1 Jesus Diosta mañana wasipi kasa runakunata kay yuyachina kwintuwa yachachirka:

—Shu runa willasi wayushina uva niska wayu wiñankapa paypa runakunata chakrata rurachirka. Chay chakra muyukta kinchachirka. Urku rumita allachisa shuk hatun batanta rurachirka chaypi uva wayu chawachiskata shutuchinkapa. Rumikunawa achka patayu wasita rurachirka, shuk runa hawamanta rikusa chakrata kuyrankapa. Chay chakrata shu runakunawa trabahankapa sakirka —pallana uras shuk parti pallaskawa ñukapa chakra kaskamanta pagawankichi— nisa. Chasna nisa chakra amuka karu llaktama rirka.

2 Ña pallana uras paktaripi chakra amu karupi kawsaraskamanta shu yanapa runata mantarka pay sakiska runakunapama. Paypa partita pallaskamanta mañankapa mantarka. 3 Chay chakra amuta yanapa runa paktakripi chakrata trabahakamakuna payta hapisa liwachisa kuti amupama mantanakurka. Nima imawa mantanakurka. 4 Chakra amu kuti shu yanapa runata mantarka. Pay paktapi chakrapi trabaha runakuna umapi waktanakurka. Payta piñasa pinkachisa kuti amupama mantanakurka. 5 Amuka kuti shuktapas mantarka. Payta wañuchinakurka. Chaypawasha astawa yanapakunata, shukta, shukta mantarka. Paykuna paktanakupi chakrapi trabahakuna maykankunata waktanakurka, maykankunata wañuchinakurka. 6 Shuklla tiyarka manara mantay tukuska, paypa yapa llakiska churi. —Ñuka churita kasunakunkami— nisa paytapas mantarka. 7 Amupa churi paktapi chay chakrapi trabahakamakuna paykunapura kwintarinakurka:

—Kayka chakra amupa churimi. Paypa yaya wañupi tukuy chariskakunata paypa churipa sakirinka. Chakra amupa churita haku wañuchishu, pay charinkapa rahuskakunata amuyashu— nisa.

8 Chasnapi chakra amupa churita hapisa wañuchinakurka. Chakra mayama shitanakurka— nisa Jesus kwintasa yuyachirka.

Uyakamakunata tapusa katirka:

—Imasna yuyarinkichi. 9 Chakra amuka imatata chay trabahakunata ruranka. Ñuka kankunata rimaskankichi chakra amuka imatami ranka. Pay shamusa chakrapi trabaha runakunata wañuchinkami. Paypa chakrata shukunawa sakinkami. 10 Kankuna alita yachankichi Dios ñupa uras killkachiskata. Chasna kasapas mana munankichichu sakinata ñukata mana ali ruraraskata. Killkariska kaskata kankuna alita paktachinkichi. Kasnami nin:

12 Apukuna Jesus rimaskata uyasa —ñukanchirayku chay kwintuwa yuyachirka— nisa rimanakurka. Chasnapi yuyarinakurka —imasna rasata hapirinka— nisa. Ranti runakunata manchasa mana ushanakurkachu. Chasna kasa paykuna Jesusta sakisa rinakurka.

13 Apukuna Jesuswa piñariska kanakurka. Chasnapi fariseo bulamanta maykankunata, apu Herodeswa wankuriska bulamantapas maykankunata Jesuspama mantanakurka. Rinkapa mantanakurka Jesusta tapunawa kamasa turkachinkapa. 14 Jesuspama shamusa rimanakurka:

—Yachachikama, kan mana llullasa shutita rima kaskata yachanchi. Mana pita manchasa runakunata kuskata yachachinki. Tukuy runakunata alita yachachinki Dios munaskata rurasa kawsankapa. Kuna ñukanchita rimay: Ñukanchipa Roma hatun apurayku kullkita pagana balinchu, manachu balin. Paganachu, manachu pagana. Imata ninki.—

15 Jesus riksirka paykuna alishina tukusa payta hapichinayaskata. Jesus rimanma —pagana kanchi— nisa, chay payta turkachinayakuna ñukanchi Israel runakunamanta apukunata rimakrinakunma payta kastigachinkapa. Jesus rimanma —mana alichu pagankapa— nisa ñukanchipa Roma hatun aputa rimakrinakunma payta kastigachinkapa. Chasna payta turkachinayasa paykuna tapunakuskata uyasa Jesus nirka:

—Imaraykuta ñuka rimankapa rahuskapi hapinayawankichi. Shu kullki karata rikuchiwaychi.—

16 Kullki karata rikuchinakurka. Jesus chayta rikusa tapurka:

—Kay kullki karapi pipa umata rikuchin.—

Tapupi uyasa kutipanakurka:

—Ñukanchipa Roma hatun apupami.—

17 Jesus nirka:

—Hatun apupata hatu apuma kuychi. Diospata Diosma kuychi*12.17 Imasna chay kullki kara hatun apupa umata rikuchirka, Dios runata payshina ruraskarayku runa Diospa dibuhu rikuchiskashina kan. Chasna kapi Dios runapa amu kan, ñukanchipa kawsay Diosma kuyanashina payrayku kawsana kanchi..—

Chasna Jesus yapa yachaywa kutipaskata uyasa runakuna yapa mancharinakurka.

