15
Ganchis anjilcuna
Chaypitana janaj pachacho ricarä munayniyoj ganchis anjilcunata. Chay anjilcunatami Tayta Dios churaran ganchis casta castïgucunawan cay pachacho runacunata ñacachinanpaj. Chaynöpami Tayta Diospa castïgun cumlenga.
Chaynöpis ricarä ninawan tallusha lünano lamar syëlucho caycajta. Chay lamar ñaupanchömi Tayta Diosman yäracojcuna ichiraycaran. Paycunaga manami chasquicushachu caran waräcuyta ni ïduluta. Ni waräcuypa señalnintapis manami chasquishachu caran. Paycunaga Tayta Dios camaripashan arpacunata tucarmi cantaycaran. Cantaycaran Tayta Diospa sirbejnin Moisés* Éxo. 15.1–18 cantashanta, Cashni uysha cantashanta:
«Llapanpaj munayniyoj Tayta Dios,
Gam rurashayquicunaga fiyupa allimi.
Llapanpa mandajnin Tayta Dios,
Gamga imaypis alli cajllatami ruranqui.
¿Piraj mana manchacushunquimanchu Tayta?* Jer. 10.7
¿Piraj mana alabashunquimanchu?
Gamllami santo canqui.
Llapantapis allita rurashayquicunata ricarmi
llapan nasyun runacuna adurashunquipaj.»* Sal. 86.9
Chaypitaga ricarä syëlucho caycaj Templu rurincho juc cuartu quicharaycajta. Chaypitami llojshimuran castïgucunata apamoj ganchis anjilcuna. Paycunaga lïnupita achicyaycachaycaj röpan jatishami caycaran. Goripita rurasha sinturunninpis pëchunpa wataraycaran. Chayman chuscu anjil-nirajcunapita juc llojshimuran. Paymi ganchis anjilcunata cada ünunta aypuran goripita rurasha bäsuta. Chay bäsucunachömi Tayta Diospa castïgun junta wiñaraycaran. Chay örami Tayta Diospa munayninwan goshtay juntaran* Éxo. 40.34; 1Rey. 8.10–11; 2Crón. 5.13–14; Isa. 6.4 syëlucho caycaj Templuman. Chaymanga manami pipis yaycuyta camäpacuranchu Tayta Diospa ganchis castïguncunata anjilcuna jichamuyta ushanancama.

*15:3 Éxo. 15.1–18

*15:4 Jer. 10.7

*15:4 Sal. 86.9

*15:8 Éxo. 40.34; 1Rey. 8.10–11; 2Crón. 5.13–14; Isa. 6.4