RI XQꞌALAJISAX CHOCH RI JUAN
Majibꞌal re
Ri Nim Taqanel rech ri tinimit Roma man xraj taj chi mat areꞌ kabꞌan re puꞌwiꞌ ri jastaq kech ri kojonelabꞌ rumal ri xuya taqanik chi kabꞌan ri “Pax Romana” ri kel kubꞌij Jaꞌmaril pa Roma.
Kꞌo jun kojonel aj Israel ubꞌiꞌnam Juan ri xeꞌyoꞌq kanoq pa ri jun leꞌaj ri sutital rumal jaꞌ, ri ubꞌiꞌnam Patmos. Chilaꞌ xkꞌut wi choch chi kasach na uwach ri xubꞌan ri nim taqanel xuqujeꞌ kakiriq na kꞌax ri e tereneꞌl taq re ri Mesías.
Ri wuj re Apocalipsis ri kel kubꞌij ri kilitaj na uwach, jun wuj qꞌilbꞌal ri kaya chike wuqubꞌ tinimit ri e kꞌo pa ri tinimit Roma rech Asia menor.
Ri xraj ri Juan are xutzꞌibꞌaj we wuj riꞌ are chi kuya kichuqꞌabꞌ xuqujeꞌ kuꞌtaqchiꞌj ri kojonelabꞌ ri keꞌl pa we leꞌaj riꞌ pune tajin kakiriq ri kꞌaxkꞌolal.
Ri xkꞌut rij ubꞌiꞌnam Apocalipsis, jewaꞌ kabꞌix che pa taq ri qꞌij are xtzꞌibꞌan ri Juan.
Pa jun tzꞌibꞌ ri kabꞌix Apocalipsis che ojer kꞌo jun solinel ri kape pa ri kaj kulukꞌutu rukꞌ taq jaljoj jastaq jun jastaq ri man ilitajinaq ta wi cho uwachulew, pune ri kꞌutbꞌal ri kakojik sibꞌalaj mayijabꞌal pa ri nabꞌe mul qas kaqꞌalanijik pa ri junabꞌ.
We wuj riꞌ kutzijoj kajibꞌ jastaq ri xkꞌut cho ri Juan, kikajichal tꞌiqtal rumal ri tzij pa ri Uxlabꞌixel.
Are xbꞌiꞌtaj ri tzij rech qꞌilbꞌal xuqujeꞌ yabꞌal kichuqꞌabꞌ ri e wuqubꞌ komontyox, ri xkꞌut cho ri Juan kuchapleꞌj chirij ri Jesús, ri xubꞌano chi kiloqꞌik ri winaq xuqujeꞌ ri qꞌatoj tzij ri kukꞌam na loq cho ri uwachulew.
Ri e taqanelabꞌ nimaꞌq kibꞌantajik ri man keniman ta che ri Dios kakꞌis na tzij pa kiwiꞌ. Ri Mesías kachꞌeken kꞌu na pa kiwiꞌ konojel ri uꞌkꞌulel.
Ri kꞌisbꞌal re we wuj kubꞌij chi ri e patanil re ri Dios, ri qas kajeqiꞌ kikꞌuꞌx chirij ketaqan na rukꞌ ri Jesús pa ri rajawarem.
Ri wuj Apocalipsis jer kꞌo jun tzꞌapibꞌal re ronojel ri xkꞌulmataj pa ri Tyoxalaj Wuj.
Ri Juan kukꞌis utzaꞌm ri wuj kutzijoj rij jas ubꞌantajik ri Edén rumal are waꞌ ri nabꞌe jastaq ri xtzijox rij pa ri Tyoxalaj Wuj.
Ri uwachulew karil na jun kꞌakꞌ chapleꞌtajik ri tꞌuyul pa ri Tꞌuyulibꞌal xubꞌij: Kinbꞌan na kꞌakꞌ che ronojel ri kꞌolik.
1
Majibꞌal re
1 Are waꞌ ri xuqꞌalajisaj ri Jesucristo, ri xya che rumal ri Dios rech kukꞌut chikiwach ri uꞌtaqoꞌn. Ri Jesucristo xutaq loq jun ángel xulubꞌij we jastaq riꞌ che ri utaqoꞌn Juan. 2 Ri Juan kuqꞌalajisaj ri utzij ri Dios, ri utzij ri Jesucristo xuqujeꞌ xuqꞌalajisaj chi qas tzij xril we jastaq riꞌ.
3 Utz rech ri kusikꞌij we tzij riꞌ xuqujeꞌ utz ke ri kakitatabꞌej we tzij riꞌ, xuqujeꞌ kakiyak pa kanimaꞌ ri jastaq ri tzꞌibꞌatal pa we wuj riꞌ, rumal cher man naj ta chik karaj kakꞌulmataj we jastaq riꞌ.
Rutzil wach xuqujeꞌ qꞌijilaꞌnem
4 In in Juan, kintzꞌibꞌaj we wuj riꞌ chike ri e wuqubꞌ komontyox ri e kꞌo pa Asia: Chikꞌamawaꞌj toqꞌobꞌ xuqujeꞌ jaꞌmaril che ri Dios ri areꞌ kꞌo kanoq, areꞌ kꞌo kamik xuqujeꞌ areꞌ kape na; xuqujeꞌ che ri e wuqubꞌ uxlabꞌal ri e kꞌo cho ri utꞌuyulibꞌal ri Dios; 5 xuqujeꞌ che ri Jesucristo, ri qas kaqꞌalajisan ronojel ri jastaq, ri xkꞌastaj uwach nabꞌe chikiwach konojel ri kaminaqibꞌ, ri kabꞌan rech pa kiwiꞌ konojel ri e taqanelabꞌ cho ri uwachulew, ri xujuloqꞌaj xuqujeꞌ xuchꞌaj ri qamak rukꞌ ri ukikꞌel. 6 Xuqujeꞌ xubꞌan chaqe chi uj taqanelabꞌ xuqujeꞌ uj chꞌawenelabꞌ cho ri Dios rech kaqapatanij ri Dios, ri Tataxel. ¡Che areꞌ yaꞌtal wi kaya ri juluwem xuqujeꞌ ri kwinem chibꞌe qꞌij saq! Jeriꞌ.