18 Pakrikuna wankuriska Saduceokuna niska bulamanta maykankuna Jesusma paktanakurka. Paykuna —wañuskakuna mana kawsarinakunkachu— nisa yuyarinakun. Chasna kapi Jesusta tapunakurka:

19 —Yachachikama, Moises killkaskakunapi kasna killkara tiyan:

20 Kuna alita uyaway. Kanchis wawkipura kanakurka. Ruku wawki shu warmiwa kasararka. Ranti manara wawata charinakuskapi wañurka. 21 Washa chay wawki wañumanta kipa wawki chay wakcha warmillawa kasararka. Chasnallata paypas wawa illa wañurka. 22 Tukuy kanchis wawkipura washa washa chay wakcha warmillawa kasaranakurka. Tukuykuna wawa illa wañunakurka. Puchkaypi warmipas wañurka. 23 Ña kawsarina punchapi tukuy chay kanchis wawkikuna chay warmillawa kasaraska kapi pipa warmita kanka.—

24 Chasna rimanakupi Jesus kutipasa nirka:

—Dios ñupa uras killkachiskata mana yachasa, Diospa ushaytapas mana riksisa pantarankichi. 25 Wañuskakuna kawsariskawasha kasarana mana tiyankachu. Hawapachapi kawsa anhelkunashina mana kasarasa kawsanakunka. 26 Moises ñupa uras killkaskakunapi niskata alita yachankichi. Wañuskakuna mana wañuska sakirinamanta ruparaska yuramanta Dios payta kasna rimarka:

27 Payka mana kanchu wañuskakuna mañaraska Dios, kawsakuna mañaraska Diosmi kan. Chayrayku kankunaka —ñukanchi wañupi kawsay tukurinka— nisa yuyariskawa yapa pantarankichi.

28 Dios ñupa uras killkachiska killkata kutillata killkakamakunamanta shu killkakama Jesus pakrikunawa kwintaskata uyarka. Chayta uyasa chay killkakama Jesus pakrikunata yachaywa kutipaskamanta kushiyarka. Chasnapi Jesusta tapurka:

—Runa paktachinkapa Dios sakiska kamachina shimikunamanta maykanta yali ali kan.—

29 Jesus kutipasa nirka:

—Yali ali kamachina shimi kaymi:

Chaymi yali ali kamachina shimi. 31 Chay kamachina shimishinallata kaymi:

Chaykunamanta mana tiyanchu yali ali kamachina shimi.—

32 Chay killkakama runa Jesus rimaskata uyasa nirka:

—Alimi, yachachikama, shutita nirkanki —shuklla Dios tyan— nisa. 33 Diosta tukuy shunkuwa, tukuy yuyaywa, tukuy kawsaywa, tukuy ushaywa llakinami kanki, shukunataka kan kikintashina llakinami kanki. Chay kamachina shimikunata paktachinkapa yali balin wañuchiska aychata Diosrayku nisa rupachinamanta.—

34 Killkakama ali yuyaywa rimaskata uyasa Jesus payta nirka:

—Kan ña Dios amuyaska runa tukunkapa rahunki.—

Chay urasmanta tukuy manchanakurka Jesusta astawa tapunkapa.

35 Jesus Diosta mañana wasipi yachachisa nirka:

—Imasna yachachinayasata Dios ñupa uras killkachiska killkata kutillata killkakamakuna rimanakun: —Dios mantana kishpichi runa ñupa uras kawsa apu Davidpa miray kana kan— nisa.

36 Diospa Samay payta rimankapa yuyachipi shamuna kishpichi runata yuyarisa Davidllata runakunata rimarka:

37 Hatun apu David kawsaska uras, Dios kishpichi runata manara mantaskapi David kikin payta nirka —ñukapa amu— nisa. Chasna apu David rimaskamanta yachanchi David kawsaska uras chay kishpichi runa ña kawsa kaskata, ña Davidmanta yali hatun apu kaskata. Chasna kapi yachachiwaychi, imasnata Davidpa mirayllata kanka.

Chasna rimapi tukuy chaypi kaska runakuna kushiyasa Jesus ali yachachiraskata uyanakurka.

38 Jesus Diosta mañana wasipi yachachirasa katirka:

—Dios ñupa uras killkachiska killkata kutillata killkakamakunamanta kuyrarinkichi. Tukuymanta yali bali runakunashina suni churariskawa purinata munanakun. Ñampikunapi balichiskatashina saluray tukunata gustanakun. 39 Diospa shimita yachana wasikunapi ñupapi tiyarinakun, balichiska runakunapa tiyarinakunapi. Chasnallata hishta mikunapi ñupapi tiyarinakunapi tiyarinata munanakun. 40 Wakcha warmikunata llullachisa mana pinkasa paykunapa imakunata kichunakun. Paykuna kikinrayku sakirinkapa mañanakun: —Diosta kushiyachinkapa kuyana kankichi— nisa. Chay mana ali ruraskakuna pakalla sakirinkapa ali tukuskashina munturina wasikunapi unayta Diosta mañanakun. Chasna ruranakupi Dios paykunata tukuy runakunamanta yali sinchita kastiganka.—

41 Shu puncha Jesus Diosta mañana wasipi tiyararka Diosma kuska kullkita wakachina kaha mayapi. Chaypi tiyarisa runakuna chay kahapi kullkita churaraskata rikurarka. Kullkiyu runakuna achka kullkita churanakurka. 42 Chasnapi shu mana imayu wakcha warmi paktarka. Ishkay kullki karashtuta churarka. 43 Chayta rikusa Jesus pay yachachiskata katikamakunata kayasa nirka:

—Alita uyawaychi. Kay wakcha warmi tukuykunamanta yalikta churarka. 44 Chay achka kullkiyu runakuna puchuskamanta churanakurka. Ranti kay wakcha warmi pay chariskata illakta kurkami— nirka.