8
Cieluchru cag tabernäculuchru cüracunapa mas mandagnin Jesús cangan
1 Cay lapan niycanganchipita mas ali caycan: Cieluchru Munayniyog mandananpag jamacunanpa derëchacag lädunchru cüracunapa mas mandagnin jamaraycagmi. 2 Pay rasunpa cag tabernäculuchru*8.2 Chay tabernäculo cieluchru caycan. Chay tabernäculunuylam Moisés rurachingan tabernäculo caran. Chaypitana Moisés rurachingan tabernäculo niragta Jerusalenchru templutapis sharcachipäcuran. Tabernäculupita masta musyanayquipag liyinqui Hebreos 9.1-7; Éxodo capítulo 25-pita asta capítulo 40-cama. cürapa ruraynincunatam ruraycan. Chay tabernäculuta quiquin Tayta Diosninchim rurasha; manam runacunachu rurasha.
3 Lapan cüracunapa mas mandagninga ofrendacunata Diosman apananpag y uywacunata pishtarcur altarchru rupachinanpämi chrurasha caycan. Chaymi Jesuspis imatapis ofrendananpag apanan. 4 Cay pachalachru car Jesusga manam cüralapis canmanchu caran. Cay pachachrüga Moisés escribingan leycunachru ningannuy cüracuna caycanmi ofrendacunata Diosman apananpag. 5 Cay pachachru cag cüracunaga rurayninta rurapäcun cieluchru caycag tabernäculo niraycagta ruranganchrümi. Chaypita musyacan Moisés tabernäculuta rurananpag captin payta Tayta Diosninchi caynuy nisha captinmi: “Shumag mayamay tabernäculuta ruranqui jircachru imanuypis cananpag ricachingänuylam”.✡8.5 Éxodo 25.40; 26.30 6 Ichanga Jesús cüracunapa mas alinnincag rurayninta rurananpag chrasquisha. Chaynuypis chay mushog conträtoga puntacag conträtupitapis mas ali caycan. Payga mushog conträtuwan Dioswanmi amistaycächimanchi. Chay mushog conträto mas ali caycan promësancuna mas ali captin.
Mushog conträto puntacag conträtupita mas ali cangan
7 Puntacag conträto shumag ali captinga manam yapay juc conträtuta ruranmanchu caran. 8 Runacuna conträtuta mana cumplegta ricarmi Dios niran:
“Tayta Diosninchi niran: Israel runacunawan y Judá runacunawan
mushog conträtuta ruranäpag cag tiempo chrayamungam.
9 Chay conträtoga manam unay aylluncunata Egiptupita jorgamur rurangä conträtunuychu canga.
Nogam paycunata maquinpita janchragnuypis jorgamurä.
Puntacag conträtuta mana cumplipäcunganpitam jaguiriycurä, nin Tayta Dios.
10 Tiempo pasarcuptin Israel runacunawan conträtuta rurangä
caynuymi canga, nin Tayta Dios.
Leynïcunata yarpayninman chrurashag.
Shongunmanmi escribishag.
Paycunapa Diosninmi cashag.
Paycuna nogapam canga.
11 Manam juc marcamasin juc marcamasinta ni juc ayllun juc ayllunta
yachrachingachu nogata reguipäcamänanpag.
Nogata lapanmi reguipäcamanga wamracunapis auquis runacunapis.
12 Nogam lapan juchancunata perdunäshag.
Mananam imaypis juchäcungancunata yarpäshänachu”.✡8.12 Jeremías 31.31-34
13 Tayta Diosninchi mushog conträtupita nirga puntacag conträtuta auquisyasha cangantanam niycan. Auquisyashana y shumagna mana captin illacächinanpänam caycan.
*8:2 8.2 Chay tabernäculo cieluchru caycan. Chay tabernäculunuylam Moisés rurachingan tabernäculo caran. Chaypitana Moisés rurachingan tabernäculo niragta Jerusalenchru templutapis sharcachipäcuran. Tabernäculupita masta musyanayquipag liyinqui Hebreos 9.1-7; Éxodo capítulo 25-pita asta capítulo 40-cama.
✡8:5 8.5 Éxodo 25.40; 26.30
✡8:12 8.12 Jeremías 31.31-34