7 ¡Chiwilampeꞌ, ri Cristo kape na pa ri sutzꞌ! Konojel ri winaq kakil na rukꞌ ri kibꞌoqꞌoch, xuqujeꞌ konojel ri winaq ri e kꞌo cho ri uwachulew ri xekamisan bꞌik koꞌqꞌ na rumal rech. Jeꞌ jeriꞌ.
8 “Ri in ri Ajawxel ri kinkwin chubꞌanik ronojel ri jastaq, in kꞌaslik xuqujeꞌ in kꞌas wi loq xuqujeꞌ xa jubꞌiqꞌ kawaj kinopanik, kinbꞌij: In in majibꞌal rech xuqujeꞌ in kꞌisbꞌal rech ronojel.”
Ri xkꞌut cho ri Juan chirij ri Jesucristo
9 In in Juan, in iwachalal, xuqujeꞌ in iwachiꞌl pa ri kꞌax ri kaqariqo pa ri ajawarem rech ri Dios xuqujeꞌ pa ri jeqelem ri yaꞌtal chaqe rukꞌ ri Jesús. In in kꞌo pa ri jubꞌiqꞌ chaqiꞌj ulew ri ubꞌiꞌnam Patmos, xa rumal utzijoxik ri utzij ri Dios xuqujeꞌ rumal uqꞌalajisaxik ri Jesús. 10 Pa ri uqꞌijal ri Ajawxel, in in kꞌo pa ri Uxlabꞌixel, xaq kꞌa te xinta jun ko alaj chꞌabꞌal chwij jetaq ri uchꞌabꞌal jun suꞌ. 11 Ri chꞌabꞌal xubꞌij: Chatzꞌibꞌaj pa jun wuj ronojel ri kawilo, kꞌa te riꞌ chataqa chike ri e wuqubꞌ komontyox ri e kꞌo pa Asia: ri komontyox rech Éfeso, Esmirna, Pérgamo, Tiatira, Sardis, Filadelfia xuqujeꞌ ri komontyox pa Laodicea.
12 Are xintzalqꞌomij chwij chukaꞌyexik ri kinchꞌabꞌenik, xinwil wuqubꞌ kꞌolibꞌal kantela bꞌantal che qꞌana pwaq. 13 Puꞌnikꞌajil ri kꞌolibꞌal kantela xinwil jun achi kajunumataj rukꞌ ri uKꞌojol ri Achi, ukojom jun nimalaj ratzꞌyaq kopan kꞌa chuqul taq raqan xuqujeꞌ ximtal cho ukꞌuꞌx jun atzꞌyaq ri bꞌantal che qꞌana pwaq, 14 ri uwiꞌ sibꞌalaj saq, jetaq ri lana, kajunumataj rukꞌ ri saqlaj tew, ri ubꞌoqꞌoch kajunumataj rukꞌ ri qꞌaqꞌ are kajinowik. 15 Ri raqan kerepqꞌunik jacha ri qꞌanqꞌoj chꞌichꞌ are kaya pa ri qꞌaqꞌ. Ri uchꞌabꞌal kajunumataj rukꞌ ri nimaꞌ ri katix loq puꞌwiꞌ taq ri juyubꞌ. 16 Pa ri uwiqiqꞌabꞌ kꞌo wuqubꞌ chꞌumil xuqujeꞌ pa ri uchiꞌ kel loq jun sakꞌibꞌal ri kebꞌ uwiꞌ, ri upalaj kajunumataj rukꞌ ri qꞌij are qas kaporonik.
17 Are xinwil we riꞌ, xintzaq choch je ta ne chi xinkamik. Areꞌ kꞌut xuya ri uwiqiqꞌabꞌ pa nuwiꞌ, kꞌa te riꞌ xubꞌij chwe: Man kaxiꞌj ta awibꞌ, in riꞌ ri in nabꞌe xuqujeꞌ in kꞌisbꞌal. 18 Ri in kꞌaslik, pune xinkam na, kamik riꞌ in kꞌaslik chibꞌe qꞌij saq. Kꞌo wukꞌ ri lawe rech ri kamikal xuqujeꞌ rech ri kꞌolibꞌal jawjeꞌ keꞌ wi ri kanimaꞌ ri e kaminaqibꞌ. 19 Chatzꞌibꞌaj bꞌa ronojel ri jastaq ri xawilo, ri jastaq ri tajin kakꞌulmataj kamik xuqujeꞌ ri kakꞌulmataj na. 20 Chanim kinbꞌij chawe jas kel kubꞌij ri wuqubꞌ chꞌumil ri xawilo kꞌo pa nuqꞌabꞌ xuqujeꞌ ri wuqubꞌ kꞌolibꞌal kantela ri bꞌantal che qꞌana pwaq. Ri wuqubꞌ chꞌumil are karetwachij ri angelibꞌ e kꞌamal taq bꞌe ri e kꞌo pa ri komontyox are kꞌu ri wuqubꞌ kꞌolibꞌal kantela kuretwachiij ri wuqubꞌ komontyox.