RI UKABꞌ WUJ RI XUTZꞌIBꞌAJ RI PEDRO
Majibꞌal re
Pa ri junabꞌ d. C. 65 ri taqoꞌn Pedro xokisax pa cheꞌ pa ri tinimit Roma rumal ri nim taqanel ubꞌiꞌnam Nerón xuqujeꞌ xretaꞌmaj chi man naj ta chik kꞌaslik xaq jubꞌiqꞌ chik karaj kakamisaxik. Rumal kꞌu che ri xrilo ronojel ri xubꞌan ri Jesús, rumal riꞌ xutzꞌibꞌaj chi jun wuj chike ri kojonelabꞌ ri xutzꞌibꞌaj wi ri nabꞌe uwuj kuya apanoq ubꞌixik chi qas tzij xuqujeꞌ kꞌyaqalik ri xukꞌut kanoq ri Jesús.
Ri e jalul taq kiwach aꞌjtijabꞌ kakitzijoj chi man tzalijinaq ta loq ri Jesús xuqujeꞌ man kꞌo ta chi rumal kayeꞌxik rumal chi man katzalij ta loq, kakitzijoj chi maj chi kꞌaxkꞌolal kape na pa kiwiꞌ ri kakibꞌan ri mak ri man yaꞌtal taj kabꞌanik. (Ri Pedro xretaꞌmaj pa ri uwuj ri Judas, rachalal ri Jesús, chi jeriꞌ tajin kenoꞌjin ri aꞌjtijabꞌ rumal riꞌ xuꞌtzꞌibꞌaj ri wuj rech kuqꞌalajisaj apanoq chikiwach ri kojonelabꞌ ri tajin kakꞌulmatajik. Ri uwuj ri Pedro raj kajunumataj rukꞌ ri uwuj ri Judas). Ri Pedro kuya ubꞌixik chike ri kakijaluj chi aꞌjtijabꞌ chi areꞌ qas xril ri ukwinem xuqujeꞌ ujuluwem ri Dios puꞌwiꞌ ri juyubꞌ. (chawila Marcos 9:2 – 13) Konojel kakil na ri ujuluwem ri Jesús are katzalij loq. Ri Pedro kutzijoj rij ri kꞌaxkꞌolal ri kukꞌam loq ri kꞌutuꞌn kech ri kakijaluj chi aꞌjtijabꞌ xuqujeꞌ ri kꞌaxkꞌolal ri kape pa kiwiꞌ ri winaq ri kakitatabꞌej we kꞌutuꞌn riꞌ.
Pa ri kꞌisbꞌal re we wuj riꞌ, ri Pedro kubꞌij chi ri upetibꞌal ri Jesús bꞌeyetajinaq rumal are karaj chi konojel ri winaq kakikꞌex kikꞌuꞌx. Xaq jeriꞌ rajawaxik chi kaqakꞌaslebꞌej utz taq kꞌaslemal xuqujeꞌ kaqayeꞌj apanoq ri Jesús, jeriꞌ rumal are qayeꞌm apanoq ri kꞌakꞌ kaj rachiꞌl ri kꞌakꞌ ulew jawjeꞌ kꞌo wi ri sukꞌal.
1
1 In waꞌ ri Simón Pedro, in patanijel xuqujeꞌ taqoꞌn rech ri Jesucristo, kintzꞌibꞌaj we wuj riꞌ chike ri kikꞌamawaꞌm jun kojobꞌal ri sibꞌalaj paqal rajil, jetaq ri qe uj, xa rumal ri usukꞌal ri qaDios xuqujeꞌ ri qaKolonel Jesucristo. 2 Chikꞌamawaꞌj nimalaj toqꞌobꞌ xuqujeꞌ jaꞌmaril pa ri retaꞌmabꞌal ri Dios xuqujeꞌ ri Ajawxel Jesucristo.
