RI UTZ LAJ TZIJ RE RI JESÚS RI XUTZꞌIBꞌAJ RI MATEO
Majibꞌal re
Mateo ubꞌiꞌnam we wuj riꞌ rumal cher are ri taqoꞌn Mateo xtzꞌibꞌanik. We wuj riꞌ xtzꞌibꞌax pa ri junabꞌ 60 are alaxinaq chi ri Cristo. Ri jun ubꞌiꞌ chi ri Mateo are Leví. We wuj riꞌ xtzꞌibꞌaxik pa ri tinimit Palestina. Kajibꞌ ciento junabꞌ uxoꞌl we wuj riꞌ rukꞌ ri kꞌisbꞌal wuj ri xutzꞌibꞌaj ri Malaquías pa ri ojer wuj.
We nabꞌe wuj riꞌ re we kꞌakꞌ Testamento kutzijoj chaqe ri xubꞌan ri Jesús are xkꞌojiꞌk cho ri uwachulew xuqujeꞌ kuqꞌalajisaj chi ri Jesús are nim Taqanel.
Pa we wuj riꞌ tzꞌibꞌatal wi ri xkꞌulmataj rukꞌ ri Jesús, ri Cristo, ri tzujtal loq chike ri winaq jacha ri kubꞌij ri ojer wuj. We utz laj taq tzij riꞌ man xaq xwi ta xpe chike ri winaq ri aꞌj Israel, jawjeꞌ ri xulkꞌol wi ri Jesús xane xpe chike konojel ri winaq ri e kꞌo cho ri uwachulew.
We utz laj taq tzij riꞌ kubꞌij chaqe chi xwi ri Cristo Jesús kakwinik kuya qakoltajem we kujkojon che.
Pa we wuj riꞌ kꞌo jobꞌ jaljoj taq uwach kꞌutuꞌn ri uyaꞌom ri Dios chaqe.
Kachapleꞌtaj bꞌik pa ri qꞌat jobꞌ are waꞌ ri katzijon chirij ri kꞌutuꞌn ri xuya ri Jesús puꞌwiꞌ ri juyubꞌ katoꞌtaj pa ri qꞌat wuqubꞌ. We kꞌutuꞌn riꞌ kuya ubꞌixik chaqe jas jeꞌ kaqabꞌan chukꞌaslebꞌexik ri qakꞌaslemal chiqajujunal xuqujeꞌ chi ronojel ri kꞌo qukꞌ kꞌo pa uqꞌabꞌ ri Dios. Pa ri qꞌat lajuj kutzijoj jas xkibꞌan ri tijoxelabꞌ chutzijoxik ri tzij re kolotajem xuqujeꞌ jas kakibꞌan ri winaq rech kuꞌx re ri Dios.
Pa ri qꞌat 13 kubꞌij jas kuya na ri Dios chaqe chiqajujunal.
Ri qꞌat 18 kutzijoj ri karaj ri Dios kakibꞌan ri utijoxelabꞌ.
Kꞌisbꞌal re kachapleꞌtaj bꞌik pa ri qꞌat 24 katoꞌtaj pa ri qꞌat 28 kutzijoj chaqe ri kꞌisbꞌal taq qꞌij ri xkꞌojiꞌk ri Jesús cho ri uwachulew, xuqujeꞌ kubꞌij jas xbꞌan che are xchapik, are xbꞌan kꞌax che, are xekebꞌax cho ri ripbꞌal xuqujeꞌ kuya ubꞌixik chaqe are xkꞌastaj uwach.
1
Kibꞌiꞌ ri e ratiꞌt umam ri Jesucristo
1 Are waꞌ ri kibꞌiꞌ ri e ratiꞌt umam ri Jesús rijaꞌl ri David, rijaꞌl ri Abraham.
2 Ri Abraham are utat ri Isaac, ri Isaac are utat ri Jacob, ri Jacob are utat ri Judá xuqujeꞌ are kitat ri e rachalal. 3 Ri Judá are utat ri Fares xuqujeꞌ ri Zera (are kinan ri Tamar), ri Fares are utat ri Ezrón, ri Ezrón are utat ri Ram. 4 Ri Ram are utat ri Aminadab, ri Aminadab are utat ri Naasón, ri Naasón are utat ri Salmón. 5 Ri Salmón are utat ri Booz (are unan ri Rahab), ri Booz are utat ri Obed (are unan ri Rut), ri Obed are utat ri Isaí. 6 Ri Isaí are utat ri taqanel David, ri David are utat ri Salomón (are unan ri Betsabé, rixoqil kan ri Urías).
