Cantares
¿Tayta Diospäga allichu caycan majachacar goyashanchi?
¿Bibliachöga rimanmanchu juc warmi runawan cuyanacushanpaj?
¿Imataj caycan cay librucho? Cay librupa jutinta hebreo rimaychöga «mas cuyayllapaj caj cantana» ninmi. Caychöga cuyanacuypämi cantan. Quimsajmi chasquipänacuyllapa cantaycan: Juc caycan warmin. Paypämi mas riman cay libruchöga. Mas juc caycan runan. Pay mas riman warmi cuyacoj cashanpaj. Warminta sumaj cuyashanpäpis rimaycan. Mas jucna caycan yanasancuna. Paycunaga caycan warmita compañajcunami. Paycunatami «Jerusalén jipashcuna» niycan.
Cay libruchöga riman rasunpa cuyanacuypämi. Chayno rimaycan juc warmiwan runa cuyanacushanpämi. Cuyanacushanpita y majallanwan goyashanpitami cushicuycan.
Waquin runacunaga niran «chaycunataga Bibliacho ama rimanmanchu» nir. Chaypis waquenga tantiyasha juc runa warminta cuyashanno Tayta Diospis Israelcunata cuyashantami. Chaypita guepatanaga runacuna tantiyasha runa warminta cuyashanno Jesucristupis payman yäracojcunata cuyashanta. Mayganno tantiyaptinpis allimi. Ichanga cay libruta liguishun Génesis 1.27–28 niycashanman yarpacushapis.
1
1 Salomonpa cantanancunapita mas cuyayllapaj alli caj cantana.*1Rey. 4.32; Cant. 3.9–11
Gallaycunan caj cantana
Warmin
2 ¡Ay, mucharcamanquiman ichanga!
Cuyacuyniquega bïnupitapis mas allimi.
3 Perfümiquipa asyaynin maysi musquicuyllami.
Quiquiquimi chay perfüminöga caycanqui.
¡Chaymi jipashcunapis cuyashunqui!
4 ¡Pushacamay ari!
¡Raynillä, wasiquiman pushacamay ari!
Yanasancuna
Gamwanga cushishami goyäshunpaj.
Chaychönami yarpäshun cuyacuyniqui bïnupita mas alli cashanta.
¡Rasuntachari jipashcunaga cuyashunqui!
Warmin
5 Jerusalén jipashcuna
yanalla carpis cuyayllapämi cä.
Cedar runacunapa tolduncunano oguimi cä.
Salomonpa cuartuncho chaparaj tëlacunano cuyayllapämi cä.
6 Ama ricapämaychu yanalla cashätaga,
ni shanaywan yanayasha cashätapis.
Turëcunami nogapaj rabyacarcäriran.
Chaymi übas chacracunata täpachimaran.
¡Quiquëpa übas chacräta ichanga mana täpashcächu!
7 Cuyaynë willamay ari,
¿maypataj uyshayquicunata michinqui?
Las-dösi inti fiyupa shanashan öraga ¿maymantaj llantucachej gatinqui?
¿Imanir-räshi puriycäman amïguyquicuna uywancunata
michicushan guepanpa guella puricachaj warminöga?
Yanasancuna
8 Cuyayllapaj warmicunapitapis mas cuyayllapaj warmi,
mana musyashpayquega
uyshacunapa yupillanpa ayway.
Michicojcunapa chucllancuna caycashan lädullanpa cabrayquicunata michicuy.
Runan
9 Cuyaynë, gamga adurnuyquicunawan canqui
faraonpa carrëtanta garchaj cuyayllapaj fïna yëwannömi.
10 Cärayquega arëtiquicunawan cuyayllapaj achicyayparaj-achicyaycan.
Cuncayquipis perlas wallgacunawan cuyayllapaj camaraycan.
11 Gori adurnucunatami rurapäshayqui.
Yuraj guellaycunatami churapäshayqui.
Warmin
12 Ray jamarashanmanpis
perfümiwan cupacushäpa asyaynenga mayacaycanmi.
13 Nogapäga cuyaynë caycan shuti-mallwawan mïrra perfümita
imaypis wallgarashänömi.
14 Cuyaynë nogapäga caycan cuyayllapaj alli asyaj wayta
En-gadi particho caycajnömi.
Runan
15 Cuyaynë, fiyupa cuyayllapämi canqui.
Rasunpa cuyayllapämi canqui.
Ñawiquicunaga caycan ishcay palumanömi.
Warmin
16 Cuyaynë, fiyupa cuyayllapämi canqui.
Rasunpa cuyayllapaj camaraj runami canqui.
Runan
Cämanchëga caycan berdiraycaj tajta pampami.
17 Wasinchïpa gueruncunanami sedru guerucuna.
Jananchïpa chapämajninchïnami caycan siprescuna.