaj yachajcunatami illgächishaj.
Altucho tiyaj runacuna yachaj cashantapis gongachishämi.
9 Manchariywanmi sicsicyanga Temancho caj pillyay yachajcunapis.
Gamcunacho tiyajcunaga ushajpämi wañonga.
Edompa ima juchan cashanpis
10 «Fiyupa pengaypämi ricacunquipaj.
Nircurpis para-simrimi illganquipaj.
Chaynöga canquipaj castayqui Israelcunata wañuchishayquipitami.*Joel 3.19
11 Carupita shamoj contrancuna Israelpa ima-aycantapis siudäpita apacuptin,
juc-lä nasyun suldärucuna Jerusalenpa puncuncunata paquir-ushaptin,
gamcunaga juc-läman witicurirayqui.
Guechushancunata raquipänacunanpaj surtita jitaptin, ima-aycantapis apacuptin,
chay guechoj runacunanömi gamcunapis rurarayqui.
12 Ama cushicunquimanchu caran castayquicuna
mana alliman chayasha caycajta ricaycashpayquega.
Ama cushipanquimanchu caran Judá ragällan quëdashan öra.
Ama asipanquimanpischu caran paycuna llaquicuycashan öra.*Sal. 137.7; Lam. 4.21
13 Acrashä runacuna fiyupa llaquicuycashan öra
ama siudäninman yaycunquimanchu caran.
Paycuna mana allicho caycashan öraga
ama cushipanquimanchu caran.
Paycuna mana allicho caycashan öra
ama imancunatapis suwapanquimanchu caran.
14 Tincoj nänicunachöpis ama shuyanquimanchu caran
gueshpicuycajcunata wañuchinayquipaj.
Fiyupa llaquicushpan gueshpicuycajcunata
contrancunaman ama entreganquimanchu caran.
15 Imanömi juccunata rurashcanqui,
chaynöllami gamcunatapis rurashunquipaj.
Llapan nasyun runacunata jusgananpaj cashan
«Shamur llapan nasyuncunata jusganä junajpäga wallcanami pishiycan.
16 Imanömi gamcuna rispitädu puntächo cushicur machänayquicama upurayqui,
chaynömi llapan nasyuncunapis castigaptë ashgaj cöpata upongapaj.
Paycunaga wicyayllami upongapaj.
Chaynöpami paycunaga ushajpaj illgangapaj.
17 «Sión lömacho ichanga waquin acrashä runacuna cawaycar quëdangapaj.
Chaypitaga Jacobpita mirar aywajcuna chacrancunata yapay shuntangami.
18 Chay Israel runacunawan Judá runacunaga canga ninano,
nina wapchar imatapis ushacurcojno.
Esaüpita miraj Edom runacunami ichanga canga ogshano.
Chauraga chay ninano cajcunami ushajpaj usharengapaj.
¡Edom runacunaga manami jucnayllapis salbacongapächu!
Noga Tayta Diosmi nishcä chayno cananpaj.
19 Chay cawaycar quëdaj Israelcunaga Néguev partitami, Edom jircacunatami shuntanga.
Paycuna waquenga shuntanga löma-löma guechwatapis Filistea partitapis.
Paycuna waquenga shuntanga Efraín partita, Samariata, Benjamín partita, Galaadtapis.
20 Röpanpa juc-läman prësu aywaj Israelcunaga shuntanga Canaán partita Sarepta siudäcama.
Jerusalenpita Sefaradman prësu aywajcunapis shuntanga Neguevcho caycaj siudäcunata.
21 Llapanta binsiycurnami Sión lömaman aywanga.
Chaypitanami Edom runacunataga maquincho chararanga.
Ichanga llapanpis nogapa maquëchömi caycanga.»