8
Jesús uqhunta mosoj compromiso
1 Nichcaskaycumanta nejtenka astawan importanteka cay: Curaj sacerdotenchiska Diospaj caynin caskanraycu, janaj pachapi tiyaycun Diospaj paña ladonpi. 2 Sacerdote jina ruwachcan verdadero santocaj wasipi, Señor Diospaj ruwaskanpi mana runacunapaj ruwaskanpichu.
3 Tucuy curaj sacerdoteka churaska ofrendata jina wañuska animalcunata Diosman konanpaj. Chayraycu Jesucristopas imata konallantaj carkan. 4 Paychus cay pachamanta canman chayka, ni sacerdotepas canmanchu. Imaraycuchus cay pachapeka sacerdotecuna carkanña ofrendata konancupaj Moisespaj ley mandaskanman jina. 5 Cay sacerdotecunapaj ruwaskancoka janaj pachapi cajcunaman rijch'acojcunalla. Yachanchis rijch'acojcunalla caskancuta, imaraycuchus Moisés santocaj wasita ruwananmanta Dios payta nerkan: “Lomapi kanman ricuchiskayman jina tucuy imata allinta ruway.” 6 Curaj sacerdotenchiscajka astawan allin sacerdote ruwanata jep'ekan; Diosta runacunatawan allinyachispa ujchan allincaj compromisonninta, astawan allincaj promesacunawan.
7 Ñaupaj compromiso mana faltayoj cajtenka, khepacajka yankhapaj canman carkan. 8 Israel runacuna ñaupaj compromisota mana junt'askancuraycuchu, Dios nerkan:
“Señorka nin: Khepa p'unchay uj mosoj
compromisota ruwasaj Israel runacunawan
Judá runacunawanpiwan.
9 Cay compromisoka mana abueloncunawan
ruwaskay jinachu canka,
Egiptomanta orkhomuspa pusamojtiy.
Paycuna compromisoyta mana junt'ajtincu,
noka sakerparini, nin Señorka.
10 Khepaman Israel runacunawan compromiso
ruwanayka cay canka, nin Señorka:
Leyniycunata yuyaynincupi churasaj,
sonkoncupitaj escribisaj.
Noka Diosnincu casaj,
paycunataj nokapi creej cankacu.
11 Manaña pipas runamasinta nitaj waukentapas
yachachenkachu Señorta rejsinanpajka.
Tucuynincu rejsiwankacu,
juch'uymantapacha athuncama.
12 Noka perdonasaj mana allincuna ruwaskancuta;
juchancuta manaña jayc'ajpas yuyarisajchu.”
13 Dios mosoj compromisomanta parlaspaka, ñaupaj compromisota mauc'ayachinña. Mauc'ayachiska mana sirvej compromisopajka, juch'uyllaña ch'usajman tucunanpaj cachcan.