4
Diosman marcäcoqcuna jamaquita tariyan
Tsemi pecunatanolla noqantsictapis änimashqantsic jamaquininta tarinantsicpaq. Tsemi tsecunata alli cuentata qocushun, paqtam waquinnintsic tarishwantsu tse jamaquita. Pecunatam Dios willarqan tse marcaman yecurir jamacuriyänanpaq; peru wiyecarpis, mana marcäcurmi yecuyarqantsu. Pecunatanollam noqantsictapis alli willaquita musyatsimarqontsic jamaquininta tarinantsicpaq. Tse jamaquitaqa tarishun creyicoq caqcunallam. Diospa palabranchopis quenomi nican:
“Piñarcatsiyämaptinmi, shonqüta alli tapïcur nerqä:
‘Manam juc paqwepa yecuyanqatsu jamaqui marcaman’ ”* Sal 95.11 nir.
Tsetaqa nerqan que munducho llapan caqcunata camar ushashqana quecarmi. Palabranchomi qanchis junaqcho pasaconqanta queno nir willaquican:
“Diosmi que patsata camar usharir,
qanchis junaqcho jamacurerqan”* Gn 2.2 nir.
Jina nicantaq:
“Manam juc paqwepa yecuyanqatsu jamaqui marcäman”* Sal 95.11 nir.
Tse une israel nunacunam Diospa alli willaquininta wiyecarpis, mana cäsuquinincunarecur jamaqui marcaman yecuyarqantsu. Peru cananqa waquincuna tse jamaquita tariyanqam. Tsemi yape Diosnintsic sitashqa que tiempucho wiyacoq caqqa, tse jamaquita tariyänanpaq. Tseno cananpaqmi Diospa palabrancho cäyitsimantsic David queno nenqanwan:
“Sitsun cananqa wiyacuyanqui Diosnintsic niyäshonqequita ama chucru shonqu cayënatsu”* Sal 95.7-8 nir.
Manam une tiempu Josue “Caanan” nishqan Marcaman israel nunacunata yecatsir jamatsenqanpaqtsu Dios tseno nerqan, sinoqa que tiempu caq jamaquipaqmi. Tsemi Diospa wamrancunapaqqa quecanraq rasonpa caq jamaqui. 10 Dios que patsata camar usharir, jamanqannomi noqantsicpis que nacaquicunapita pasarir alli cawecho jamacurishun. 11 Tsepenqa imecanopapis tïrashun tse jamaquita tarita. Paqtam tse mana cäsucoq israel nunacunano mana alliman jeqecashwan.
12 Diospa palabranqa cawatsicoq palabra carmi, allapa poderyoq. Y ishcan ladupa cösa afilashqa espadanoran yarpenintsicmanpis, shonquntsicmanpis charcun imano canqantsictapis musyatsimänantsicpaq. 13 Llapan camashqancunapis riquenincho captinmi, llapan rurenintsictapis riquecan. Pepaqqa ima rurenintsicpis manam pacaranqatsu. Y ima ruranqantsictapis parlanqantsictapis jusgamäshunmi.
Jesucristoqa mayor saserdotim
14 Sitsun sielucho quecaq mas mandacoq saserdotintsic Teyta Jesucristu, Diospa Tsurin, imepis yanapecamäshun. Tserecur pellamanna imepis marcäcur tsaracushun. 15 Que patsacho quecaptinmi, mas mandacoq saserdotintsic Jesucristuta noqantsictanolla shonquncho jipatsir diablu tenteta munarqan. Tseno quecaptinpis, pëqa manam jutsaman ishquerqantsu. Tsemi debil quenintsicta musyar, ancupäcoq car, yanapamantsic jutsaman mana ishquinapaq. 16 Tseno quecaptenqa, ancupäcoq Diosllantsicta cada junaq mana mantsashpa mañacushun. Peta mañacushqaqa ancupämarnintsicmi, alli queninwan yanapecamäshun llapan nesidanintsiccunacho.

*4:3 Sal 95.11

*4:4 Gn 2.2

*4:5 Sal 95.11

*4:7 Sal 95.7-8