HEBREOS
1. Kay cartatari, ¿pitaq escribiran? Kay cartata pis escribisqantaqa manan cheqaqtapuniqa yachakunchu. Ichaqa wakin estudiaq wawqenchiskunan creenku Pablo escribinanpaq, Lucas escribinanpaq, Apolos escribinanpaq otaq hukkunapas escribinanpaq ima.
2. Kay cartari, ¿hayk'aqtaq escribisqa karan? Kay cartaqa escribisqa karan Señor Jesucristopa nacesqanpa qepantan 60 otaq 67 watakunapin.
3. Kay cartari, ¿pikunapaqtaq escribisqa karan? Kay cartaqa escribisqa karan Señor Jesucristopi creeq Israel nacionniyoq runakunapaqmi.
4. Kay cartari, ¿imapaqtaq escribisqa karan? Kay cartaqa escribisqa karan, leeqkuna Señor Jesucristomanta allinta yachanankupaq, hinallataq Señor Jesucristoqa llapallan sacerdotekunapa Jefen Sacerdote kasqanta yachanankupaq iman, saynapi amaña ñawpaq leykunaman kutinankupaq, aswanqa Señor Jesucristopi cheqaqta iñinankupaqmi.
5. Kay cartapiri, ¿mayqen versiculotaq aswan más importante yuyanapaq? Kay versiculon aswan más importanteqa: “Ichaqa Señorninchis Jesucriston noqanchispaqqa cheqaq sacerdotenchis. Paymi kay pachapi kaq sacerdotekunamantapas aswan más importante kaq sacerdote. Hinaspapas paymi noqanchispaqqa huk yanapawaqninchis abogado hina kapuwanchis, noqanchispa favorninchispi huk mosoq pactota ruwasqanrayku. Chay mosoq pacton ñawpaq pactomantaqa aswan más importante, kikin Diospuni chay mosoq pactopi más allin promesakunata ofrecewasqanchisrayku” (Heb 8.6).
6. Kay cartari, ¿imaynataq dividisqa kashan? Kay cartaqa khayna dividisqan kashan:
(1) Cartapa qallariyninmanta (Heb 1.1-3).
(2) Jesucristoqa angelkunamantapas aswan más atiyniyoq kaspa, salvawasqanchismanta (Heb 1.4 asta 2.18).
(3) Moisesmantapas Josueymantapas aswan más atiyniyoq Señorninchis Jesucristo kasqanmanta (Heb 3.1 asta 4.14).
(4) Jesucristoqa llapallan sacerdotekunapa Jefen kasqanmanta (Heb 4.14 asta 7.28).
(5) Mosoq pactomanta ñawpaq pactomantawan (Heb 8.1 asta 10.18).
(6) Diosman imayna ashuykunanchismanta (Heb 10.19-39).
(7) Iñiqkunaqa cheqaqtapuni Señor Jesucristopi confiananchismanta (Heb 11.1 asta 12.29).
(8) Jesucristopi creeq runakuna imaynatas kawsananchismanta (Heb 13.1-25).
1
Cartapa qallariyninmanta
1 Ñawpaqtaqa kikin Diosmi, paymanta willakuq profetankunantakama, Israel nacionniyoq abuelonchiskunaman ashka formapi, hinallataq ashka kutita ima rimapayaran. 2 Kay qepa kaq tiempokunapin ichaqa, Wawan Jesucristontakama Diosninchisqa allin willakuyta willawanchis. Diosqa tukuy kaqkunatapas Wawan Jesucristowan kushkan unancharan. Saynallataqmi Diosqa Wawan Jesucristota nombraran, tukuy imapa dueñon kananpaq. 3 Diospa Wawan Señorninchis Jesucriston Dios Taytanwanqa tukuy imapi igualla. Chaymi pipas Señor Jesucristota rikuspaqa, Dios Taytanpa ancha sumaq khuyakuyninta, ancha hatun atiyninta, hinallataq ancha sumaq k'ancharishaq gloriantapas rikushanman hina kanqa. (Señorninchis Jesucristopa makinpin tukuy imapas kashan). Payllataqmi rimaspalla atiyninwan tukuy imatapas lugarninpi mantienen ch'eqesqa ama kananpaq. Hinaspapas payllataqmi rantinchispi wañuspa, llapallan huchanchiskunatapas perdonawaranchis. Hinaspan hanaq pachaman ripuspa, Diospa phaña ladonpi tiyayuran.