7 Ri Salomón are utat ri Roboám, ri Roboám are utat ri Abdías, ri Abdías are utat ri Asá. 8 Ri Asá are utat ri Josafat, ri Josafat are utat ri Jorán, ri Jorán are utat ri Uzías. 9 Ri Uzías are utat ri Jotán, ri Jotán are utat ri Acaz, ri Acaz are utat ri Ezequías. 10 Ri Ezequías are utat ri Manasés, ri Manasés are utat ri Amón, ri Amón are utat ri Josías. 11 Xuqujeꞌ ri Josías are utat ri Jeconías xuqujeꞌ are kitat ri e rachalal che taq riꞌ are xekꞌam bꞌik ri winaq aꞌj Israel pa ri tinimit Babilonia.
12 Are ikꞌowinaq chi ri qꞌotaj are xetzalij ri winaq aꞌj Israel pa Babilonia, ri Jeconías xutik ri Salatiel, ri Salatiel are utat ri Zorobabel. 13 Ri Zorobabel are utat ri Abiud, ri Abiud are utat ri Eliaquín, ri Eliaquín are utat ri Azor. 14 Ri Azor are utat ri Sadoc, ri Sadoc are utat ri Aquín, ri Aquín are utat ri Eliud. 15 Ri Eliud are utat ri Eleazar, ri Eleazar are utat ri Matán, ri Matán are utat ri Jacob. 16 Xuqujeꞌ ri Jacob are utat ri José, rachajil ri María, ri unan ri Jesús, ri kabꞌix Mesías che.
17 Xaq jeriꞌ e kajlajuj puq winaq atiꞌt mam kitereneꞌlom kibꞌ xchapleꞌtaj loq rukꞌ ri Abraham xultoqꞌol rukꞌ ri David, kꞌa te riꞌ e kajlajuj puq winaq chik atiꞌt mam kitereneꞌlom kibꞌ xchapleꞌtaj loq rukꞌ ri David xopan kꞌa pa ri qꞌij are xekꞌam bꞌik ri winaq aꞌj Israel pa ri tinimit Babilonia, xuqujeꞌ kajlajuj puq winaq atiꞌt mam kitereneꞌloꞌm kibꞌ xchapleꞌtaj loq pa ri qꞌij ri xekꞌam bꞌik pa ri tinimit Babilonia kꞌa pa taq ri qꞌij are xalax ri Cristo.
Alaxibꞌal rech ri Jesucristo
(Lucas 2:1-7)
18 Are waꞌ ri xkꞌulmatajik are xalax ri Jesús, ri Cristo. Ri María unan ri Jesús jubꞌiqꞌ karaj kakꞌuliꞌ rukꞌ ri José, majoꞌq kꞌu kakꞌuliꞌk are xkanaj yawabꞌ winaq rumal ri ukwinem ri Tyoxalaj Uxlabꞌixel. 19 Ri José ri rachajil ri María, rumal cher sukꞌ ranimaꞌ, man xraj taj xuya ri rixoqil pa ukꞌixibꞌal, xuchomaj kuqꞌat ribꞌ che ri rixoqil, maj jachin che xutzijoj wi. 20 Tajin kꞌu kuchomaj ubꞌanik we riꞌ are xukꞌut ribꞌ jun ángel rech ri Ajawxel choch pa ri uwaram, xubꞌij che: José, rijaꞌl ri David, man kaxiꞌj ta awibꞌ kakꞌam che awixoqil ri María, rumal cher are ri Tyoxalaj Uxlabꞌixel xtikoꞌnij che. 21 Kakꞌojiꞌ kꞌu na jun ral ala, kakoj na Jesús che ubꞌiꞌ, rumal cher areꞌ kakolow na ri utinimit che ri kimak.*Jesús kel kubꞌij Kolonel.
22 Ronojel we jastaq riꞌ xbꞌantajik rech kakꞌulmataj ronojel ri ubꞌim loq ri Ajawxel chuchiꞌ ri qꞌalajisal rech ri utzij, are xubꞌij:
23 Ri qꞌapoj ali kux na yawabꞌ winaq.
Kakꞌojiꞌ na jun ral ala, ri kabꞌix na Emanuel che, ri kel kubꞌij: Are ri Dios kꞌo qukꞌ.✡Isaías 7:14.
24 Are xkꞌastaj ri José che ri uwaram, xunimaj ri xbꞌix che rumal ri ángel, xukꞌam ri María che rixoqil. 25 Man xqꞌoyiꞌ ta kꞌu na rukꞌ ri María kꞌa xkꞌojiꞌ na ri nabꞌyal ral, Jesús xukoj che ubꞌiꞌ.