3
Nunacunata bautisacoq Juan tsunyaqcho willapan
(Marcos 1.1-8; Lucas 3.1-9, 15-17; Juan 1.19-28)
Tse watacunam bautisacoq Juan Judea probinsiapa tsunyaqnincunapa ewar nunacunata willaparqan. Tse willapäcurmi, queno nerqan:
—Teyta Dios mandacoqniquicuna cananpaq tiempu chäramunnam. ¡Tsemi mana alli rureniquicunata jaqiriyë! —nir.
Bautisacoq Juan tseno willapäcunanpaqmi profeta Isaias queno escribishqa carqan:
“Tsunyaqchomi juc nuna qayaripa queno willaconqa:
‘Nänicunata derechar limpiaq cuenta prebinicuyë Teytata chasquinequipaq’ ”* Is 40.3 nir.
Juanpa ropanqa carqan camellupa millwanpitam. Wachäcannam qarapita carqan. Micoqpis langosta* Langosta curoqa imeca pinteq wallpa curunomi. curucunatam y tuna tumpushpa mishquincunatam. Atsca nunacunam Juanman ewayarqan: Jerusalenpita, Judea probinsiapita y Jordan mayu cuchuncho marcacunapita. Jutsancunata willayaptinnam Jordan mayucho Juan bautisarqan.
Tseman atscaq fariseucuna y saduseucuna bautisacoq shayämoqta ricar, Juan queno pecunata piñapëcamorqan:
—Ä, culebra cuenta nunacuna, ¿imanopataq allapa feyu castigupita salbacuyanqui! Jutsa rureniquicunata rasonpa jaqirïcur, allicunatana rurayë. Ama pensayëtsu: ‘Abrahampa castan canqantsicrecurmi castigupita salbacushun’ nir. Porqui niyaqmi: Diosqa que rumicunatapis Abrahampa castanqa ticraratsinmanmi. 10 Imanomi juc nuna jachanwan mana wayücoq montinta siquipita wallurir, ninacho ushacäratsin, tsenomi llapan mana alli ruraqcunapaqqa Dios listu quecan ushacäratsinanpaq. 11 Noqaqa Diosman cutiquicoq caqtaqa yacullawanmi bautisayashqequi. Peru qepäta shamoqmi siqa, ninano rupecaqwan bautisayäshurniqui, Santu Espiritunta qoyäshunqui. Pëqa allapa poderyoqmi. Tsemi noqaqa sirwïtsu llanqinta puritsinällapaqpis. Tseno nirnin, nerqan pepita mana sirweq canqantam. Tse tiempucho sirweqnincuna patronnincunapa llanquincunata puritsiyarqan. 12 Pëqa triguta wauyaq cuentam nunacunata acranqa. Trigutam wardacunanman wardanqa y pajatanam mana upeq ninacho cayeconqa.
Bautisacoq Juan Jesucristuta bautisan
(Marcos 1.9-11; Lucas 3.21-22)
13 Tse tiempum Galileapita Jesus ewarqan Juan quecanqan Jordan mayuman, petapis bautisananpaq. 14 Juanqa manam munarqantsu bautiseta. Antis quenomi nerqan:
—¿Imanopam noqa qamta bautisallashqequi! ¡Antis qamchiri noqalläta bautisecamanquiman! —nir.
15 Tsenam Jesus nerqan:
—Tseta ama yarpäcachëtsu, porqui presisanmi Diospaq alli caqta cumplinantsic —nir.
Tseno niptinnam, “Mä ari” nir, bautisecorqan. 16 Bautisacurirnam, Jesus yacupita yarqaramorqan. Tse öram sielu quichacärerqan, y Jesusnam riquecorqan Diospa Espiritun imeca palumano jananman urärëcamoqta. 17 Sielupitanam Dios queno nimorqan:
—Quemi noqapa cuyë Tsurï. ¡Perecurmi noqa allapa cushicü! —nir.

*3:3 Is 40.3

*3:4 Langosta curoqa imeca pinteq wallpa curunomi.

3:11 Tseno nirnin, nerqan pepita mana sirweq canqantam. Tse tiempucho sirweqnincuna patronnincunapa llanquincunata puritsiyarqan.