Jesucristoqa angelkunamantapas aswan más atiyniyoq kasqanmanta
4 Señorninchis Jesucristoqa, Diospa wawan kaspanmi, angelkunamantapas aswan más atiyniyoq. Hinaspapas Jesuspa sutinqa angelkunapa sutinmantapas aswan más importanten. Chayraykun Diosqa llapallan angelkunamantapas aswan mastaraq Jesustaqa hatunchaykuran. 5 Diosqa manan hayk'aqpas ni mayqen angeltapas niranchu:
“Qanqa Wawaymi kanki,
kunanmantapachan papayki kasaq”, nispaqa [Salmos 2.7].
Nitaqmi ni mayqen angeltapas niranchu:
“Noqan paypa papan kasaq,
paytaqmi waway kanqa”, nispaqa.
6 Hinaspapas Diosqa Wawan Jesucristota kay pachaman mandamuspanmi, khaynata angelninkunata niran:
“Angelniykunaqa, llapallaykichis payta adoraychis”, nispa [Deuteronomio 32.43 Septuaginta].
7 Hinaspapas Diosqa angelninkunamantaqa nillarantaqmi khaynata:
“Noqapa angelniykunaqa unanchasqa karanku wayraman rikch'akuq hinan.
Paykunaqa unanchasqa karanku ninaman rikch'akuq hinan, serviqniykuna kanankupaq”, nispa [Salmos 104.4].
8 Ichaqa Wawan Jesucristomanta rimaspanmi, Diosqa khaynata nin:
“Qanqa Diosmi kanki. Chaymi gobiernanki wiña-wiñaypaq.
Qanqa justiciata allinta ruwaspan atiyniykiwan gobiernanki.
9 Qanqa justiciata hukkuna allinta ruwaqtinkun, kusikunki.
Ichaqa mana allin kaqkunata ruwaqtinkutaqmi, anchata phiñakunki.
Chaymi noqa Diosniykiqa churarayki,
wakinmantapas aswan más atiyniyoq, hinallataq ancha kusisqa rey kanaykipaq”, nispa [Salmos 45.6-7].
10 Dios Taytaqa nillantaqmi khaynata:
“Qanqa Señormi kanki.
Manaraq imapas kashaqtinmi, kay pachatapas unancharanki.
Qanqa makiykiwanmi hanaq pachatapas unancharanki.
11 Tukuy chay unanchasqaykikunaqa tukukapunqan, imaynan huk p'achapas thantarukuspa tukurakapun chay hinata.
Qanmi ichaqa wiña-wiñaypaq kanki. 12 Tukuy chay unanchasqaykikunaqa cambiasqan kanqa, imaynan huk doblaspa thanta p'achawanpas cambiakushawaq hinaraq.
Qanmi ichaqa mana ni hayk'aqpas cambiankichu. Hinaspapas qanqa wiña-wiñaypaqmi kawsanki”, nispa [Salmos 102.25-27].
13 Hinaspapas Diosqa manan ni hayk'aqpas ni mayqen angeltapas khaynataqa niranchu:
“Phaña ladoypi tiyaykuy,
llapallan enemigoykikunata asta vencespay, chaki plantaykiman churanaykama”, nispaqa [Salmos 110.1].
14 Llapallan angelkunaqa Diospa kamachisqanta ruwaq espiritukunallan kanku. Hinaspapas Diosmi paykunataqa kamachimun, salvasqa kanankupaq kaq runakunata yanapanankupaq.