Rajawaxik ko kakꞌojiꞌk jun pa ri sikꞌinik ri xya che rumal ri Dios
3 Are ri chikajil ukwinem ri Dios xyoꞌwik ri etaꞌmanik chaqe are xujusikꞌij apanoq pa ri ujeꞌlal ri ujuluwem rech xuya ronojel ri jastaq ri kajawataj chaqe, rech kujkꞌasiꞌk jetaq ri karaj ri areꞌ. 4 Ri Dios xuya chaqe ri paqalik xuqujeꞌ jeꞌl laj taq tzij, rech jeriꞌ kixkwinik kixel loq pa taq ri etzelal ri kꞌo pa ri uwachulew rumal ri itzel taq rayinik, rech jeriꞌ kꞌo iwech che ri kꞌaslemal rech chikajil. 5 Rumal waꞌ rajawaxik kikoj ichuqꞌabꞌ rech xa jeriꞌ kanimar ri ikojobꞌal, chibꞌana utz taq chak rukꞌ ri ikojobꞌal, chibꞌana utz taq chak rukꞌ etaꞌmanik. 6 Qas chinaꞌ rukꞌ etaꞌmabꞌal jas ri kibꞌano, chiwilij ubꞌanik ri utzilal rukꞌ ri inaꞌoj, rukꞌ ri inaꞌoj chiqꞌijilaꞌj ri Dios. 7 Ri irayinik chupatanixik ri Dios, chibꞌana rukꞌ loqꞌanik. Xuqujeꞌ ri irayinik chubꞌanik ri utzilal chibꞌana rukꞌ loqꞌanik.
8 We utz kixnoꞌjinik, kixkꞌiy riꞌ pa ri etaꞌmanik rech ri Ajawxel Jesucristo rech jeriꞌ kixux winaq ri kꞌo kitayij. 9 Are kꞌu ri winaq ri man utz taj kanoꞌjinik man naj taj kopan wi ri ukaꞌyebꞌal, xsachan che chi xchꞌajchꞌobꞌex che ri najtir taq umak. 10 Rumal riꞌ, wachalal, chikojo ichuqꞌabꞌ rech qas kixjeqiꞌk pa ri usikꞌinik ri Dios, ri xixchoꞌwik. We are kibꞌan we jastaq riꞌ man kixtzaq ta wi pa mak. 11 Kajaqataj na ri uchiꞌ ja rech ri ajawarem rech ri Ajawxel Jesucristo qaKolonel, ri maj ukꞌisik.
12 Rumal riꞌ kinnaꞌtaj wi na chiꞌwe we jastaq riꞌ pune iwetaꞌm chik xuqujeꞌ qas ix jeqel chik pa ri qas tzij. 13 Wetaꞌm chi yaꞌtal chwe kinqꞌalajisaj ri utzij ri Dios, rumal cher in kꞌas na. 14 Rumal kꞌu cher wetaꞌm chi man naj ta chik in kꞌaslik jeriꞌ xukꞌut ri Ajawxel Jesucristo chinuwach. 15 Kinkoj sibꞌalaj nuchuqꞌabꞌ rech jeriꞌ we kinkamik, kanaꞌtaj na chwe ronojel ri xinbꞌano.
16 Man xaq ta bꞌanoj tzij ri xqabꞌij chiꞌwe, are xqatzijoj ri upetibꞌal ri Ajawxel Jesucristo rukꞌ ri ukwinem, man xaq ta xqawok aqꞌanoq xane are xqatzijoj ri nimalaj ukwinem ri qas xqilo. 17 Ri Cristo xya uqꞌij xuqujeꞌ xukꞌamawaꞌj juluwem rumal ri Tataxel Dios xchꞌaw loq pa ri jeꞌl laj ukꞌolibꞌal xubꞌij: “Are waꞌ ri loqꞌalaj nukꞌojol, ri sibꞌalaj kakiꞌkot wanimaꞌ rukꞌ.” 18 Qas uj kꞌo uj rukꞌ ri Jesús are xqata ri chꞌabꞌal ri upetik pa ri kaj, are uj kꞌo puꞌwiꞌ ri tyoxalaj juyubꞌ.✡Mateo 17:1-5; Marcos 9:2-7; Lucas 9:28-35.
19 Rukꞌ waꞌ xqꞌalajisax chiqawach ri utz laj tzij ri xkitzijoj ri qꞌalajisal taq utzij ri Dios, ri utz xibꞌan chutatabꞌexik, kajunumataj rukꞌ jun qꞌaqꞌ ri katunan pa ri qꞌequꞌm, kꞌa kuriq na ri qꞌij are kel loq ri qꞌij ri katunanik pa taq iwanimaꞌ. 20 Qas naꞌtaj chiꞌwe, chi man kꞌo ta jun qꞌalajisanik tzꞌibꞌatalik pa ri utzij ri Dios ri xaq achi xwokowik. 21 Jeriꞌ, rumal ri uqꞌalajisaxik ri utzij ri Dios man kichomanik taj ri achyabꞌ, xane are ri Tyoxalaj Uxlabꞌixel xqꞌalajisan chikiwach ri e qꞌalajisal taq utzij ri Dios ojer, ri tzij ri rajawaxik katzijoxik.