RI NABꞌE WUJ RI XUTZꞌIBꞌAJ RI PABLO CHIKE RI KOJONELABꞌ AꞌJ TESALÓNICA
Majibꞌal re
Pa taq ri junabꞌ 51 are kaminaq chi ri Cristo, ri Pablo rachiꞌl ri Silas xuqujeꞌ ri Timoteo xeꞌkitzijoj ri utz laj tzij re ri Jesús ri Mesías chike ri winaq ri e kꞌo pa ri tinimit Tesalónica. Sibꞌalaj e kꞌi xekojonik, pune jeriꞌ e kꞌo nikꞌaj winaq xkimulij kibꞌ xkimol kimak ri Pablo rachiꞌl ri Silas xkibꞌij chi man kakinimaj ta ri utaqanik ri César, xuqujeꞌ xeꞌkitzujuj chi kakibꞌij chi kꞌo chi jun nim taqanel ri kakitzijoj ubꞌiꞌnam Jesús. (chawila pa Hechos 17:1-9) Are xkita we riꞌ chi awal xeꞌl bꞌik pa ri tinimit, xaꞌnimaj bꞌik.
Are ikꞌowinaq chi jun janipa junabꞌ, ri Pablo xkꞌaxir ukꞌuꞌx chike ri kojonelabꞌ ri e kꞌo pa ri tinimit Tesalónica rukꞌ ta ne jutzꞌit keꞌl kanoq pa ri kikojobꞌal rumal ri kꞌax ri tajin kakiriqo, xaq jeriꞌ xutaq bꞌik ri Timoteo chuyaꞌik kichuqꞌabꞌ.
Ri Timoteo are xtzalij pa ri tinimit Acaya xuꞌya ubꞌixik che ri Pablo chi ri e kꞌo pa Tesalónica ko e kꞌolik pa ri kikojobꞌal, ri Pablo xutzꞌibꞌaj jun wuj chukꞌutik ri ukiꞌkotemal. Pa we nitzꞌ wuj riꞌ, ri Pablo kunaꞌtaj are xkꞌojiꞌk pa ri tinimit Tesalónica xuqujeꞌ kutyoxij chike chi ko e kꞌo pa ri kikojobꞌal pune kꞌi ri kꞌax ri tajin kakiriqo. Ri Pablo xukꞌut chikiwach chi rajawaxik kakiqꞌat kibꞌ che ri bꞌanoj mak kukꞌ taq ixoqibꞌ xuqujeꞌ kukꞌ taq achyabꞌ, xuqujeꞌ chuloqꞌaxik kibꞌ chi kijujunal je xuqujeꞌ rech kechakunik kakichꞌek rajil ri kakitijo.
Ri Pablo xuqujeꞌ kuya jun kꞌutuꞌn jacha ta ne rech jun ajyuqꞌ kuta we kꞌotbꞌal riꞌ chike: ¿Jas kikuꞌlibꞌal kikꞌuꞌx ri kojonelabꞌ chike ri e kaminaq chik? Ri Pablo kukꞌut chikiwach chi ri kojonelabꞌ ri xekamik are kꞌamajaꞌ kape ri Cristo man xsach ta kiwach, xane kakꞌastajisax kiwach pa ri petibꞌal. Kunaꞌtaj chike ri aꞌj Tesalónica chi ri Cristo kape na are maj jun kanabꞌenik, xaq jeriꞌ rajawaxik utz kibꞌana chukꞌaslebꞌexik ri kikꞌaslemal rech kakayeꞌj apanoq.
Ri ukꞌuꞌx ri xraj ri Pablo xubꞌij pa we wuj riꞌ. Are chi ri winaq kakilij ri chak ri utz ubꞌanik.
1
1 Ri Pablo, ri Silvano*Ri Silvano are xuqujeꞌ Silas, are waꞌ ri achi ri xukꞌam bꞌik ri Pablo are xubꞌusolij ri kojonelabꞌ chukabꞌ mul. Hechos 15:40. xuqujeꞌ ri Timoteo, kakitaq rutzil kiwach konojel ri e komontyox ri e kꞌo pa ri Tataxel Dios xuqujeꞌ pa ri Ajawxel Jesucristo. Chikꞌamawaꞌj toqꞌobꞌ xuqujeꞌ jaꞌmaril.
Tyoxinik che ri Dios kumal ke ri kojonelabꞌ aꞌj Tesalónica
2 Ronojel mul kujtyoxin che ri Dios rumal iwe, are kixnaꞌtaj chaqe pa ri qachꞌawem. 3 Amaqꞌel kixqanaꞌtaj cho ri Dios ri qatat rumal ri ichak ri ibꞌanom rukꞌ kojobꞌal, ri ichak ri xibꞌan rukꞌ loqꞌanik, xuqujeꞌ ri ikuꞌlibꞌal ikꞌuꞌx pa ri Ajawxel Jesucristo. 4 Loqꞌalaj taq alaxik rech ri Dios, qetaꞌm chi are ri Dios ix choꞌwinaq apanoq. 5 Jeriꞌ rumal man xwi ta xqatzijoj ri utzij ri Dios chiꞌwe rukꞌ taq tzij, xane qas kꞌyaqalik ri xqabꞌij chiꞌwe chi ri Tyoxalaj Uxlabꞌixel kachakun pa qanimaꞌ uj rech qas utz kaqabꞌan chubꞌixik ri tzij chiꞌwe.
6 Ri ix je xibꞌano jetaq ri xqabꞌan uj xuqujeꞌ jetaq ri xubꞌano ri Ajawxel, pune xiriq sibꞌalaj kꞌax xikꞌamawaꞌj rukꞌ kiꞌkotemal ri utz laj tzij ri kuya ri Tyoxalaj Uxlabꞌixel. 7 Rumal riꞌ xikꞌut chikiwach ri kojonelabꞌ aꞌj Macedonia xuqujeꞌ aꞌj Acaya jas ri usukꞌ ri jastaq. 8 Jeriꞌ rumal ri ix xitzijoj ri utzij ri Jesucristo, man xaq xwi ta pa Macedonia xuqujeꞌ pa Acaya xane pa ronojel kꞌolibꞌal. Ri winaq ri keꞌl chilaꞌ ketaꞌm chik chi ixkojoninaq che ri Dios, rumal riꞌ man choqꞌaqꞌ ta chik chi kaqabꞌij uj jun jastaq chik chike. 9 Tzi aꞌreꞌ ri winaq ketzijonik chi ix xujikꞌamawaꞌj xuqujeꞌ qas sukꞌ xkibꞌano aꞌreꞌ xekojon che ri Dios, xeꞌkitzaq kanoq ri e bꞌanom tyox xkichapleꞌj upatanixik ri kꞌaslik Dios. 10 Xuqujeꞌ kakibꞌij chi iwayeꞌm apanoq ri Jesús, ri uKꞌojol ri Dios, ri xukꞌastajisaj ri Dios chikixoꞌl ri kaminaqibꞌ, Areꞌ kujkolow na pa ri qꞌij are kaqꞌat na tzij pa kiwiꞌ konojel ri winaq.
*1:1 Ri Silvano are xuqujeꞌ Silas, are waꞌ ri achi ri xukꞌam bꞌik ri Pablo are xubꞌusolij ri kojonelabꞌ chukabꞌ mul. Hechos 15:40.