2
Ermänucunata manacajman mana churananchïpaj cashan
1 Jesucristuman yäracur cushisha cawarcaycanqui, ¿au? Jesucristo cuyashuptiqui mana llaquicuypa cawarcaycanqui ¿au? Espíritu Santu yanapäshuptiqui alli cawarcaycanqui ¿au? Runa-masiquiwan cuyapänacur cawarcaycanqui ¿au? 2 Chayno cawarga cushicachimay-llapa. Chaymi juc yarpaylla caway. Juc shongulla imaypis cuyanacur caway. 3 Ama runa-masiquiwan chiquinacuychu. Ama yachaj-tucuychu. Chaypa ruquenga pitapis rispëtuwan ricay. 4 Quiquillayquipäga alli cawayta ama ashiychu. Chaypa ruquenga yarpachacuy runa-masiquipis alli cawananpaj.
5 Jesucristo cawashanno gamcunapis cawanquiman.
6 Jesucristoga imaypis Tayta Dioswanmi caycaran.
Jinachöpis Tayta Diosmanmi tincuran.
Chaypis syëluta cachaycurmi shamuran.*Juan 1.1–3; Col. 1.15
7 Llapanpaj munayniyoj caycarpis uywaynömi ricacuran.
Cay pachaman shamuran runano yurinanpämi.
8 Tayta Dios munashanta rurarmi quiquin umildi ricacuran.
Asta wañuymanpis chayaran.
Cruscho wañuytapis manami pengacuranchu.*Mat. 26.39; Juan 10.18; Heb. 5.8
9 Chaypitami Tayta Diosninchi paytaga churasha llapanpitapis mas munayniyoj cananpaj.
Paymanga manami pipis tincunchu.*Heb. 2.9; 12.2
10 Chaymi syëlucho cajcuna, cay pachacho cajcuna y wañojcunapis cawarircamur
Jesucristupa ñaupanman gongurpaconga.
11 Nircurnami payta alabanga: «Gamga llapanpaj munayniyojmi canqui tayta» nir.*Isa. 45.23
Chaynöllami Tayta Diostapis alabanga wamran Jesucristuta cachamushanpita.
Diosninchi munashanno cawanapaj cashan
12 Cuyashä ermänucuna, chayno caycaptenga gamcunawan caycar yachachishäcunata wiyacushayquinölla canan carucho caycaptëpis mas wiyacamay. Salbashana cashayqui musyacänanpäga llapan shonguyquiwan Tayta Diosta manchapacur, rispitar caway-llapa. 13 Tayta Dios munashanno cawanayquipäga quiquinmi shacyächishunqui. Imata imano ruranayquipäpis quiquinmi yanapäshunqui.
14 Mana jamurpänacuyllapa, mana rimanacuyllapa imaypis alli caway. 15 Chayno cawaptiquega manami pipis rimashunquipächu. Gamcunaga Tayta Diospa wamranmi canqui. Chaymi fiyu runacunawan iwal tiyaptiquipis mana pipis rimashunquipächu. Gamcunaga chacaycho achqui achicyaycajnömi caycanqui*Deut. 32.5 16 Jesucristupa alli willacuyninta willacushpayqui. Chaynöpami Jesucristo cutimuptin cushicushäpaj. Chaymi musyashaj Jesucristupa willacuyninta gamcunacho allipaj willacushäta. 17 Autoridäcuna wañuchimänan captinpis nogaga manami llaquicöchu. Chayga canga Tayta Diospaj ofrendanömi. Gamcuna Tayta Diosman yäracur sirbishayquipis caycan paypaj ofrendanömi. Nogaga gamcunawan iwalmi cushicushaj. 18 Chaymi gamcunapis noga cushicushänölla cushicuy-llapa.
Timoteopaj parlashan
19 Taytanchi Jesucristo camacächiptenga shacyächishunayquipaj Timoteota*Hech. 16.1–3 cachamushämi. Gamcuna alli cawaycashayquita willamaptenga fiyupami cushicushaj. 20 Manami mayganpis Timoteonöga gamcunata yanapäshunayquipaj yarpachacunchu. 21 Waquin runacunaga quiquillanpämi imatapis ashin. Jesucristo munashanta ruraypäga manami imapis gocunchu. 22 Timoteo alli cawashantami ichanga gamcunapis musyanqui. Payga wamränömi alli yanapaycäman Jesucristupa alli willacuyninta willacuycho. 23 Chaymi autoridäcuna imata ruramänanpaj cashantapis sumaj musyaycurna payta cachamushäpaj. 24 Tayta Diosninchi camacächiptenga nogapis gamcunata watucoj shamushämi.
Epafroditupaj parlashan
25 Ermänunchi Epafroditutapis cutichimur cachamuptë allimi canman. Ima allishi payta cachamurayqui yanapämänanpaj. Payga Tayta Diosninchïpa suldärunno carmi imano ñacarpis Jesucristo munashanno yanapaycäman. 26 Payga gamcunata llaquishunquimi. Gueshyashanta mayaycur llaquicushayquita musyarmi cananga llaquicuycan. 27 Rasunpasi payga pasaypa wañuycarannami. Chayno caycajtanami Diosninchi cuyapar allchacächisha. Diosninchi nogatapis cuyapämasha jananman-jananman llaquicunäpita. 28 Chaymi paywan tincur cushicunayquipaj juclla cutiycächimö. Tincur cushicuptiquega nogapis manami llaquicushänachu. 29 Pay chayamuptenga alli jamachiy. Payno cajcunataga llapantapis alli ricay-llapa. 30 Gamcunapa ruquiqui yanapämänanpaj cachamuptiquimi yanapaycämashancho cäsi wañushapis. Payga llapantapis päsasha Jesucristuta sirbishpanmi.