HEBREOS
Manami musyantsitsu cay libruta pï escribishgantapis. Waquin runacuna yarpan Bernabé escribishganta (Hechos 4.36; 13.1-5); waquin runacunanami yarpan Apolos escribishganta (Hechos 18.24,25; 1 Corintios 1.12; 3.4-8; 3.22,23). Waquincunanami yarpapäcun maygalanpis cay libruta escribishganta. Maygan carpis cay libruta escribergan Jesucristuta chasquicog Israel runacunapagmi.
Canan tantyacushun cay libruta liyir imata yachacunantsipag cashgantapis.
1) Cay libruta liyirmi yachacushun Jesucristo angilcunapita más munayniyog cashganta (1.4-2.18), Moisespita más munayniyog cashganta (3.1-4.13) y mandag cüracunapitapis más munayniyog cashganta (4.14-5.10; 7.1-28).
2) Cay libruta liyirmi yachacushun Tayta Diosnintsi salvamänantsipag mushog conträtuta rurashganta (8.1-13).
3) Cay libruta liyirmi yachacushun uywacunata altarcho rupatsinantsipa trucanga Jesucristuta chasquicuptintsi Tayta Diosnintsi perdonamänantsipag cashganta (9.1-10.18).
4) Cay libruta liyirmi yachacushun Jesucristuman yäracushgantsipita guepaman mana cutinantsipag cashganta (5.11-6.20; 10.19-39).
5) Cay libruta liyirmi yachacushun imanog nacarpis Tayta Diosman imaypis yäracunantsipag cashganta (11.1-12.29). Más yachatsicuycunapis cay librucho escribiraycanmi (13.1-25).
1
Lapanpitapis más munayniyog Jesucristo cashgan
1 Naupataga Tayta Diosnintsimi profëtancunata cachargan Israel mayintsita wilacuyninta tucuynogpa wilapänanpag. 2 Cananmi itsanga Diospa tsurin Jesucristuna shamushga wilacuyninta wilapämänantsipag. Paywanmi Tayta Diosnintsi camargan cay patsata y jana patsatapis. Nircurmi payta churashga lapantapis munaynincho tsararänanpag. 3 Jesucristoga Diosnintsimi caycan. Lapan camashgancunatapis munaynincho tsararaptinmi cananyagpis caycanrag. Jutsantsipita perdonashga canantsipag cruzcho wanurcurmi gloriaman cutergan. Cananga Tayta Diospa derëcha cag naupancho jamarashpanmi lapanpagpis munayniyog caycan.
Jesucristo angilcunapitapis más munayniyog cashgan
4-5 Tsaynog caycaptenga Tayta Diospa tsurin Jesucristoga lapan angilcunapitapis más munayniyogmi caycan. Tsaymi Jesucristuta Tayta Diosnintsi caynog nergan:
“Gamga cuyay tsurëmi canqui.
Tsaymi gamta churä lapanta mandanayquipag.”✡ Salmo 2.7
Tsaynoglami mastapis Tayta Diosnintsi nergan:
“Nogaga gampa taytayquimi cä.
Gammi nogapa tsurë caycanqui.”✡ 2 Samuel 7.14
Manami maygan angiltapis tsaynog nergantsu.
6 Tsaynoglami tsurin Jesucristo gloriaman cutiptin Tayta Diosnintsi caynog nergan: “Lapan angilcunapis payta adoratsun.”✡ Deuteronomio 32.43
7 Angilcunapäga Tayta Diosnintsipa palabrancho caynogmi niycan:
“Angilcunata ticratsë wayraman carpis o ninaman carpis mandashgäta rurapäcunanpagmi.”✡ Salmo 104.4
8 Tsurin Jesucristupagnami itsanga caynog niycan:
“Gamga Dios carmi imayyagpis mandag caycanqui.
Gamga pitapis mana jananpaypami juzganquipag.
9 Gamga munanqui lapan runacuna noga munashgänog alilata rurar cawanantami.
Tsaymi taytayqui car gamta churashcä lapanpagpis munayniyog canayquipag.
Gam munayniyog cashgayquinöga manami pipis munayniyog cantsu.
Tsaymi gam imaypis cushishga caycanqui.”✡ Salmo 45.6-7
10 Tsaynogpis Jesucristo cay patsata y jana patsata camashga captinmi Tayta Diospa palabrancho caynog niycan:
“Lapanpag munayniyog carmi cay patsata y jana patsatapis camashcanqui, Tayta.
11-12 Lapan camashgayquicunaga röpanog ushacaglami caycan.
Röpanta runa trucacushgannogmi gampis lapan camashgayquicunata trucatsinquipag.
Lapan ushacaptinpis gamga imayyagpis caycanquipagmi.”✡ Salmo 102.25-27
13 Manami maygan angilcunatapis Tayta Diosnintsi caynog nishgatsu:
“Jamacamuy derëcha cag naupäman lapan contrayquita vincinäyag.”✡ Salmo 110.1
14 Angilcunaga Tayta Diosnintsi mandashganta ruranalanpagmi carcaycan. Paycunatami Tayta Diosnintsi cachamun Jesucristuta chasquicogcunata cuidananpag.