SAN MATEO
Jesucristupita escribishgan
Mateoga Jesucristupa discïpulun car paywanmi purergan yachatsishgancunata mayar y milagro rurashgancunatapis ricar. Jesucristupa discïpulun manarag carmi Roma nacionpag impuestuta cobrargan. Mateupita masta musyanayquipag liyinqui San Mateo 9.9-13.
Cay libruta Mateo escribergan Jesucristo salvacog cashganta Israel mayincunata tantyatsinanpagmi. Tsaynogpis Mateo tantyatsergan Jesucristupa wilacuynin pï-may runacunapagpis ali cashgantami (San Mateo 28.19-20).
Cay libruta liyirmi musyantsi Jesucristo yurishganta (1.1-2.23), wilacushganta (5.1-7.29; 13.1-52; 16.13-20.28), lapanpagpis munayniyog cashganta (8.1-9.38), cay patsaman cutimunanpag cashganta (24.1-25.46), cruzcho wanushganta (26.1-27.66) y wanushganpita cawarimushgantapis (28.1-20). Más yachatsicuycunapis cay librucho caycanmi.
1
Jesucristupa unay castancuna cashgan
(Lucas 3.23-38)
1 Jesucristo rey David castapita yuregmi cargan. Davidnami cargan Abrahampa castanpita yureg. Tsaymi Abrahampita galaycur Jesucristupa unay castancuna caycuna cargan:
2 Abrahampa tsurinmi cargan Isaac.
Isaacpa tsurinmi cargan Jacob.
Jacobpa tsurinmi cargan Judá y waquin wauguincunapis.
3 Judäpa tsurincunami cargan Fareswan Zara.
Paycunapa mamanmi cargan Tamar.
Farespa tsurinmi cargan Esrom.
Esrompa tsurinmi cargan Aram.
4 Arampa tsurinmi cargan Aminadab.
Aminadabpa tsurinmi cargan Naasón.
Naasonpa tsurinmi cargan Salmón.
5 Salmonpa tsurinmi cargan Booz.
Boozpa mamanmi cargan Rahab.
Boozpa tsurinmi cargan Obed.
Obedpa mamanmi cargan Rut.
Obedpa tsurinmi cargan Isaí.
6 Isaïpa tsurinmi cargan rey David.
Rey Davidpa tsurinmi cargan Salomón.
Salomón yurergan Uriaspa viüdanchömi.
7 Salomonpa tsurinmi cargan Roboam.
Roboampa tsurinmi cargan Abías.
Abiaspa tsurinmi cargan Asa.
8 Asapa tsurinmi cargan Josafat.
Josafatpa tsurinmi cargan Joram.
Jorampa tsurinmi cargan Uzías.
9 Uziaspa tsurinmi cargan Jotam.
Jotampa tsurinmi cargan Acaz.
Acazpa tsurinmi cargan Ezequías.
10 Ezequiaspa tsurinmi cargan Manasés.
Manasespa tsurinmi cargan Amón.
Amonpa tsurinmi cargan Josías.
11 Josiaspa tsurinmi cargan Jeconías y waquin wauguincunapis.
Jeconías cawanan witsanmi Israel runacunata Babilonia soldäducuna prësu tsarircur apargan Babilonia nacionman.
12 Tsaychönami Jeconiaspa tsurin Salatiel yurergan.
Salatielpa tsurinmi cargan Zorobabel.
13 Zorobabelpa tsurinmi cargan Abiud.
Abiudpa tsurinmi cargan Eliaquim.
Eliaquimpa tsurinmi cargan Azor.
14 Azorpa tsurinmi cargan Sadoc.
Sadocpa tsurinmi cargan Aquim.
Aquimpa tsurinmi cargan Eliud.
15 Eliudpa tsurinmi cargan Eleazar.
Eleazarpa tsurinmi cargan Matán.
Matanpa tsurinmi cargan Jacob.
16 Jacobpa tsurinmi cargan Mariapa runan José.
Mariapa wawanmi cargan Jesús. Paymi cargan Tayta Dios cachamushgan salvamagnintsi.
17 Tsauraga Abraham cawashgan witsanpita hasta David yurishganyag chunca chuscu (14) generación cargan.*Juc generacionga runa yurishganpita hasta tsurin yurishganyagmi caycan. Tsaypita más juc generacionna caycan tsay tsurinpa tsurin yurishganyag. Tsaymi juc generación caycan papänin yurishganpita hasta tsurin yurishganyag, ayca watayog captinpis. Tsaynoglami David cawashgan witsanpita Israel runacunata Babiloniaman apashgan witsanyag chunca chuscu (14) generación cargan. Tsaynoglami Babiloniaman apashgan witsanpita hasta Jesucristo yurishganyag chunca chuscu (14) generación cargan.
Jesucristo yurishgan
(Lucas 2.1-7)
18 Jesucristo caynogmi yurergan. Mariawan tänanpag José parlacushga caycarpis paywan manami punorganragtsu. Tsaynog caycaptinpis María gueshyag ricacorgan Santu Espiritupa munayninwanmi. 19 Gueshyag ricacuptinpis Josëga ali runa car manami munargantsu runacuna Mariata jamurpänanta. Tsaymi mana quejacuylapa cachariyta yarpargan. 20 Cacharinanpag yarpachacuycaptinmi Tayta Diosnintsipa angilnin Josëta sueñuynincho caynog nergan: “Rey Davidpa castan José, Mariaga manami pï runawanpis punushgatsu gueshyag ricacunanpag, sinöga Santu Espiritupa munayninwanmi gueshyag ricacushga. Tsaynog caycaptenga mana rabiacuylapa warmiquipag Mariata shuntacuy. 21 Olgu wamratami María wachanga. Runacuna jutsa rurashgancunata perdonar salvananpag captinmi tsay wamrapa jutin canga Jesús.”†“Jesús” ninanga “Runacunata salvan” ninanmi. Tsaynog nirmi Josëta sueñuynincho ángil parlapargan.
22 Jesús yurinanpagmi Tayta Diosnintsipa profëtan caynog nir escribergan:
23 “Juc doncëlla jipashmi gueshyag ricacur olgu wamrata wachanga.
Tsay wamrapagmi nipäconga ‘Emanuel’ cashganta.”✡Isaías 7.14
(Emanuel ninanga caycan “Tayta Diosnintsi nogantsiwanmi caycan” ninanmi.)
24 Tsaynog niptinmi José punuycashganpita riccharcamur Tayta Diosnintsipa angilnin nishgannogla Mariata shuntacorgan warminpag. 25 Itsanga Mariawan taycarpis paywan manami punorganragtsu hasta wawan yurinanyag. Wawan yuriptinnami jutinta José churapargan Jesús jutin cananpag.
*1:17 Juc generacionga runa yurishganpita hasta tsurin yurishganyagmi caycan. Tsaypita más juc generacionna caycan tsay tsurinpa tsurin yurishganyag. Tsaymi juc generación caycan papänin yurishganpita hasta tsurin yurishganyag, ayca watayog captinpis.
†1:21 “Jesús” ninanga “Runacunata salvan” ninanmi.
✡1:23 Isaías 7.14