2
1 Pengacuyta mana yachaj Judá runacuna,
gamcunaga shuntacay juc pachallaman.
2 Shuntacay juc junaj illgänanpaj caycaj päjatano* Sal. 1.4; Jer. 13.24; Ose. 13.3 manaräpis jitarishuptiqui,
Tayta Dios rabyashan gamcunaman ninano manaraj chayamuptin,
Tayta Diospa fiyupa castïgun manaraj chayamuptin.
3 Cay pachacho umildi cajcuna,
pay nishanta wiyacojcuna,
llapaniqui Tayta Dios munashanno ruray.
Rasun cajllata rurashpayqui umildilla goyay.
Chayno goyashpayquega capaschari salbacunquimanpis
Tayta Dios rabyar jusganan junäga.* Isa. 55.6–7; Joel 2.12–14
Filistea runacunapa contran rimashan
4 ¡Ay imanöraj canqui Filisteacho caycaj siudäcuna!
Gaza siudäga quëdangapaj chunyajmi.
Ascalón siudänami ushacasha quëdanga.
Asdod siudächo tiyajcunataga junajpami gargonga.
Ecroncho tiyajcunataga jachata sapipita achurejnömi jitarenga.
5 ¡Ay imanöraj canqui Creta lamar cantuncho tiyajcuna!
Tayta Diosga gamcuna cayno canayquipämi nisha:
«Canaancho tiyaycaj Filistea runacunata* Isa. 14.29–31; Jer. 47.1–7; Eze. 25.15–17; Joel 3.4–8; Amós 1.6–8; Zac. 9.5–7 illgächirmi chunyajta cachaycushaj.»
6 Lamar cantuncho caycaj nasyonga ticranga uywa tiyanan jircamanmi.
Chaymanmi achcaj uyshërucunapis shuntacanga.
Uywancunapaj curralcunatapis chaychömi ruracarcärengapaj.
7 Cawaycar quëdaj caj Judá runacunaga
Filisteamanmi tiyacaycärengapaj.
Chaymanmi uyshancunata gatengapaj michinanpaj.
Chacaypanami Ascalón siudächo caycaj wasicunacho puñonga.
Chaynöga cangapaj Tayta Diosnin paycunata yapay alli goyänanpäna yanapaptinmi.
Moabpawan Amonpa contran rimashan
8 Israelcunapa munayniyoj Tayta Diosnin caynömi nin:
«Wiyashcämi Moab runacuna* Isa. 15–16; 25.10–12; Jer. 48; Eze. 25.8–11; Amós 1.13–15 imano ashllishushayquitapis,
Amón runacuna* Jer. 49.1–6; Eze. 21.28–32; 25.1–7; Amós 1.13–15 achäquita ashipäshushayquitapis.
Paycunaga ashllisha acrashä runacunatami.
Nircorga munayniyoj-tucushpanmi acrashä runacunapa nasyunninman mashtacasha.
9 Chaypitami nogaga quiquëpa jutëcho jurashpä në:
Moabtaga päsangapaj Sodomata päsashannömi.
Amontapis päsangapaj Gomorrata* Gén. 19–24 päsashannömi.
Chay siudäcunaga shata cashacunallami,
cachi rumicunaman ticrashami cangapaj.
Chay siudäcunaga ticrangapaj chunyajmanmi.
Chaura cawaycar quëdaj acrashä runacunami ima-aycantapis shuntaconga.
Chay runacunapa chacrancunamanpis paycunanami tiyacaycärengapaj.»
10 Moab runacunawan Amón runacunaga chaynömi päguta chasquengapaj
Tayta Dios acrashan runacunata ashllishanpita, munayniyoj-tucushanpita.
11 Llapan dioscunata illgächishpan
chay nasyun runacunataga Tayta Dios fiyupami mancharachengapaj.
Intëru munducho tiyajcunapis Tayta Diosllatanami adurangapaj.
Chaura may-chaychöpis payllanami adurasha cangapaj.
Etiopiapa contran rimashan
12 ¡Etiopía runacuna,* Isa. 18.1–7 gamcunapäpis Tayta Dios camacächenga espädanwan wañunayquipämi!
Asiriapa contran rimashan
13 Nircur Tayta Diosga Asiria runacunatanami* Isa. 10.5–34; 14.24–27; Nah. 1–3 castigar illgächengapaj.
Capitalnin Nínive siudächo tiyajcunatapis uywantinta ushajpämi wañuchenga.
Chaymi chunyaj chaqui jircaman ticrashano ricaconga.
14 Chaura chay partiga uywacuna tiyanallannami cangapaj.
Tucuy casta chucaru animalcunapa tiyanallannami cangapaj.
Garsami, tucumi siudä juchushan tushacunachöpis puñongapaj.
Tucucunapis waganga ragäpa bentänancunacho.
Cuervocunapis numralcunacho gaparpanga.
15 Chay siudä runacunami caycan fiyupa alli-tucoj.
Chaycho tiyajcunaga imapäpis mana yarpachacuypami goyarcaycan.
Chay runacunaga caynömi parlan:
«Cay siudäninchïnöga manami juc siudä canchu» nir.
Ichanga chay siudäpis muntuy-muntuy juchushami quëdanga.
Atojcunapa tiyananmanmi ticranga.
Pï-maypis chay siudä ñaupanpa päsashpanga
wichyapar maquinwan togrishpanraj manacajman churar asipanga.
*2:2 Sal. 1.4; Jer. 13.24; Ose. 13.3
*2:3 Isa. 55.6–7; Joel 2.12–14
*2:5 Isa. 14.29–31; Jer. 47.1–7; Eze. 25.15–17; Joel 3.4–8; Amós 1.6–8; Zac. 9.5–7
*2:8 Isa. 15–16; 25.10–12; Jer. 48; Eze. 25.8–11; Amós 1.13–15
*2:8 Jer. 49.1–6; Eze. 21.28–32; 25.1–7; Amós 1.13–15
*2:9 Gén. 19–24
*2:12 Isa. 18.1–7
*2:13 Isa. 10.5–34; 14.24–27; Nah. 1–3